قازان ايىنىڭ ورتاسىندا رەسەي فەدەراتسياسى ۆلاديمير پۋتين قازاقستانعا رەسمي ىسساپارمەن كەلەدى. 

رەسەي قازاقستانمەن ء«ححى عاسىرداعى ماڭگىلىك دوستىق، وداقتاستىق دەكلاراتسياسىنا» قول قويعان، ءبىزدىڭ ەلىمىزدىڭ «ستراتەگيالىق ارىپتەسى» جانە ەۋرازيالىق وداقتاعى اعا بالاسى. مۇنىڭ ءبارى رەسمي قۇجاتتارمەن راسىمدەلىپ، بەكتىلىپ، قاتتالعان.
سويتكەن «ماڭگىلىك دوستىڭ» مەملەكەت باسشىسى «سەليگەردەگى» جاستار فورۋمىندا «ۋ كازاحوۆ نە بىلو گوسۋدارستۆەننوستي نيكوگدا» دەپ سالدى. سالعاندا سويىلمەن، قازاقتىڭ باسىنان، وڭدىرتپاي سالدى. ونى قويشى، سويىل تيمەي جۇرگەن باس ەمەس. 
سول-سول-اق ەكەن، بيىل «قازاق حاندىعىنىڭ 550-جىلدىعى» ەكەنى ءبىزدىڭ بيلىكتىڭ ەسىنە ءتۇسىپ، جالپاق جۇرتقا ساۋىن ايتىپ كەپ جىبەردى. «توي دەسە قۋ باس دومالايدى»، بىرەر كۇندە اۋليە تاراز جۇرتىندا جىرعايمىز ءبىر. 
ال، «قازاق مەملەكەتتىگىنە قانشا جىل؟» دەگەن ۋاقىتتىڭ، رۋحتىڭ ايقايى، جان ايقايى جاۋاپسىز قالدى. ونى دا قويشى، تاريحي جادىمىز مۇندايعا دا ۇيرەنىپ كەتتى. 
بىراق، «ايتىلعان ءسوز، اتىلعان وق» قوي. مۇنى ەندى جايىنا قويۋعا بولمايدى عوي. وسى ساپار كەزىندە پۋتينگە «قازاقتاردا ەشقاشان مەملەكەت بولعان ەمەس» دەگەن پىكىردى نەگە سۇيەنىپ ايتتىڭىز؟ سول ءۇشىن قازاق حالقىنان كەشىرىم سۇرامايسىز با؟» دەگەن سۇراق قابىرعاسىنان قويىلۋى كەرەك. 
پۋتين تۇگىلى تۋعان پرەزيدەنتىنىڭ ماڭىن كورمەيتىن قالىڭ قازاق بۇل سۇراقتى قويا المايدى، ارينە. ءبىز قويا المايمىز، جۋرناليستيكادان باياعىدا كەتتىك، ء«بىر جەردە ءتىلشى ەدىك» دەيتىندەي تىلدەي قاعازىمىز دا جوق.
قويسا، پرەزيدەنتتىك پۋلعا نەمەسە ەكى پرەزيدەنت وتكىزەتىن ورتاق ءباسپاسوز كونفەرەنتسياسىنا تىركەلەتىن جۋرناليستەردىڭ ءبىرى عانا قويا الادى. ونداي جۋرناليست شىعىپ، سونداي سۇراقتى قويىپ جاتسا، شايعا شاقىرىپ، قولىن سۇيەر ەدىم. مىنە، وسىنداي كۇيگە دە جەتتىك...

تالعات ەشەنۇلى

Abai.kz