وسىدان ءبىراز بۇرىن، جاڭا وقۋ جىلى باستالعاننىڭ قارساڭىندا ءماجىلىس دەپۋتاتى ايقىن قوڭىروۆ مەكتەپتەردە «باستاۋىش اسكەري دايىندىق» ء(باد) ءپانى مۇعالىمدەرىنىڭ 10-11 سىنىپ وقۋشىلارىن جازدىق-قىستىق  اسكەري فورمالار الۋعا ماجبۇرلەگەندىگىن ايتىپ دابىل كوتەرگەن. باعاسى 50-60 مىڭ تەڭگەدەن كەم بولمايتىن مۇنداي كيىمدەردى الۋعا كوپتەگەن اتا-انالاردىڭ جاعدايى كەلە بەرمەيتىنىن ايتقان دەپۋتات ونداي اسا قاجەت بولسا بولاشاق جاۋىنگەرلەرى ءۇشىن قورعانىس مينيسترلىگى وزدەرى اپەرسىن نەمەسە ءبىلىم جانە عىلىم مينيسترلىگى ارنايى قاراجات ءبولسىن دەپ ماسەلەنى تىكەسىنەن قويعان ەدى.

بۇل مىڭداعان اتا-انانىڭ ويىنان شىعىپ،  باق تا ءۇن قوسىپ، ماسەلە كوتەرىپ جازعان بولاتىن. سول ساۋالعا جۋىردا ەكى مينيسترلىكتەن دە  جاۋاپ كەلىپتى. اسكەري ادامدارعا ءتان دالدىكپەن قورعانىس ءمينيسترى س.جاسۇزاقوۆ: «مەكتەپتەرگە اسكەري دايارلىق ساباقتارى ءۇشىن ارنايى كيىم الۋ قاجەتتىلىگى تۋرالى ەشقانداي نۇسقاۋلار بەرىلگەن جوق. قورعانىس مينيسترلىگىنىڭ بيۋدجەتىندە وقۋشىلارعا اسكەري كيىم الۋ جونىندەگى شىعىستار كوزدەلمەگەن»  دەپ ناقتى، قىسقا-نۇسقا جاۋاپ بەرىپتى.

ال بعم مينيسترلىگىنەن كەلگەن جاۋاپ كوپ سوزدىلىكپەن جارىسقا تۇسكەندەي ءبىراز نارسەنى ەزگەن ەكەن. سونىڭ ىشىندە ءباد ءپانىن وفيتسەرلەر، پراپورششيكتەر، قاتارداعى ساربازدار مەن سولداتتاردىڭ ارقايسىسى قانشا پايىزدان وقىتاتىنىنا دەيىن كورسەتىپتى. ال اسكەري كيىمگە قاتىستى سوزبە-ءسوز كەلتىرسەك بىلاي دەلىنگەن: «قازىرگى ۋاقىتتا ءبىلىم مەن قورعانىس سالاسىنداعى قولدانىستاعى زاڭناما مەن نورماتيۆتىك قۇقىقتىق اكتىلەردە ءباد ساباقتارىندا ارنايى كيىم كيۋ ماسەلەسى رەتتەلمەگەن. وسىعان بايلانىستى ءباد ساباقتارىندا ارنايى اسكەري كيىم كيۋ مىندەتتى ەمەس».

جۇرتتى دۇرلىكتىرىپ، اسكەري كيىم تالاپ ەتىپ جۇرگەندەر ءباد-ءتى وقىتاتىن جاڭاعى پراپورششيكتەر مەن سولداتتار بولىپ شىقتى... وندايلار «شاش ال دەسە باس الاتىن» جامان مىنەزدەرىن مەكتەپكە دە اكەلگەن سياقتى. ايتەۋىر ماسەلە اياعىنا جەتتى، حالىق كيىم الادى ەكەنبىز دەپ ۋايىمداماۋىنا بولادى.

سەرىك ەلەۋ، ساراپشى  

Abai.kz