الماتى وبلىسى، رايىمبەك اۋدانىندا مال ازىعىن دايىنداۋ ناۋقانى شىلدە ايىنىڭ باسىنان باستالدى. بيىل اۋدان بويىنشا 274400 توننا مال ازىعىن دايىنداۋ جوسپار­لانسا، قازىرگى كۇندە 57736 توننا ءشوپ دايىندالدى. مال ازى­عىن دايىن­داۋ ءىسى اۋداننىڭ قارقارا، نارىنقول، جالاڭاش وڭىرىندە قارقىن الىپ وتىر.

قارقارا اۋىلدىق وكرۋگىنە قاراستى امانتاي اكەباەۆ باسقاراتىن «كولساي قۇرىلىس» جشس-ءنىڭ شابىندىق القا­بىندا بولعانىمىزدا سەرىكتەستىكتىڭ ەڭبەك­كەرلەرى بىتىك شىققان 90 گەكتار كوپجىلدىق ءشوپ القابىن شاۋىپ، تايلاپ، تاسى­مالداپ ۇلگەرگەنىن كوردىك. وسىنىڭ وزىنەن 240 توننا ءشوپ دايىندالدى. ەندى 80 گەك­تار تابيعي ءشوپ القابىندا ەڭبەك كورىگى قىزا تۇسكەن. ءشوپ شابۋمەن گەرما­نيالىق الىمدى ءبىر كومباين اينا­لىسۋدا. 2 ءشوپ تايلاعىش، 1 تىرما، 1 باسقىش، تاعى دا باسقا تەحني­كالار توقتاۋسىز جۇمىس اتقارۋدا.

– ءبىزدىڭ «كولساي قۇرىلىس» جشس-ءى نەگىزىنەن اسىل تۇقىمدى ءىرى قارا مالىن وسىرۋمەن اينالىسادى. قازىر سەرىكتەستىگىمىزدە قازاقي 1500 قوي، 170 جىلقى، 535 باس «اۋليەكول» اسىل تۇقىمدى ءىرى قاراسى وسىرىلۋدە. سوڭعى 3 جىل كولەمىندە اۋدان اۋماعىنداعى شارۋا قوجالىقتارىنا اسىل تۇقىمدى «اۋليە­كول» ءىرى قاراسىنىڭ 80 باس بۇقاسى ساتىلىپ، تاراتىلىپ بەرىلدى. ءبىز جاز ماۋسىمىن ءتيىمدى پايدالانىپ، 700 توننا مال ازىعىن دايىندايتىن بولامىز، – دەيدى سەرىكتەستىك جەتەكشىسى.

ءبىر سوزبەن ايتقاندا، اشىق كۇندى قولايلى شاقتى ءتيىمدى پايدالانىپ وتىرعان سەرىكتەستىك ەڭبەككەرلەرىنىڭ ءىسى ءونىمدى. الدابەرگەن ءجۇنىسوۆ، باقداۋلەت نۇرعانات سەكىلدى مەحانيزا­تورلاردىڭ اتىنا جىلى لەبىز بىلدىرگەن ارتىق ەمەس.

ەگىنجايدا ەرەن ەڭبەك

بيىل جاركەنت ءوڭىرىنىڭ ديقاندارى 493 گەكتار سۋارمالى القاپقا جازدىق بيداي، 567 گەكتارعا ارپا وسىرگەن بولاتىن. جايقالىپ جەتىلگەن استىققا شىلدە ايىنىڭ ورتا شەنىندە وراق سالعان ەگىنشىلەر بيداي جيناۋ ناۋقانىن اياقتاۋعا جاقىن.

قازىرگە دەيىن جينالعان بيدايدىڭ ءار گەكتارى 22 تسەنتنەر­دەن اينالىپتى. اسىرەسە، باسقۇنشى، تالدى، ساربەل اۋىلدىق وكرۋگتەرىنىڭ ەگىنشىلەرى گەكتار بەرەكەلىلىگىن ارتتىراتىنىنا سەنىمدى. ءوڭىر تۇرعىن­دارىنىڭ ءتول داقىلىنا اينالعان جۇگەرىنىڭ ەگىس كولەمى بيىل 400 گەكتارعا ۇلعايىپ، جالپى 25412 گەكتار جەرگە ءوسىرىلدى. قازىر جۇگەرى ەگىستىگى ءۇشىنشى رەت سۋارىلۋدا. بۇل جۇمىس ءۇشارال، ۇلكەنشىعان، بىرلىك، باسقۇنشى جانە پەنجىم اۋىلدىق وكرۋگتەرىندە قارقىندى جۇرگىزىلۋدە. ءوڭىر تۇرعىندارى باۋ-باقشاسىندا كوكونىستى كوپ وسىرەدى.

ۇستىمىزدەگى جىلى اۋدان بويىنشا 467 گەكتار القاپقا كوكونىس ءوسىرىلدى. الدا ەگىس كولەمى 90 گەكتاردى قامتىعان ۇشارالدىق شارۋالار تۇر. كوكونىستەردى قىس ماۋسىمىندا ساقتاۋ شارالارى دا جاسالىپ، سىيىمدىلىعى 3060 توننا قويما ازىرلەندى. ايتا كەتەيىك، كوكونىس، باقشا وسىرەتىن شارۋالارعا ۇكىمەت قارجىلاي قولداۋ كورسەتۋدە. مەملەكەت قولداۋىنىڭ ناتيجەسىندە بۇرىن تەك جۇگەرى وسىرۋگە بەيىم جاركەنت ءوڭىرىنىڭ ديقاندارى ەندى باقشا ونىمدەرىنىڭ ەگىس كولەمىن كوبەيتۋگە دەن قويىپ وتىر. بيىل ءۇشارال اۋىلدىق وكرۋگىندە 35, تالدىدا 34, ۇلكەنشىعان وكرۋگىندە 30 باقشا سالىپ جەرلەستەرىن جەرگىلىكتى قاۋىن-قاربىزبەن مولىنان قامتاماسىز ەتۋدە.

 Abai.kz