اتىراۋ وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتى 28 جاستاعى اقتوبە وبلىسىنىڭ تۇرعىنىن 17 جىلعا باس بوستاندىعىنان ايىرۋعا ۇكىم شىعاردى. بۇل تۋرالى وبلىستىق سوتتىڭ ءباسپاسوز قىزمەتى حابارلادى.

تەرگەۋ بارىسىندا ءمالىم بولعانىنداي، 28 جاستاعى پەدوفيل ءوزىنىڭ 12 جاستاعى تۋىسقان قارىنداسىن ءۇش جىل بويىنا وزىمەن جىنىستىق قاتىناسقا تۇسۋگە ماجبۇرلەپ كەلگەن ەكەن. مۇنى ءتيىستى مەديتسينالىق ساراپتاما قورىتىندىلارى دا دالەلدەدى. راس، رەسمي مالىمەتتەرگە قاراعاندا، پەدوفيلدىڭ اقتالىپ كەتۋى دە مۇمكىن كورىنەدى، ويتكەنى ۇكىم ءالى زاڭدى كۇشىنە ەنگەن جوق.

سۋرەتتە: اتىراۋداعى پەدوفيلگە قاتىستى سوت پروتسەسىنەن كورىنىس. 

ال وسى كەزدە...

تومپيعان نايساپتىڭ جۇدىرىعى مۇنداي قاتتى بولار ما، يەكتىڭ استىنان ساق ەتە قالعان جۋان جۇدىرىقتىڭ جىلدام سوققىسىنان شالقاسىنان ءتۇستى. اگاراكي ۇستىنە قونجيىپ مىنە كەتسە، جاعدايىنىڭ مۇلدە مۇشكىل بولاتىنىن سەكۋند ىشىندە سەزىنىپ ۇلگەرگەن سەكەناي جاندارمەن وڭ جاعىنا قاراي دومالاپ كەتتى دە، اپالاق-ساپالاق ورنىنان اتىپ تۇردى.

اتىپ تۇرعانى سول ەدى… الدىندا تالتايىپ تۇرعان الگى ناقۇرىسقا كوزى ءتۇسىپ كەتتى. ەسىن جيىپ تا ۇلگەرمەدى – ناقۇرىس مۇنى بۇل جولى باسپەن ۇردى. «مۇرنىم بەت بولعان شىعار…» دەگەن مازاسىز وي بۇل جولى دا ميىنىڭ ءبىر قالتارىسىنان زۋ-زۋ ەتە قالدى. قانى بۇرق ەتە قالعان مۇرنىن باسىپ، بۇكجيىپ قالدى. اياقپەن وڭدىرماي تەپكەن بولسا كەرەك، ىشتەن تيگەن تاعى ءبىر سوققىدان اينالىپ ءتۇستى. سول كۇيى تىرپ ەتپەي جاتىپ قالدى. ءبىر ويى – ناقۇرىس سوققىسىن شامالى توقتاتسا، ەس جيىپ الماق. تاعى ءبىر ويى – تالىپ قالعاننىڭ كەيپىن تانىتىپ، تىرپ ەتپەي جاتا بەرۋ. وسى ويلارى جۇزەگە اسا قالسا، قايتسە دە ءبىر امالىن تابادى. قايتسە دە ناقۇرىستى ۇستايدى. ۇستاپ قانا قويمايدى، ءتىرى بولسا – ءتۇتىپ جەيدى… ءتۇتىپ جەيدى. ودان كەيىنگىسى نە بولسا، و بولسىن – اتاسىنا نالەت!

سىعىرايتىپ… كىرپىكتەرى جابىسىپ قالعان ەكەن، سىعىرايتىپ… ارەڭ-ارەڭ كوزىن اشتى. كورگەنى – ناقۇرىس تالتايىپ تۇر ەكەن. ارى قاراپ تۇر بىراق… ارى قاراپ. ارعى جاعىندا تىلدەن ايىرىلىپ، كوزدەرى كوبەلەكتەي جىپىلىقتاپ… كىشكەنتاي قىز بالا جاتىر. بەس-التى جاستاعى قىز بالا. كوزدەرى جىپىلىقتايدى. ءبىر ۋىس دەنەسى ءدىر-ءدىر ەتەدى. دۇنيەنىڭ نە بولىپ كەتكەنىن تۇسىنبەي قالعان ءتارىزدى.

ناقۇرىس ەڭكەيىپ، كىشكەنتاي پەرىشتەنىڭ كىشكەنتاي كويلەگىن دىرىلداتىپ جىرتا باستادى. ءاپ-ساتتە دالا-دالاسىن شىعارىپ جىرتىپ تاستادى دا، ءوزىنىڭ تىرتىسقان شالبارىنىڭ اۋىن اعىتۋعا كىرىستى. الەمدە… اينالادا نە بولىپ جاتقانىن ۇمىتىپ كەتكەندەي. «ارتقى جاعىمدا ادام بالاسى بار-اۋ!» دەپ ويلامايتىنداي… مۇنى مۇلدە ادام بالاسىنا سانامايتىنداي… جايباراقات ءتىپتى. بۇدان ارعىعا سەكەنايدىڭ شىدامى جەتپەدى… شىدامى مۇلدە جەتپەدى. جاتقان جەرىنەن اقىرىن-اقىرىن تۇرەگەلىپ كەلە جاتتى دا، قايدان ىلىنگەنى بەلگىسىز، قولىنا ىلىنگەن كەسپەلتەك تومارمەن ناقۇرىستىڭ تۋرا قاراقۇسىنان ۇردى. ۇرعاندا دا وڭدىرماي ۇردى، ويتكەنى جوپەلدەمەدە نە بولعانىن تۇسىنبەي قالعان ناقۇرىس سول تۇرعان كۇيى… سول تۇرعان كۇيى بەس-التى سەكۋندتاي تەڭسەلىپ تۇردى... تۇردى دا، ءبىر كەزدە كەسىلگەن تەرەكتەي گۇرس ەتىپ قۇلادى. وڭباي قۇلادى. وڭباي قۇلاعانى ەمەس پە، سول كۇيى قيمىل-قوزعالىسسىز قالدى. سەكەناي تالتىرەكتەپ بارىپ، ءدىر-ءدىر ەتىپ ءبۇرىسىپ جاتقان كىشكەنتاي پەرىشتەنى اقىرىن عانا ورنىنان تۇرعىزدى. ءسويتتى دە – «دجينسوۆكاسىن» شەشىپ الىپ، پەرىشتەنى سوعان ورادى. ورادى دا، كوتەرىپ الىپ، كەۋدەسىنە باستى. كوزىنىڭ الدىنا «پاپا-پاپا» دەپ پاپالاعان ءوزىنىڭ كىشكەنتاي قىزى ەلەستەدى. «ۇيدە شىعار-اۋ ءوزىنىڭ كىشكەنتايى، ۇيدە شىعار؟ ماماسىنىڭ جانىندا شىعار…»

وسى كەزدە ساياباق ىشىندەگى وسىناۋ تۇپكىرگە جان-جاقتان جۇگىرىپ، ادامدار دا كەلە باستادى. «ايانا… ايانا…» دەپ ەڭىرەگەندە ەتەگى جاسقا تولعان جاپ-جاس ءبىر كەلىنشەك سەكەنايدىڭ قولىنداعى كىشكەنتاي پەرىشتەنى باس سالدى. «سەن قايدا جوعالىپ كەتتىڭ، ا، ايانا، قايدا جوعالىپ كەتتىڭ دەيمىن؟» دەپ «دجينسوۆكاعا» ورالعان كىشكەنتايىن اينالىپ-تولعانىپ، ەسى شىعىپ ءجۇر. قارا-قۇرا كوبەيىپ، ادامدار ماسەلەنىڭ ءمان-جايىنا قانىعا باستاعان كەزدە عانا سەكەناي قايىرىلىپ، ناقۇرىسقا قارادى. ناقۇرىس جاتىر ەكەن. سول… گۇرس ەتىپ قۇلاعان جەرىندە قوزعالماي جاتىر ەكەن. ء«ولىپ قاپتى مىناۋ، — دەپ ونىڭ تامىرىن باسقان بىرەۋ كۇبىرلەي سويلەپ، اينالاسىنداعىلارعا اڭىرايا قارادى، — ءولىپ قاپتى. تەزىرەك كەتەيىك بۇل جەردەن، پالەسىنەن اۋلاق!»

…سەكەناي سوتتالىپ كەتتى – ون بەس جىلعا. پەدوفيلدىگى ءۇشىن سوتتالىپ، جاقىندا عانا بوستاندىققا شىققان… بوستاندىققا شىعا سالا تاعى دا «ەسكى ادەتىنە» باسقان ناقۇرىستى «بايقاماي ءولتىرىپ» العانى ءۇشىن. ساياباقتا سەكەنايدىڭ كىشكەنتاي قىزدى پەدوفيلدەن قۇتقارعانىن كورگەن ادامدار وقيعاعا كۋا بولۋدان تاس تارتىپتى – «پالەسىنەن اۋلاق...» دەپ.

مارات ماداليموۆ 

Abai.kz