قازان ايىنىڭ سوڭىندا ەكسپو مامانداندىرىلعان كورمەسىنىڭ بارلىق پاۆيلوندارى تاپسىرىلادى. قۇرىلىس جۇمىستارى 100 پايىزعا اياقتالعان. بۇل تۋرالى بۇگىن «استانا ەكسپو-2017» ۇلتتىق كومپانياسى» اق حالىقارالىق قاتىسۋشىلارمەن جۇمىس دەپارتامەنتىنىڭ باسشىسى يليا ورازاقوۆ ايتتى، دەپ حابارلايدى Baq.kz ءتىلشىسى.

«كەلەسى جىلى استانادا وتەتىن ەكسپو كورمەسىنە 110 مەملەكەت قاتىساتىنا ەشقانداي كۇمانىمىز جوق. ءالى دە قاتىسۋشىلارعا ءوتىنىش بەرۋگە ۋاقىت بار. تىركەۋ جۇمىستارى جالعاسىپ جاتىر. بۇگىنگى تاڭدا رەسمي تۇردە 104 قاتىسۋشى ءوز وتىنىشتەرىن بەردى. وسى رەتتە، مەن ءبىر قىزىقتى دەرەكتى ايتا كەتەيىن. ەگەر قازاقستانداعى ەكسپو كورمەسىنە 110 مەملەكەت قاتىساتىن بولسا، ۇزدىك ۇشتىكتىڭ قاتارىنا ەنەمىز. سەبەبى، بۇعان دەيىنگى كورمەلەردە 110-نان كوپ قاتىسۋشىسى بولعان ەكى عانا كورمە بار. ءبىرىنشىسى – پورتۋگاليا. پيرەنەي تۇبەگىندە وتكەن كورمە جۇمىسىنا 140 مەملەكەت قاتىسقان. ال ەكىنشى ورىنداعى قىتايداعى كورمەگە 121 مەملەكەت كەلگەن. سوندىقتان قازاقستاننىڭ بۇل جاعىنان «قولا جۇلدە» الۋعا مۇمكىندىگى بار»، – يليا ورازاقوۆ.

ونىڭ ايتۋىنشا، ۇلتتىق كومپانيا قازىرگى كەزدە ءاربىر قاتىسۋشىعا قولداۋ ءبىلدىرۋ ماقساتىندا كوپتەگەن جۇمىستار ىستەپ جاتىر ەكەن.

«بۇل كوزگە كورىنبەيتىن جۇمىس. دەپارتامەنت كۇن سايىن قاتىسۋشىلارعا قولداۋ كورسەتەدى. ارقايسىنا جەكە-جەكە كوڭىل ءبولۋ كەرەك. ءاربىر مەملەكەتتىڭ ءوز جوسپارى، تاپسىرماسى بار. وسى كورمە اياسىندا بەلگىلى ءبىر جەتىستىكتى باعىندىرۋدى كوزدەيدى. سوندىقتان «استانا ەكسپو» كومپانياسى ديپلوماتيالىق قارىم-قاتىناستان بولەك، ءاربىر قاتىسۋشىمەن جەكە دە جۇمىس ىستەپ جاتىر. ءبىز قاتىسۋشىلارمەن ارىپتەستىك، دوستىق جانە كاسىبي بايلانىس ورناتۋدى كوزدەيمىز»، – دەپ اتاپ ءوتتى ۇلتتىق كومپانيا وكىلى.

دەپارتامەنت باسشىسىنىڭ مالىمەتى بويىنشا، كورمەگە قاتىسۋشىلاردىڭ ءۇش اي بويى اتقاراتىن جۇمىستارىنىڭ كۇنتىزبەسى جاسالىپ جاتىر.

ايتا كەتەيىك، ەكسپو مامانداندىرىلعان كورمەسىنىڭ قۇرىلىس جۇمىستارى تولىقتاي دەرلىك اياقتالعان. قازان ايىنىڭ سوڭىندا بارلىق پاۆيلوندار تولىعىمەن تاپسىرىلادى.

Abai.kz