قادىر اقىنمەن مۇڭداسۋ
قازاقتىڭ بىرتۋار اقىنى قادىر مىرزا اليگە باتىس قازاقستان وبلىسىندا ەكى ەسكەرتكىش اشىلدى. سول كۇنى وبلىس اكىمى نۇرلان نوعاەۆ ءبىراز جۋرنالىستەرگە العىس حات تاراتتى.
«اقىندىق شىعار ايىپتى،
الى بىلمەن سەبەبىن.
ولەڭگە ايتىپ قويىپپىن،
ومىردىڭ ايتپا دەگەنىن...»
تولاعايلارمەن تەڭدەستىڭ،
بىلمەستىكپەنەن بەلدەستىڭ.
وزگەرەر ەمەس دۇنيە،
كۇيىڭدى، اعا، مەن كەشتىم...
كۇيىڭدى كەشىپ،ء تۇسىندىم،
جۇرەگىم جارا،ء ىشىم مۇڭ.
جارالانىپ اقيقات،
ادىلەتسىزدىك تۇشىندىم...
«قاي جەردە دە بىر ولىم،
قايمىقپادىم داۋدەن دە.
بۇكىل جۇرتتىڭ جۇرەگى،
مىنا مەنىڭ كەۋدەمدە»
دۇنيە شاشسىز، تاز – باسى،
پەيىلىم، بىراق، ازباشى!
جۇرەگىمنەن سورعالار،
قازاعىمنىڭ كوز جاسى...
نامىسىم نارداي جۇلقىندى،
سابىرمەن كۇتكەن مىڭ كۇندى.
تىلىمدى كەسىپ السا دا،
ساتپايمىن تۋعان ۇلتىمدى!
«دۇشپانعا مەنى بالاما،
مۇقاتۋ ىزدەپ سەزىمنەن.
ادام بوپ تۋ – انادان،
ايۋان بوپ كەتۋ – وزىڭنەن»
شەكسىزدىك – ساعىمسۋداي-دى،
تەكسىزدىك – زاپىران ۋداي-دى.
جاتقانى بەكزات بەل بولسا،
انادان – نادان تۋمايدى!
سوزىمە سەنبە – سەن مەيلى،
بيىككە – بيىك تەڭ دەيدى
مايمەنەن باسىن جۋساڭ دا،
اكەگە مۇڭسىز ەرمەيدى...
«جولىن قۋىپ جاماننىڭ،
جۇقتىرمايتىن ارعا شاڭ.
ارمانى ۇلكەن ادامنىڭ،
ءوزى دە ۇلكەن ارقاشان!»
بۇ كۇندە اردى تۇساپ باق،
بولمىسى – باقىت، ءتۇسى – اپپاق.
وزىنە ۇقساپ ادامنىڭ،
ارمانى كەتكەن ۇساقتاپ!
شاق كەلمەسە دە تانىمە،
باسىپ مەن ەسكى انىمە...
جالىنان ۇستاپ جارماستىم،
ارماننىڭ ءداۋى، نانىنە!
«و، دالام، مەنىڭ بايتاعىم،
دالام دەپ ولەڭ ايتامىن.
سولعان اي بولىپ بارام دا،
تولعان اي بولىپ قايتامىن»
بايتاعىڭ، اعا، ء«سۇرىندى»،
بولا الماي بەكزات ءبىر ۇلگى.
اۋاسى اڭقىپ، قان ساسىپ،
كيىگى قۇلاپ، قىرىلدى.
سەبەبىن حاقتان سۇراعىن،
جاراتقان بىلەر، شىن، اعىن...
وبالىن ويلاپ جاندىنىڭ،
دالاممەن بىرگە جىلادىم!..
************************
...ەسكەرتكىشپەنەن ءساتىن ساپ،
مەرەكەنىڭ بىرگە كەلگەنى...
ايتسە دە، تەكسىز شەنەۋنىك،
قۇتتىقتاۋىن دا بەرمەدى...
شىندىقتى ايتساق شىرىلداپ،
بولادى-اۋ بىزگە تاعى ايىپ...
جالعانى تولعان العىس حات،
بەرمەي-اق قويسىن، نوعاەۆ!..
«وتىرىك جىردىڭ قايداعى،
بولمايسىڭ جەتىپ شەتىنە.
اقيقات – ءسوزدىڭ قايماعى،
تۇرمايدى شىقپاي بەتىنە»...
جۇنجىمەس، بىراق، «جۇدەۋلى» ەر،
ادالعا اللا – تىرەۋ بەر!
جالعاننىڭ – جالعان ەكەنىن،
تۇسىنبەي وتەر بىرەۋلەر...
...باعىتىن اڭداپ باس-ءۇيدىڭ،
قايناعان قانداي تاسيمىن!
بيشىگەش – ماعان بي ەمەس،
ەلىمە عانا باس ءيدىم!
قاجىمۇقان عابدوللا،
ماۋسىم-شىلدە، 2015 جىل،
ءۇرىمشى، قىتاي.
Abai.kz
