2016 جىلعى قر ادەبيەت جانە ونەر سالاسىنداعى مەملەكەتتىك سىيلىعىن بەرۋ جونىندەگى كوميسسيا مۇشەسى (اتى-ءجونىن اتاماۋدى وتىنگەن): «جازۋشى راحىمجان وتارباەۆتىڭ «شىڭعىس حاننىڭ كوز جاسى» اتتى حيكايات جانە اڭگىمەلەر جيناعى ىرىكتەۋ كەزەڭىنەن وتپەي قالعان، – دەيدى، – سوعان ىزالانعان ول ارنايى سۇحبات ۇيىمداستىرىپ، قازاقتىڭ كلاسسيك قالامگەرلەرى مەن ولاردىڭ الدەقاشان وقىرمانداردىڭ ىقىلاسىنا بولەنگەن شىعارمالارى تۋرالى تومەن باعا بەرگەن. 

ءتىپتى «بابالار ءسوزى» اتتى 100 تومدىق قازاق حالقىنىڭ فولكلورلىق باي مۇراسىن دا مانسۇقتاعان. تەك جازۋشى ب.نۇرجەكەەۆتى عانا «مويىنداۋى» – ونىڭ مەملەكەتتىك سىيلىققا يە بولۋ ىقتيمالدىعى جوعارى ەكەنىنە كوزى جەتكەندىكتەن»، – دەيدى. سونداي-اق كوميسسيا مۇشەسى: «ر.وتارباەۆتىڭ قر مادەنيەت جانە سپورت ءمينيسترى ا.مۇحامەديۇلىنا تيىسكەنى – ەرتەڭگى كۇنى سىيلىقتان قاعىلعان سەبەبىن وسى قىلىعىمەن بايلانىستىرعىسى كەلەتىن پەندەشىلىك نيەتىنەن»، – دەيدى. 

ەستەرىڭىزگە سالا كەتەيىك، راحىمجان وتارباەۆ 7 قىركۇيەك كۇنى «ادەبيەت پورتالىنا» سۇحبات بەرگەن ەدى. وندا ايتقان ويلارى وقىرماندار مەن جالپى حالىقتىڭ كوپ بولىگىنىڭ نارازىلىعىن تۋدىردى. 

سۇحباتتا اباي، م.اۋەزوۆ، «بابالار ءسوزى»، ءا.كەكىلباەۆ، و.بوكەي، ت.الىمقۇلوۆ، م.ماعاۋين، ءو.نۇرعاليەۆ، ا.سۇلەيمەنوۆ تۋرالى جاعىمسىز پىكىر بىلدىرگەنى ءۇشىن، بىر توپ وقىرمان جازۋشىنىڭ مەملەكەتتىك سىيلىققا ۇسىنىلعان «شىڭعىس حاننىڭ كوز جاسى» كىتابىن ورتەدى. 

ولار: «ادەبيەتتەگى ۇلى تۇلعالارىمىزدىڭ اتىنا كۇيە جاعىپ، شىعارمالارىنا قىزعانىشپەن، كۇنشىلدىكپەن بىرجاقتى پىكىر بىلدىرگەنى ءۇشىن ر.وتارباەۆقا نارازىمىز! بۇدان كەيىن دە حالىق ءوز يدەالدارىن قورعاۋ، قولداۋ ماقساتىندا كەز كەلگەن جاعىمسىز ارەكەتكە توزبەۋ كەرەك! «ادەبيەت – اردىڭ ءىسى»، ونى ساۋداعا سالۋعا بولمايدى. كوز جۇما قاراماۋ كەرەك! ر.وتارباەۆ ارزان اتاق الىپ، اتىن شىعارۋ ءۇشىن «جەر ورتەدى»، ال ءبىز ونىڭ كىتابىن ورتەيمىز! تەك ءوزىمىز ءۇشىن عانا ەمەس، اتا-بابالارىمىزدىڭ، مارقۇم بولعان قالامگەرلەردىڭ رۋحىن باسىندىرماۋ ءۇشىن دە شاراسىزدان وسىنداي وعاش ارەكەتكە بارىپ وتىرمىز»، – دەيدى. 

اداسقاق تورتاي، جۋرناليست 

Abai.kz