كەشە الماتى وبلىسى قاراساي اۋدانىنا قاراستى جاڭاشامالعان اۋىلدىق وكرۋگى ماڭىنان  اتاجۇرتىنا قونىس اۋدارىپ كەلگەن قانداستارمىزدىڭ «باركول» دەپ اتالاتىن اۋىلى قۇرىلىپ،  ونداعى تۇرعىنداردىڭ قونىس تويى ءوتتى. بۇل تۋرالى «قامشى» پورتالى حابارلايدى.

2007 جىلدىڭ باسىنان بەرى تاريحي وتاندارىنا اياق باسقان ورالمان باۋىرلاردىڭ ءوز كۇشىمەن قۇرعان «باركول» اۋلىنىڭ اشىلۋ سالتاناتىنا اۋداندىق جانە اۋىلدىق اكىمشىلىك وكىلدەرى،  قازاقستان عىلىمىنا ەڭبەگى سىڭگەن قايراتكەرلەر، عىلىم دوكتورلارى مەن قحر-نان ارنايى كەلگەن قوناقتار قاتىستى.

ال، قازاقستاننىڭ ەسترادا جۇلدىزدارى تورقالى تويعا ارنايى ات تەرلەتىپ كەلگەن كوپشىلىككە اننەن شاشۋ شاشتى. 

ەلگە كەلىپ ەڭبەگى جانعان باۋىرلارىمىزدىڭ وسىناۋ قۋانىشىنا ارنايى اقسارباس مال سويىلىپ، اقشاڭقان  كيىز ۇيلەر تىگىلدى.

ايتا كەتەيىك، «باركول» اۋىلىنىڭ اشىلۋ سالتاناتى ارنايى «قازاق حاندىعىنىڭ 550 جىلدىعىنا» ورايلاستىرىلىپ وتىر.

بۇگىندە «باركول» اۋىلىندا قيىر شەتتەن اتاجۇرتىنا ورالعان  56 وتباسى قونىستانعان. الداعى ۋاقىتتا اۋىلعا قونىستانۋشىلاردىڭ قاراسى 200 وتباسىعا دەيىن جەتەدى دەيدى وسى يگى ءىستىڭ ۇيىتقىسى بولىپ جۇرگەن ۇلتجاندى ازامات، «باركول» اۋىلدىق كەڭەسىنىڭ توراعاسى ماقسۇتقان دالەيۇلى.

2007 جىلى اتاجۇرتىنا تابانى تيگەن ساتتەن باستاپ، ماقسۇتقان دالەيۇلى ءوز قانداستارىن باۋىرىنا جيناپ، ولاردىڭ جەر الۋىنا، باسپانا تۇرعىزۋىنا، الەۋمەتتىك تۇرمىسىنا سەپتىگىن تيگىزىپ كەلە جاتقانى جاسىرىن ەمەس. بۇل تاريحي وتانىنا ورالعان ءار قازاقتىڭ اتقارۋعا ءتيىس شارۋاسى بولعانىمەن، كوپ قازاقتىڭ قولىنان كەلە بەرمەيتىن ەرلىكتى ماقسۇتقان دالەيۇلى جاساعانى اقيقات.

راس، ماقسۇتقان دالەيۇلىنىڭ مۇرىندىق بولۋىمەن الىپ مەگاپليس الماتىنىڭ ىرگەسىندە قازاقى بولمىستى اۋىلدىڭ بوي كوتەرۋى ارداقتى  ازاماتتىڭ ۇلت ءۇشىن  قىزمەت ەتۋ جولىنداعى قاجىرلى ەڭبەگى مەن ادال نيەتىنىڭ كورىنىسى بولسا كەرەك-ءتى.

ماقسۇتقان دالەيۇلى، «باركول» اۋىلدىق تۇتىنۋ كورپوراتيۆىنىڭ توراعاسى:

-ءبىز بۇل جۇمىستاردى 2007 جىلدان باستاپ قولعا العان بولاتىنبىز. العاشىندا ءتۇرلى قيىندىقتار مەن كەدەرگىلەردىڭ بولعانى جاسىرىن ەمەس. قۇجاتتاردى راسىمدەۋ كەزىندە دە كوپ كەدەرگىلەر بولدى. بىراق، ءبىز ءاۋ باستا وسى اتاجۇرتىمىزعا اياق باسقان باۋىرلارىمىزدى ءبىر جەرگە توپتاستىرۋ يدەياسى بولعان. ەلباسىمىزدىڭ ايتقان ءسوزى بار عوي: «مۇندا كەلگەن ءاربىر قانداسىمىز وتاننان نە الام دەپ ەمەس، نە بەرەم دەپ كەلۋى كەرەك»،- دەگەن.  ءسويتىپ، ءبىز باستاما كوتەرىپ، وسى اۋىلدى قۇرۋ ءۇشىن جانتالاستىق. 2007 جىلى وسىنداعى جەكە تۇلعالاردان 12,5 گەكتار جەر ساتىپ الدىق. قازىر مۇندا 56 وتباسى قونىس تەپكەن. الداعى ۋاقىتتا اۋىلىمىزعا 200 وتباسى سياتىنداي جەرىمىز بار. اۋىلدى قۇرۋ ءۇشىن جەرگىلىكتى جانە اۋداندىق اكىمشىلىك تاراپىنان قۇجاتتاردى راسىمدەۋ، ەلەكتر جارىعىن تارتۋ، سۋ قۇبىرلارىن رەتتەۋ سەكىلدى كوممۋنالدىق جۇمىستارعا قولداۋ بولدى.  قازىر اۋىلىمىزعا سۋ، ەلەكتر جارىعى، ءتىپتى كوگىلدىر وتىنعا دەيىن تارتىلعان.

بەكسۇلتان اقىلبەكۇلى، جاڭاشامالعان اۋىلدىق وكرۋگى اكىمىنىڭ ورىنباسارى:

بۇگىندە الەمنىڭ وتىزداي ەلىنەن قازاقتار اتاجۇرتىنا قونىس اۋدارىپ، ءوز ەلىمەن، جەرىمەن تابىسۋدا. ەلباسى نۇرسۇلتان ءابىشۇلى نازارباەۆتىڭ «قازاقستان – دۇنيەدەگى ءار قازاقتىڭ قاستەرلى قۇبىلاسى! قازاقستان – الەمدەگى بارشا قازاقتىڭ قاستەرلى قارا شاڭىراعى!» دەگەن ءسوزى بار عوي. بۇگىنگى وتانداستارىمىزدىڭ قۇرعان اۋىلى مالدى، جاندى بولسىن دەيمىز. ءبىز دە الداعى ۋاقىتتاردا ءوز قولىمىزدان كومەگىمىزدى كورسەتىپ وتىراتىن بولامىز. ال الەۋمەتتىك نىساندارعا كەلەتىن بولساق، بۇل بىرىنشىدەن ساياجاي كەشەنى رەتىندە تىركەلگەندىكتەن، مۇنداعى وتباسىلار باۋ-باقشا شارۋاشىلىقتارمەن اينالىسادى دەپ جوسپارلانعان. سوندىقتان بۇل اۋىلعا ءالى اۋىل ستاتۋسى بەرىلمەگەندىكتەن،  قانداي دا ءبىر الەۋمەتتىك نىسانداردى; ەمحانا، بالاباقشا، مەكتەپ ت.ب. سالۋ جوسپارلانباعان. دەسە دە، جاقىن ماڭدا وسى «باركول» اۋىلى تۇرعىندارىنا ارناپ اۋىلدىڭ ماڭىنان مەشىت تۇرعىزۋدى جوسپارلاپ وتىرمىز. مەشىتتىڭ ورنى ناقتى بەلگىلەنىپ قويدى. ال اۋىل تۇرعىندارىنا ارناپ كوشلىلەس ورنالاسقان تۇرار  اۋىلىنان كەلەر جىلى بالاباقشا اشۋ جوسپاردا بار. قازىردىڭ وزىندە بۇل اۋىلدىڭ بالالارى تۇرار اۋىلىنداعى ورتا مەكتەپكە قاتىناپ وقيدى. ول ءۇشىن اۋداندىق ءبىلىم بولىمىنەن ارنايى اۆتوبۋس بولىنگەن. ول اۆتوبۋس وسى اۋىلدىڭ بالالارىن ساباققا اپارىپ، الىپ كەلۋدە. جول ماسەلەسىنە كەلەر بولساق، قازىر ءبىزدىڭ بيۋدجەتىمىز شەكتەۋلى بولعاندىقتان، بالەن-تۇگەن دەۋدىڭ ءوزى قيىنداۋ. ەگەر اۋىل تۇرعىندارى وزدەرى باس بولىپ، شاعىل، تاسىن ساتىپ الاتىن بولسا، اۋىلدىق اكىمشىلىك تەحنيكالىق جاعىنان كومەكتەسەتىن بولادى.

 نۇرگەلدى ابدىعانيۇلى

«قامشى» سىلتەيدى

سۋرەتتەردى تۇسىرگەن: ايان امانعالي