پرەزيدەنت نۇرسۇلتان نازارباەۆ الماتى وبلىسىندا ءىس ساپارمەن ءجۇر. ءىس ساپار بارىسىندا مەملەكەت باسشىسى  وڭىردەگى اتقارىلعان ءام اتقارىلاتىن ىستەرمەن تانىسىپ، وبلىس باسشىلارىنا بىرقاتار تاپسىرمالار بەردى.

اتالعان ساپار بارىسىندا مەملەكەت باسشىسى پانفيلوۆ اۋدانىنا ارنايى ۇشىپ بارىپ، شەكارا ماڭىندا بوي كوتەرىپ كەلە جاتقان «نۇركەنت» قالاسىنىڭ قۇرىلىس جۇمىستارىن ءوز كوزىمەن كوردى.

قازاقستان مەن قىتاي شەكاراسىنىڭ بويىندا ورنالاسقان جاڭا قالا «نۇركەنت» دەپ اتالاتىن بولدى. بۇل شاھار الماتى وبلىسى پانفيلوۆ اۋدانىنا قاراستى قورعاس شەكارا بەكەتىنىڭ ماڭىنا جاقىن ىرگە تەپكەندىكتەن  «قورعاس-شىعىس قاقپاسى» ەكونوميكالىق ايماعىنىڭ قۇرامىنا كىرەدى ەكەن.

جالپى اۋماعى 300 گەكتار جەردى قۇرايتىن «نۇر قالادا» بولاشاقتا شامامەن 100 مىڭ ادام تۇراتىن  بولادى. اتالعان جوبانىڭ قۇرىلىسى 2020 جىلى اياقتالۋى ءتيىس.

ارينە، ءبىز، جالپى قازاق حالقى، جاڭا قالانىڭ نۇركەنت اتانۋىنا قارسى ەمەسپىز. قۇلاققا دا جاعىمدى ەستىلەدى. تاريحي جاركەنت قالاسىنىڭ قاسىندا تاۋەلسىزدىكتىڭ قالاسى نۇركەنت بوي تۇزەپ جاتسا، تەك قۋانامىز. بۇل – ىرگەدەگى قىتاي ەلىنە دە سەس. قىسقاسى: تاريحى سان عاسىردىڭ سىرىن اشاتىن جاركەنتتىڭ جانىندا تاۋەلسىزدىكتىڭ جارشىسى بولىپ، كەشەگى مەن بۇگىنگىنى ساباقتاستىرار جاڭا قالا سالىنىپ جاتىر. بارەكەلدى دەلىك!

وسى "نۇركەنت" دەگەننەن شىعادى... وتكەن جىلى ەلىمىزدىڭ ەڭ باي ساۋداگەرى نۇرلان سماعۇلوۆ (مەگا ساۋدا ورتالىقتارىنىڭ قوجايىنى) ەكسپو-عا ارنالعان  ءبىر جيىندا مەملەكەت باسشىسىمەن جۇزبە-ءجۇز كەزدەسكەنى بار ەدى. سول جۇزدەسۋ بارىسىندا حالىقارالىق كورمە تەرريتورياسىندا سالىنىپ جاتقان ءزاۋلىم عيماراتتىڭ اتاۋىنا كەلگەندە سماعۇلوۆ بىردەن «نۇر پلازا» دەپ اتاۋدى ۇسىنعان. ساۋداگەردىڭ ۇسىنىسىن ۇناتا قويماعان ەلباسى: «مۇندايدى قويىڭدار، بۇلاي جاعىمپازدانۋدى قايدان ۇيرەنگەنسىڭ-ەي!» دەگەندە سماعۇلوۆ تا ساسپاي:ء«ومىر ۇيرەتتى، نۇرسۇلتان ءابىشۇلى» دەپ جاۋاپ قايتارعان-تىن.

راس، ەلباسى قيت ەتكەن نارسەگە «نۇر»-دى جالعاپ، «جۇرتتىڭ ىعىرىن شىعارماڭدار» دەسە دە، ءبىزدىڭ اكىم-قارالار «نۇرلى جەر» باعدارلاماسىن قابىلداپ، «نۇركەنت» قالاسىن سالىپ، العان بەتتەرىنەن تانار ەمەس. جاركەنتتىڭ ىرگەسىندەگى جاڭا قالانى جاڭا-جاركەنت دەپ اتاسا دا، ەشكىم قارسى بولماس ەدى دەپ ويلايمىز وسىندايدا. الايدا، قالا اتاۋى "نۇركەنت" اتالعان ەكەن. ەندەشە "نۇركەنتىمىز" نۇرلانا بەرسىن. قورعاس كەدەن بەكەتىنەن تاياق تاستام جەردە شىمقاي قىزىل تۇسكە بويانىپ بوي كوتەرگەن قىتايدىڭ "قورعاس" قالاسىنان قالىپ قويماي وركەندەپ-وسە بەرسىن.

نۇرگەلدى ابدىعانيۇلى

Abai.kz