قازاق قوعامىن ءدۇر سىلكىندىرگەن ەكى بىردەي سوت ءىسى اياقتالىپ، ەلىمىزدىڭ ەكس-پرەمەر-ءمينيسترى سەرىك احمەتوۆ 10 جىلعا، ال مەملەكەتتىك تۇتاستىعىمىزعا سىزات تۇسىرگىسى كەلەتىن تايشىبەكوۆ 4 جىلعا باس بوستاندىعىنان ايرىلدى. وسى ەكى بىردەي شۋلى ىسكە ءدال ءبىر كۇندە تۇكتە قويىلۋى كەزدەيسوقتىق پا؟ سوندا دەيمىن-اۋ، سەرىك احمەتوۆتىڭ كۇناسى تايشىبەكوۆتەن اۋىر بولعانى ما؟ سوت شەشىمى نەگە ەل دەمالىسقا كەتەتىن جۇما كۇنى، ونىڭ وزىندە تۇستەن كەيىنگى ۋاقىتتا بەلگىلى بولدى؟

بىلەسىزدەر، بۇگىن قورداي اۋداندىق سوتى «ۇلتارالىق ارازدىق تۋدىردى» دەپ ايىپتالعان بلوگەر ەرمەك تايشىبەكوۆتى 4 جىلعا سوتتاپ، جازاسىن جالپى تارتىپتەگى تۇرمەدە وتەۋگە ۇكىم ەتتى.

قازاقستاندى رەسەيدىڭ وتارى ەتكىسى كەلەتىن ەرمەك تايشىبەكوۆ سوڭعى سوزىندە قىلمىستى ەمەس ەكەنىن ايتىپ، بۇل ءىستىڭ «ساياسي استارى بار» ەكەنىنە توقتالدى. ول «قازاقستاندى ۇلى ەل دەپ سانامايتىنىن، بىراق پرەزيدەنت نۇرسۇلتان نازارباەۆتى ۇلى ادام دەپ تانيتىنىن» ايتقان.

ءدال وسى ءىس شەشىمىن تاۋىپ جاتقان كەزدە قاراعاندى وبلىستىق سوتى قازاقستاننىڭ ەكس-پرەمەر-ءمينيسترى سەرىك احمەتوۆتىڭ مۇلكىن تاركىلەپ، ءوزىنىڭ 5 جىل بويى مەملەكەتتىك قىزمەت اتقارۋىنا تىيىم سالدى. قاراعاندى وبلىستىق سوتى cۋدياسى يسلامحان ەسەنباەۆ سەرىك احمەتوۆتى 10 جىلعا سوتتاۋعا ۇكىم ەتكەن سوڭ ونى كۇزەتپەن الىپ كەتۋدى بۇيىردى.​

- نۇرسۇلتان ءابىشۇلى نازارباەۆتان سەنىمىن اقتاماعانىم ءۇشىن شىنايى كەشىرىم وتىنەم. ماعان بولا قاراعاندى وبلىسىندا وسىنداي احۋال تۋعانىنا، ونى ويلاپ مەملەكەت باسشىسىنىڭ قايعىراتىنىنا بايلانىستى مورالدىق جاۋاپكەرشىلىگىم بار ەكەنىن تۇسىنەم. ەگەر سوت پەن مەملەكەت باسشىسى قاتارعا قوسىلۋىما مۇرسات بەرسە، بارلىق ءبىلىمىم مەن تاجىريبەمدى ەل يگىلىگى ءۇشىن قولدانىپ، اقتىعىمدى دالەلدەۋگە دايىنمىن. كەز كەلگەن جاعدايدا مەملەكەتكە، حالىققا جانە ۇلت كوشباسشىسىنا (پرەزيدەنت نازارباەۆقا - رەد.) ادال بولىپ قالامىن، - دەگەن ەدى سەرىك احمەتوۆ (كەشە) سوڭعى سوزىندە.

احمەتوۆتىڭ بۇل كەشىرىم سۇراۋى ونى جازادان قۇتقارىپ قالا الماسا كەرەك...

قوش! سونىمەن بۇل ەكى سوتتىڭ ءبىر كۇندە اياقتالۋىنا نە سەبەپ؟ ءبىزدىڭ ويىمىزشا، ەلدىڭ لاۋازىمدى شەنەۋنىگى بولعان سەرىك احمەتوۆتى قولداۋشىلار از ەمەس ەكەنى بەلگىلى. سەبەبى، مەملەكەتتىك قىزمەتتە بولعان ءار ادامنىڭ جاماندىعىمەن قوسا، جاقسىلىعى دا بولادى. بىرەۋلەر داتتاپ جاتسا، ەندى بىرەۋلەر اقتاپ جاتادى. وسى ورايدا اقتاۋشىلار كوپ بولىپ كەتپەۋى ءۇشىن جوعارىداعىلارعا قوعامدىق پىكىردى ەكىگە جارۋ قاجەت بولعان سەكىلدى. تايشىبەكوۆ سوتى ىزدەگەنگە سۇراعان بولىپ وتىر. «احمەتوۆكە نەگە ءادىل شەشىم شىقپادى؟» دەيتىندەردىڭ اۋزىن «تايشىبەكوۆتىڭ ءادىل سوتى» جابا قويادى. ەگەر دە احمەتوۆتى سوتتالعانى تۋرالى اقپارات تۇسكە دەيىن تاراعان بولسا، بۇل جاي سول كۇننىڭ باس تاقىرىبىنا اينالار ەدى. ءسوزسىز احمەتوۆتى قولداۋشىلار قارسىلىق ءبىلدىرىپ، الەۋمەتتىك جەلىلەر ارقىلى سوت شەشىمىنە نارازىلىق بىلدىرەر ەدى. بۇل دا تەرەڭ ويلاستىرىلىپ، ادەيى جۇما كۇنگە بەلگىلەنگەن بولۋى كەرەك. ەرتەڭ سەنبى دەپ «جۇرتتىڭ جاعاسى جايلاۋدا» جۇرگەندە ون جىلدى ارقالاپ احمەتوۆ كەتە بارادى.

ەندى دەيمىن-اۋ! ءادىلىن وقىرمان ايتسىنشى...

ءبىز احمەتوۆتى قولداپ، قورعاشتاپ وتىرعان جوقپىز. دەسە دە قوعام ءۇشىن كىمنىڭ قىلمىسى اۋىر، احمەتوۆتىكى مە، تايشىبەكوۆتى مە؟

ءشارىپحان قايسار

Abai.kz