نۇرالى بەكتۇرعانوۆ، ءشامشى بەركىمباەۆا، جانسەيىت تۇيمەباەۆ، باقىتجان جۇماعۇلوۆ، بىرعانىم ءايتىموۆا، جاقسىبەك قۇلەكەەۆ، قىرىمبەك كوشەرباەۆ، ۆلاديمير شكولنيك، عالىم ابىلسەيىتوۆ، اسلان ءسارىنجىپوۆ... بۇل قازاقستان تاۋەلسىزدىك العان 25 جىلدىڭ ىشىندە ءبىلىم مەن عىلىم مينيسترلىگىن باسقارىپ، ءار قايسىسى ءبىر-ءبىر رەفورما جۇرگىزىپ شىققان مينيستر مىرزالار مەن حانىمداردىڭ ءتىزىمى. جوعارىدا اتالعانداردىڭ كەيبىرىنىڭ ەسىمدەرى ەل قۇلاعىنان سۋىپ كەتسە، كەيبىرى ءۇشىن بعم كارەرالىق ورلەۋدىڭ كەزەكتى باسپالداعى عانا بولعانى جاسىرىن ەمەس. رەفورماتور اسلان بەكەنۇلىنىڭ باستامالارىن ەسەپتەمەگەندە، الگى مينيستر جولداستاردىڭ نە ءبىتىرىپ، نە تىندىرعانى ەستەرىڭىزدە مە؟ ءاي، قايدام...

جاقىندا «radiotochka.kz» سايتى قازاقستاننىڭ ءبىلىم جانە عىلىم ءمينيسترىنىڭ كرەسلوسىنا سوڭعى بولىپ وتىرعان ەرلان ساعاديەۆتىڭ ءوزى جانە وتباسىنىڭ داۋلەتىن ەسەپتەپ شىعىپتى. ەرلان كەنجەعاليۇلى بۇل ورىنتاققا بار بولعانى اقپان ايىندا وتىرسا دا، قازىرگە دەيىن ەلباسى مەن ۇكىمەت الدىندا ءوزىنىڭ بەلسەندى رەفورماتور ەكەندىگىن دالەلدەپ ۇلگەرگەن.

بيوگرافيالىق انىقتامالىق:

ەرلان كەنجەعاليۇلى 1966 جىلى 29 قىركۇيەكتە دۇنيەگە كەلگەن.

1990 جىلى قازاق مەملەكەتتىك ۋنيۆەرسيتەتىن «ەكونوميست» ماماندىعى بويىنشا اياقتاپ، 1993 جىلى اقش-تىڭ ميننەسوتا شتاتىنداعى ميننەاپوليس ۋنيۆەرسيتەتىندە ماگيسترلىك ءبىلىم العان ء(مينيستردىڭ سول ۋنيۆەرسيتەتتەگى "جەتىستىكتەرى" تۋرالى الداعى ۋاقىتتا كەڭىرەك توقتالىپ، جازاتىن بولامىز).

عىلىمي دارەجەسى – عىلىم ماگيسترى.

ەڭبەك جولىن 1990 جىلى سىرتقى ىستەر مينيسترلىگىنىڭ قولدانبالى ەكونوميكا دەپارتامەنتىنىڭ حالىقارالىق ەكونوميكالىق قاتىناستاردى دامىتۋ جونىندەگى ەكىنشى حاتشىسى لاۋازىمىنان باستاعان. دۇنيەجۇزىلىك بانكىنىڭ اۋىل شارۋاشىلىعى دەپارتامەنتىنىڭ احۋالىن تالداۋ جونىندەگى اسسيستەنتى، شىعىس ەۋروپا، تمد ەلدەرىنىڭ كۋراتورى بولعان (اقش، ۆاشينگتون ق.). 2003 جىلدان باستاپ 2009 جىلعا دەيىن «جاڭا تەحنولوگيالار. قازاقستان» اق-نىڭ ديرەكتورلار كەڭەسىنىڭ توراعاسى بولىپ، باس ديرەكتوردىڭ لاۋازىمىن اتقارعان. 2012-2013 جىلدارى قازاقستان رەسپۋبليكاسى پرەمەر-ءمينيسترىنىڭ كەڭەسشىسى قىزمەتىن اتقارعان. 2014 جىلدىڭ اقپان ايىنان تامىز ايىنا دەيىن قازاقستان رەسپۋبليكاسىنىڭ يندۋستريا جانە جاڭا تەحنولوگيالار ۆيتسە-ءمينيسترى بولدى. 2014 جىلدىڭ تامىز ايىندا قر ينۆەستيتسيالار جانە دامۋ ءمينيسترىنىڭ ورىنباسارى بولىپ تاعايىندالدى.
ەلىمىزدەگى حالىقارالىق IT ۋنيۆەرسيتەتى مەن حالىقارالىق بيزنەس ۋنيۆەرسيتەتىنىڭ نەگىزىن قالاعان.

سونىمەن قاتار، قازاقستاننىڭ دۇنيەجۇزىلىك ساۋدا ۇيىمىنا كىرۋىنە بايلانىستى باقىلاۋشى-ساراپشى قىزمەتىن قاتار اتقارادى.

اتا-اناسى:

اناسى – كىشكەنوۆا ناعيتاي ابىتايقىزى، ەكونوميكا عىلىمدارىنىڭ كانديداتى، دوتسەنت.

اكەسى – كەنجەعالي ابەنۇلى ساعاديەۆ،  ەكونوميكا عىلىمدارىنىڭ دوكتورى، پروفەسسور، 3-4 شاقىرىلىمداعى قر ءماجىلىسىنىڭ دەپۋتاتى. 1994-96 جىلدارى قازاقستان رەسپۋبليكاسىنىڭ ۇلتتىق عىلىم اكادەمياسىنىڭ پرەزيدەنتى بولعان. پاكىستان عىلىم اكادەمياسىنىڭ مۇشەسى، اق «مۋيت» IT-ۋنيۆەرسيتەتى ديرەكتورلار كەڭەسىنىڭ مۇشەسى. سونداي-اق، كەنجەعالي ابەنۇلىنىڭ نەمەرەسى – باۋىرجان ەربولۇلى دا اتالعان ۋنيۆەرسيتەتتىڭ ديرەكتورلار كەڭەسىنە مۇشە ەكەن (IT IT-ۋۆەرسيەتىنە باكالاۆردى وقىتۋ ءۇشىن جىلىنا مەملەكەتتەن 500 گرانت بەرىلەدى).

ايتپاقشى، «حالىقارالىق اقپاراتتىق تەحنولوگيالار ۋنيۆەرسيتەتى» مەن «حالىقارالىق بيزنەس ۋنيۆەرسيتەتى» (UIB), ەرلان ساعاديەۆتىڭ بالالارىنىڭ داۋلەتى ءام ساۋلەتىن كورسەتەدى. سونداي-اق، اق «مۋيت» - «زەرتتەۋ جانە جوبالاۋ ينستيتۋتى» بولىمشەلەرىنەن تۇسەتىن سالىق 132 مىڭ مەن 161 مىڭ تەڭگەنىڭ توڭىرەگىنەن اسپايدى.

ال جاڭاعى ايتىپ وتىرعان مۋيت «نۇرسۇلتان نازارباەۆ اتىنداعى ءبىلىم قورىنىڭ» ەنشىلەس ۇيىمى بولىپ تابىلادى (2004.04.13) جانە UIB-consulting جشس رەتىندە اففيليرلەنگەن.

اتالعان جشس-ءنىڭ جىلدىق سالىق تولەمدەرىنىڭ كەستەسى تومەندەگىدەي:

2010 ج. – 316 مىڭ.

2011 ج. – 322 مىڭ.

2012 ج. – 608,9 مىڭ.

2013 ج. – 582,6 مىڭ.

2014 ج. – 738 مىڭ.

2015 ج. – 0,00 تگ.

2015 جىلدىڭ قورىتىندىسى بويىنشا 0,00 تەڭگە سالىق تولەگەن اتالعان جشس-ءنىڭ نەگىزىن قالاۋشى دەپ مينيستر ەرلان ساعاديەۆتىڭ اناسى – ناعيتاي كىشكەنوۆا كورسەتىلگەن. ونىڭ ءبىرىنشى ورىنباسارى – گۇلنارا نۇرمۇحانوۆا حانىم. گۇلنارا حانىم جوعارىداعى «نارحوزدىڭ» دا سەرىكتەس مۇشەسى رەتىندە تىركەلگەن ەكەن. بۇل بولات وتەمۇراتوۆتىڭ Fortebank-ءىنىڭ اففيليرلەنگەن قۇرىلىمى بولىپ سانالادى.

سونىمەن قاتار، ناعيتاي ابىتايقىزى – 2003 جىلى تىركەلگەن «بولاش» جشس-ءنىڭ سەرىكتەسى ەكەن. بۇل سەرىكتەستىك – جىلجىمايتىن مۇلىك ساۋداسىمەن جانە ءتۇرلى تاۋارلار تاسىمالداۋمەن اينالىسادى.

ەرلان ساعاديەۆتىڭ شەشەسى باسقارىپ وتىرعان ەكىنشى جشس-ءنىڭ جىلدىق سالىقتىق تولەمدەرىنىڭ كەستەسى:

2010 ج. – 422 مىڭ.

2011 ج. – 469,5 مىڭ.

2012 ج. – 415,7 مىڭ.

2013 ج. – 456,1 مىڭ.

2014 ج. – 460,1 مىڭ.

2015 ج. – 460,6 مىڭ تەڭگە.

سونىمەن قاتار، ءمينيستردىڭ ماماسىنىڭ مەنشىگىنە «حالىقارالىق بيزنەس ۋنيۆەرسيتەتىنىڭ» جارتى اكتسياسى تيەسىلى ەكەن. جشس 2010 جىلدان بەرى قاراي مەملەكەت قازىناسىنا 1 677 089,3 مىڭ تەڭگە سالىق تولەگەن.

باۋىرى – نۇرلان كەنجەعاليۇلى ساعاديەۆ - ILS edutainment جشس نەگىزىن قالاۋشى جانە مەنشىك يەسى.

اتالعان جشس ەڭ سوڭعى رەت وسىدان التى جىل بۇرىن 2010 جىلى 613,6 مىڭ تەڭگە جانە 2011 جىلى 230,1 مىڭ تەڭگە سالىق تولەپتى. ودان كەيىن بەس جىل ۋاقىت وتسە دە بيۋدجەتكە ءبىر تيىن دا اۋدارىلماعان.

مينيستر مىرزانىڭ ەكىنشى باۋىرى – ەربول كەنجەعاليۇلى – 2009 جىلى لوگيستيكا جانە ساتۋمەن اينالىساتىن «سك-فارماتسيا» جشس-ءنىڭ ديرەكتورى بولىپ تاعايىندالعان.

ساعاديەۆتەر وتباسىنىڭ داۋلەتى قىسقاشا ايتقاندا وسىنداي.

ال قازاقستان بىلىمىنە استاڭ-كەستەڭ رەۆوليۋتسيا جاساۋعا تالاپتانىپ جۇرگەن مينيستر ەرلان ساعاديەۆتىڭ ەسىمى وتكەن جولعى پاناما وفشورلارىنىڭ تىزىمىنەن ءبىر-اق شىققان ەدى.

شەتەلدە اقشا جاسىرعانى اشكەرەلەنگەننەن كەيىن ول كەزدە بيزنەسپەن شۇعىلدانعانىن ايتىپ اقتالعان  ميريستر ءوزىنىڭ شەتەلدىك كومپانيالارداعى اكتسيالارىن تۇگەلدەي ساتىپ جىبەرگەنگە ۇقسايدى. قازىر ول مينيسترلىكتەن وزگە ەشبىر كاسىپ كوزى جوق ەكەنىن ايتىپ ءجۇر.

نۇرزات توعجان

Abai.kz