جالپى انىقتاماسى وتە قاراپايىم ءارى تۇسىنىكتى: بلوگ – ونلاين كۇندەلىك. بلوگەر – كۇندەلىك جۇرگىزۋشى. ادەتتەگى كۇندەلىكتەن ايىرماسى – جاريالىلىعى. بىراق، قازىرگى بلوگ، بلوگەر دەگەن تۇسىنىك بۇل انىقتاما شەڭبەرىنە سىيمايدى. تۇپكىلىكتى ءارى ناقتى انىقتاما بەرۋ قيىن. ويتكەنى، ەڭ باستى ماسەلەسە بىزدەگى بلوگ، بلوگەردىڭ دەگەننىڭ تۇسىنىكسىزدىگى.

wordpress بلوگپلاتفورماسى

اۋەلدە ءارتۇرلى ماماندىق يەلەرى، نەگىزىنەن جاستار  wordpress بلوگپلاتفورماسىندا بلوگ اشىپ، جۇرگىزە باستادى. ۋاقىت وتە كەلە، بۇل ونلاين ورتاعا اينالىپ، جاستاردىڭ الاڭىنا اينالدى. ءسويتىپ، بلوگەرلەر الماتىدا ءبىرىنشى كەزدەسۋلەرىن وتكىزدى. بۇل – جاستاردىڭ ارالاسۋىنا، ءبىر-ءبىرىن تانۋىنا، ءوز ويلارىن، قىزىعۋشىلىقتارىن ورتاعا سالىپ، تالقىلاۋىنا قولايلى وراي بولدى. كەيىننەن بۇل الاڭعا ءدىني توپتار دا كىرىپ، اقىرى wordpress جابىلدى. ءسويتىپ، بلوگەرلەر باسقا پلاتفورمالارعا كوشە باستادى.

الەۋمەتتىك جەلى

كەيىن الەۋمەتتىك جەلىلەر ونىڭ ىشىندە فەيسبۋكتىڭ قولدانىس اياسى كەڭ تاراعان كەزدە بلوگ دەگەن نە، بلوگەر دەگەن كىم دەگەن نارسە تۇسىنىكسىز بولىپ كەتتى. الەۋمەتتىك جەلى قولدانۋشىلارىنىڭ ءبارىن بلوگەر دەۋگە كەلمەيدى. ەندەشە، قازىرگى بلوگەر كىم، بلوگ نە – جاۋاپ بەرۋ قيىن.

ايماقتار جانە بلوگەرلەر

بىراق، وزدەرىن «بلوگەرلەر» دەيتىن توپتى ايماقتىق جانە ورتالىق بيلىك ولاردىڭ ينتەرنەتتەگى بەلسەندىلىكتەرىنە قاراپ، پايدالانا باستادى. ياعني، بلوگتۋرلار ۇيىمداستىرۋ ارقىلى ايماقتىڭ الەۋمەتتىك-ەكونوميكالىق دامۋىن كورسەتۋدىڭ ارزان ءارى قولجەتىمدى جولىنا اينالدىردى. جانە بلوگقۇرىلتايلار وتكىزە باستادى. بۇل دا جەرگىلىكتى بيلىك جۇمىسىنىڭ جارناماسىنا تاپتىرمايتىن ءتاسىل. ەڭ باستىسى، ارزان. باعا ماسەلەسىندە بلوگتۋرلار مەن بلوگقۇرىلتايلارعا جەرگىلىكتى بيۋدجەتتەن قانشا قارجى بولىنەتىنى، ول قالاي جۇمسالاتىنى، قاراجاتتىڭ قانشالىقتى اقتالاتىنى بەلگىسىز. ال، بلوگەرلەر جۇمىسىنىڭ بار ناتيجەسى الەۋمەتتىك جەلى لەنتاسىن سۋرەتتەر، قىسقا جازبالارمەن تولتىرۋ ءارى كوپتەپ ءبولىسۋ.

بلوگقۇرىلتايلار

ال، بلوگقۇرىلتاي نە ءۇشىن، قانداي ماقساتتا ۇيىمداستىرىلاتىنى تۇسىنىكسىز. ءبىزدىڭ بىلۋىمىزشە، باستى نارسە ايماق جارناماسى بولسا كەرەك. قۇرىلتايدىڭ الدىندا قويعان بەلگىلى ءبىر ناقتى ماقساتىندا كورۋ قيىن. ماسەلەن، وسى كۇندەرى تارازدا ءوتىپ جاتقان بلوگقۇرىلتايدا ءسوز بولىپ، تالقىلانىپ جاتقان دۇنيەلەرگە قاراساڭىز، ماڭىزدى ەشنارسە كورە المايسىز. ياعني، قۇرىلتايدىڭ ءوزى سياقتى ونىڭ مازمۇنى دا تۇسىنىكسىز.

ءدىني توپتار جانە بلوگەرلەر

و باستان تەرىس اعىمداعى ءدىني توپتار ءوز يدەولوگيالارىن تاراتۋدىڭ توتە جولى رەتىندە ينتەرنەتتى، الەۋمەتتىك جەلىنى، ءتۇرلى بلوگپلاتفورمالاردى جاقسى پايدالانىپ كەلەدى. ولار بلوگقۇرىلتايلاردا دا بوي كورسەتەدى. بلوگقۇرىلتايلارعا كوبىنە ادەتتە، قازاق ءباسپاسوزىن كەلەكە ەتىپ، وزدەرىن ءداستۇرلى باسپاسوزگە باسەكە كورەتىن، ينتەرنەت قولدانۋ ءتارتىبى مەن ەتيكاسىن ساقتاي بەرمەيتىن جاستار قاتىساتىنىن ەسكەرسەك، بۇل ءدىني اعىمدارعا قاتارىن كوبەيتۋدىڭ توتە جولى. ارينە، قاتىسۋشىلاردىڭ دەنى سونداي ادامدار دەۋگە بولمايدى. ولاردىڭ ىشىندە جۋرناليستتەر دە بار. كوپتەگەن ءدىني سايتتار بۇعاتتالعاننان بەرى الەۋمەتتىك جەلىلەر مەن بلوگتۇعىلار دا ءدىني پيىعىلىن جاسىرعان قولدانۋشىلار كوبەيدى. ءارى ولار بلوگەرلەردىڭ دە اراسىندا بارشىلىق. ادەتتە، ولار اسىرەبيلىكشىل، اسىرەمەملەكەتشىل بولىپ كورىنەدى. ءبىر ايتا كەتەرلىگى، كەيىنگى جىلدارداعى بلوگقۇرىلتايدى وتكىزۋدى ءدىني توپتار قولعا الا باستاعانداي...

اقشا، تاۋار جانە بلوگەر

وبلىستار بلوگقرىلتاي ارقىلى ءوز جۇمىستارىن كورسەتۋگە تىرىسسا، بيزنەس سالاسى دا بلوگەرلەر ارقىلى تاۋار جارناماسىن جاساۋعا تىرىسادى. بىراق، بيزنەس وكىلدەرى، كومپانيالار ورىس تىلىندە جازاتىن بلوگەرلەردىڭ قىزمەتىنە كوپ جۇگىنەدى. ال، قازاق ءتىلدى بلوگەر ازىرگە بيلىكتىڭ تاپسىرىسىن ورىنداۋدان ارىگە بارا الماي وتىر.

بۇل جەردە قازاق بلوگەرلەرى ينتەرنەت كاسىپ جاساۋعا تالپىنىپ جۇرگەنىندە ايتقان ءجون. بىراق، ولار ۆەب-سايت جاساۋ، جۇرگىزۋ جانە ينتەرنەتتىڭ جاڭا دۇنيەلەرىن ۇيرەتۋ ترەنينگتەرىمەن عانا شەكتەلىپ وتىر.

ورىس جانە قازاق تىلىندەگى بلوگەرلەردىڭ ايىرماشىلىعى بارشىلىق. ماسەلەن، ورىس ءتىلدى بلوگەرلەر كومپانيالاردىڭ ۇلكەن جوبالارىن ناسيحاتتايدى ءارى بلوگناسيحاتتى ءداستۇرلى باسپاسوزبەن شەندەستىرمەيدى. ال، قازاق بلوگەرلەرى كوپ جاعدايدا جۋرناليستتەرمەن «جاعالاسقاندى» ءارى ولارعا ينتەرنەت قولدانۋدا «ۇستاز» بولعىسى كەلىپ، قالاي دا جەكە تۇلعاسىن كورسەتۋدى كوبىرەك كوزدەيدى.

ءتۇيىن

قورىتا كەلگەندە، بلوگ – ينتەرنەت قۇرال. ال، قازىرگى بلوگەرلەر ۇساق-تۇيەك دۇنيە جازۋدان اسا الماي وتىر. بلوگقۇرىلتاي ول – بيلىكتىڭ ينتەرنەت قۇرالدى ءوز قىزمەتى مەن جۇمىسىنا پايدالانۋى دەۋگە بولادى.

Abai.kz