ەلىمىزدە ەڭ كوپ وزگەرىستەر ەنەتىن... قالاۋلىلارىمىز ەڭ كوپ وزگەرىستەر ەنگىزەتىن سالا - ءبىلىم جانە عىلىم سالاسى ەدى، ەندى وعان دەنساۋلىق ساقتاۋ مەن الەۋمەتتىك دامۋ سالاسى قوسىلدى. بىرەسە جەكەگە بەرىلىپ، بىرەسە قايتادان مەملەكەتتىڭ مەنشىگىنە ءوتىپ، ىرىڭ-جىرىڭمەن «باسى قاتىپ» جۇرگەندە ءبىرتالاي ميللياردتارىنان ايىرىلىپ قالعان بىزدەگى زەينەتاقى جۇيەسى الداعى ءبىر-ەكى جىلدا تاعى دا «تالاعىمىزدى تارس ايىرايىن» دەپ وتىر – ەستۋىمىزشە، تاعى دا وزگەرىستەرگە ۇشىراماق. تاعى دا سول – بازالىق زەينەتاقى ماسەلەسى. «بىلەسىزدەر مە، قازىرگى كەزدە بازالىق زەينەتاقى تولەنىمى بارلىق زەينەتكەرلەرگە بىردەي كولەمدە بەرىلىپ كەلە جاتىر، بۇل دۇرىس ەمەس، - دەدى كەشە دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا، - ەندى الداعى 2017-ءشى جىلدىڭ 1-ءشى شىلدەسىنەن باستاپ تولەنەتىن زەينەتاقى كولەمى زەينەتكەردىڭ ەڭبەك ءوتىلى مەن جيناقتاۋشى زەينەتاقى جۇيەسىنە قاتىسۋ وتىلىنە بايلانىستى بولادى...»

مينيستر حانىمنىڭ ايتۋىنا قاراعاندا، ءتيىستى جارنانى زەينەتاقى قورىنا ۇزدىكسىز اۋدارىپ وتىرماعان ادام ءوزىنىڭ «قامتاماسىز ەتىلگەن كارىلىگى» تۋرالى ۇمىتا بەرسە دە بولادى. سونداي-اق، زەينەتاقى قورىنا جارنانى ون جىلداي عانا اۋدارعان ازاماتتار دا اتالمىش تىزىمگە ەنەدى. قىسقاسىنان قايىرعاندا، زەينەتاقىنىڭ تولەنۋ كولەمى ازاماتتىڭ ەڭبەك وتىلىنە تىكەلەي بايلانىستى، ال ەندى جوعارىدا كەلتىرىلگەندەي، ەڭبەك ءوتىلى ون جىلدىڭ ار جاق، بەر جاعىندا عانا بولعاندار ءۇشىن بازالىق زەينەتاقى كولەمى ەڭ تومەنگى كۇنكورىس مينيمۋمىنىڭ جارتىسىنداي عانا بولماق. ال بۇل، ءدال قازىرگى كەزدە، شامامەن ون مىڭ تەڭگەدەن ءسال-ءسال عانا اسادى.

جازعى كانيكۋلعا جەتە الماي، الاڭكوڭىل بولىپ جۇرگەن پارلامەنتاريلەر ەل ازاماتتارى ءۇشىن ەڭ-ەڭ ماڭىزدى سانالاتىن وسىناۋ زاڭ جوباسىن كەشە پرەزيدەنتتىڭ ماقۇلداۋىنا اتتاندىرىپ جىبەردى.

مارات ماداليموۆ.

Abai.kz