بۇگىن پارلامەنتتىڭ جوعارعى پالاتاسىنىڭ جالپى وتىرىسىندا سەناتور سەرىك اقىلباي مىرزا پرەمەر-مينيستر كارىم قاجىمۇقانۇلىنىڭ اتىنا دەپۋتاتتىق ساۋال جولداپ، رەسەيدەن كەيكى باتىردىڭ باسىن قايتارۋدى تالاپ ەتتى. بۇل تۋرالى «اباي-اقپارات» «BAQ.KZ»-كە سىلتەمە جاساي وتىرىپ حابارلايدى.

«ۇلت بوستاندىعى جولىندا كۇرەسكەن داڭقتى قولباسشىلاردىڭ ءبىرى، اتاقتى مەرگەن كەيكى باتىر ءوز ەلى ءۇشىن باسىن بايگەگە تىككەن تۇلعا. باتىردى قىزىل اسكەر ايۋاندىقپەن ءولتىرىپ، ەكى قولى مەن باسىن كەسىپ العان. ۇلت بوزداعىنىڭ باسى ءالى كۇنگە سانك-پەتەربوردا ساقتاۋلى تۇر. 1995 جىلى سىرتقى ىستەر مينيسترلىگى سۇراۋ جىبەرگەندە، كەيكى بابامىزدىڭ باسى بار ەكەنىن رەسەي سىرتقى ىستەر مينيسترلىگى دە جاۋاپ حاتىندا راستاعان»، - دەدى سەناتور سەرىك اقىلباي.

پاتشالىق رەسەيدىڭ وتارلاۋىنا قارسى قازاقستاننىڭ بارلىق ايماقتارىندا حالىق باس كوتەرگەن بولاتىن. سولاردىڭ ىشىندە تورعاي دالاسىنداعى ابدىعاپپار جانبوسىنۇلى، امانگەلدى يمانوۆ، كەيكى باتىر باستاعان ەل ەڭ ۇزاق كوتەرىلىس جۇرگىزدى.

جاس ۇرپاقتى پاتريوتتىق پەن وتانسۇيگىشتىككە باۋلۋ ءۇشىن باتىرلار رۋحىن جاڭعىرتۋ كەرەك. كەڭەس داۋىرىندە ۇلت-ازاتتىق كوتەرىلىستەر تۋرالى ايتىلماي كەلدى. وكىنىشكە وراي، بۇگىنگى كۇنى كەي جاستارىمىز 1916 جىلعى كوتەرىلىس تۋرالى، ونى باستاعان باتىرلار جايلى تولىق بىلە بەرمەيدى. سەرىك اقىلباي ەندى وسى ولقىلىقتىڭ ورنىن تولتىراتىن كەز كەلگەنىن ايتادى.

ءسوز سوڭىندا سەناتور، كەيكى باتىردىڭ باس سۇيەگىن تۋعان ەلىنە الدىرۋ ماسەلەسى كوپتەن ايتىلسا دا ناتيجە شىقپاعانىن كولدەنەڭ تارتتى.

"بيىل ۇلت-ازاتتىق كوتەرىلىستىڭ ءجۇز جىلدىعى. وسىعان وراي، كەيكى باتىردىڭ باس سۇيەگىن ەلگە قايتارىپ، تۋعان جەرىنە جەرلەۋ ماسەلەسىن ۇكىمەت قولعا السا", - دەيدى جوعارعى پالاتا مۇشەسى.

ەسكە سالا كەتسەك، دەپۋتات سەرىك اقىلباي كەيكى باتىردىڭ باسى توڭىرەگىندە بۇرىن دا بىرنەشە مارتە قوعام نازارىنا وي تاستاعان بولاتىن.

تاقىرىپقا تۇزدىق: باق-تىڭ بازىناسىنا اينالعان باتىر بابالاردىڭ باسىن ەلگە قايتارۋ بولعانى راس. بۇل جولى باس ۋازىرگە جولدانعان دەپۋتاتتىق ساۋالدىڭ جۇگى اۋىر. ولاي دەپ وتىرعانىمىز، تۇتاس ءبىر ۇلتتىڭ نامىسىنداي بولعان اقبەرەن قولباسشى، التى الاشقا تانىمال باتىر، كەيكى باتىردىڭ باس سۇيەگىن رەسەي مۇراجايىنان قايتارىپ الۋ ماسەلەسىن حالىق قالاۋلىسى كوتەرىپ وتىر.

باسى بار ەل، شىعادى باسىن ىزدەپ. ەگەمەندىك تاڭى اتقان 25 جىلدىڭ ىشىندە گەوساياسي كارتاداعى ەسكى ءام جاڭا وداقتاسىمىز، ستراتەگيالىق سەرىكتەسىمىز سانالاتىن ەسكى يمپەريانىڭ ەنشىگەرى – رەسەي فەدەراتسياسىنىڭ مۇراجايىندا جاتقان باتىر بابالارىمىزدىڭ باس سۇسيەكتەرىن ەلگە قايتارۋ ءىسى وڭايعا تۇسپەي تۇرعانى وكىنىشتى. ەمىس-ەمىس ەسكە تۇسكەندە، ەل قالاۋلىلارى پارلامەنتتىڭ قابىرعاسىنان پرەمەر-مينيسترگە دەپۋتاتتىق ساۋال جولداپ قوياتىنى بولماسا، ناقتى ناتيجە جوق.

پاتشالىق رەسەيدىڭ ايەل كوسەمى – قازاقتىڭ سوڭعى حانى كەنەسارى حاننىڭ باس سۇيەگىنەن كۇلسالعىش جاساتقانى بەلگىلى تاريحتان. ەندى ەگەمەندىك تاڭى اتىپ، سولتۇستىكتەگى كورشىمىزبەن ىم-جىمداسىپ وتىرىپ، بابامىزدىڭ باسىن قايتارىپ الا الماۋ، ءماسىموۆ مىرزا تىزگىنىن ۇستايتىن ۇكىمەتتىڭ سۇيەگىنە تاڭبا بولىپ باسىلارى حاق.

ۇلت تاريحىنىڭ وسى ءبىر مۇڭلى بەتتەرى ءالى جىلاۋلى كۇيدە. تاۋەلسىزدىك الىپ، وركەنيەتتى زاماندا ەركىندىككە سوعىسسىز قولىمىز جەتسە دە رۋحىمىز قايتا تىرىلگەن جوق. حان كەنە مەن كەيكى باتىردىڭ باسىن قايتارىپ، ونى ارۋلاپ كومگەنشە قازاقتىڭ ۇلتتىق رۋحى تىرىلمەك ەمەس. بۇل ءبىزدىڭ ۇلتىمىزدىڭ بەتىنە تۇسكەن تاڭبا. كەنەسارى حان جالتاققويلاردىڭ، پايداكۇنەمدەردىڭ كەسىرىنەن ۇلتتىڭ باسىن قوسا الماي كەتكەن ەدى. ول اڭساعان سول بىرلىك بىزگە ءالى جەتكەن جوق سياقتى. بۇگىنگى تىرلىكتىڭ ءبارى ءبىر كۇندىك. ويتكەنى ۇلتتىق رۋحىمىز ولىك كەيپىندە. ولىك ەمەس-اۋ، كەسىلگەن باس كۇيىندە قۇمىراعا سالىنىپ ەرىككەن جۇرتتىڭ ەرمەگىنە اينالىپ مۇراجايدا تۇر. بۇل ءبىزدىڭ ايانىشتى ءحالىمىزدى ايگىلەيدى. سەبەبى، ءالى كۇنگە رەسەيگە جالتاقتاپ، ورىستارعا قۇلدىق دەيمىز. كونەكوز قاريالاردىڭ ايتۋىنشا، پراۆوسلاۆيە شىركەۋى قازاقتىڭ سوڭعى حانى تۋعان جەرىنە ارۋلاپ جەرلەنەر بولسا قازاقتىڭ ۇلتتىق رۋحى تىرىلەدى دەپ قورقادى ەكەن.

نۇرگەلدى ابدىعانيۇلى

Abai.kz