«جەر تاقىرىبىن جەلەۋ ەتكەن ميتينگ اتىراۋدا مامىردىڭ 21-ءى كۇنى ءوتۋى ءتيىس بولدى. الدىن-الا قۇرىلعان ستسەناري بويىنشا، حالىق «يساتاي-ماحامبەت» الاڭىندا قاجەت بولسا، اپتالاپ تۇرۋى كەرەك ەدى. جانە ولاردى  ۋاقىتشا شاتىرلارمەن، تاماقپەن قامتاماسىز ەتۋ ءۇشىن قارجى دا ءبولىنىپ قويىلعان. تالعات ايانوۆ قاجەتتى قارجىنى وڭتۇستىك قازاقستان وبلىسىنداعى دەمەۋشىلەرىنىڭ جەتكىزگەنىن اشىپ ايتتى» دەپ مالىمدەدى كۋاگەر ر. كيبراەۆ، اتىراۋدا ءوتىپ جاتقان اتىشۋلى ماكس بوقاەۆ پەن تالعات ايانوۆقا قاتىستى سوت بارىسىندا.  

ر.كيبراەۆ

الماتى قالالىق سوتىنان بەينەبايلانىسقا شىققان كۋاگەر ر. كيبراەۆتىڭ ايتۋىنشا، بۇگىندە ءىستى بولىپ جاتقان تالعات ايانوۆ مامىر ايىنىڭ باسىندا الماتىعا ارنايى ساپارلاپ بارعان. «تالعاتتى ءبىراز ۋاقىتتان بەرى بىلەمىن. ەكەۋمىز دوستىق قارىم-قاتىناستامىز. الماتىعا كەلگەن ۋاقىتتا ول ءتورت-بەس كۇندەي مەنىڭ ۇيىمدە جاتتى. دوس بولعان سوڭ، سىرا ىشەمىز، پىكىرلەسەمىز. سول كەزدە ول  مامىردىڭ 21-ءى كۇنى اتىراۋدا شەرۋ ءوتۋى ءتيىس ەكەندىگىن قاداپ ايتتى. ستسەناري بويىنشا، تولقۋ ۇزاققا سوزىلۋى كەرەك بولدى» دەگەن كۋاگەر كيبراەۆ، تالعات ايانوۆتىڭ دەمەۋشىلەردەن جەتكەن «سالەمدەمەنىڭ» جارتى بولىگىن، (مەملەكەتتىك ايىپتاۋشى تاراپتىڭ مالىمەتىنشە، اڭگىمە 50 مىڭ اقش دوللارى تۋرالى) ورتاق تانىستارى م. ەسىلباەۆقا  ساقتاۋ ءۇشىن بەرگەنىن ايعاقتادى.

ونىڭ ايتۋىنشا، ايانوۆ ەكەۋى الدىمەن سەمەيدەن كەلگەن م. ەسىلباەۆقا بارادى. «ول كەزدە ەسىلباەۆ الماتىداعى «قازجول» قوناقۇيىنە توقتاعان ەدى. سوندا ءبىراز اڭگىمەلەسىپ، ساۋناعا باردىق. سىرا ءىشىپ، دەمالدىق. سول كەزدە دە ايانوۆ اتىراۋدا جوسپارلانعان شەرۋدى وتكىزۋ ءۇشىن، وعان وڭتۇستىك قازاقستان وبلىسىنىڭ ءمارت ازاماتتارىنىڭ دەمەۋشىلىك جاساپ وتىرعانىن تاعى ءبىر ايتىپ قالدى. جانە دە ءوزىنىڭ قۇقىق قورعاۋ ورگاندارىنىڭ كوزىنە ءتۇسىپ قالعانىنان سەكەمدەنەتىندىكتەن، دەمەۋشىلەر جولداعان اقشانىڭ ءبىر بولىگىن، بەيتاراپ ادامنىڭ قولىندا ساقتاي تۇرعىسى كەلەتىنىن ايتتى» دەدى ول.

بۇل فاكتىنى سول الماتى قالالىق سوتى ارقىلى بەينەبايلانىسقا شىققان كۋاگەر م. ەسىلباەۆ تا قۋاتتادى. «ماكس بوقاەۆپەن ۇزاق ۋاقىتتان بەرى تانىسپىن. ال، تالعات ايانوۆپەن مەنى جولداس جىگىتىم ر.كيبراەۆ ءوزىم توقتاعان «كازجول» قوناقۇيىندە تانىستىردى. ارامىزدا وربىگەن اڭگىمەگە قاراعاندا، الماتىعا ول بۇقارالىق، قوعامدىق سيپاتتاعى ءىس-شارالاردى وتكىزۋدەگى جەكە تاجىريبەسىمەن ءبولىسۋ ماقساتىندا كەلگەن ەكەن. جەر تاقىرىبىنا بايلانىستى اتىراۋدا شەرۋ وتەتىنىن ايتقان ول، ماعان قارا پاكەتكە ورالعان زاتتى ۇستاتتى. پاكەتتى اشىپ قاراعانىمدا، وندا بۋدا-بۋدا دوللار جاتتى. بىراق، ول اقشانى ساناۋدى قاجەت دەپ تاپپادىم. ءسويتىپ، اقشانى پاكەتىمەن قوسا، قوناقۇيدەگى نومىرىمدە قالعان تالعات ايانوۆتىڭ فۋتبولكاسىنا وراپ، ونى نوۋتبۋكتىڭ سومكەسىنە سالىپ قويدىم. ءتىنتۋ بولعانعا دەيىن اقشا سول كۇيىندە مەنىڭ ۇيىمدە جاتتى» دەدى ول.

ايانوۆتىڭ فۋتبولكاسىنىڭ ونىڭ نومىرىندە قايدان جۇرگەنىن دە كۋاگەر ەسىلباەۆ تاپتىشتەپ ايتىپ بەردى. ونىڭ سوزىنە قاراعاندا، تالعات ارا-تۇرا ەسىلباەۆتىڭ قوناقۇيدەگى نومىرىنە جۋىنىپ-شايىنۋعا كەلىپ تۇرعان. جولاۋشى ادامنىڭ مۇندايدا جولسومكەسىن دە تاستامايتىنى بەلگىلى. «كەيدە ول سومكەسىن مەنىڭ بولمەمە قالدىرىپ كەتىپ ءجۇردى. وسىنداي جاعدايدا فۋتبولكاسى مەنىڭ نومىرىمدە قالعان بولسا كەرەك» دەپ ناقتىلاپ قويدى ەسىلباەۆ.

ءبىر قىزىعى،  بارلىق فاكتىنى قولمەن قويعانداي ەتىپ ايتىپ بەرگەن كۋاگەرلەردەن نە سۇرارىن بىلمەي الاسۇرعان قورعاۋشى تاراپ سۇراق قويۋدان مۇلدە باس تارتتى. 

 اقپارات ايدىنىنا كەزەكتى رەت وسىنداي ادىسپەن قارماق تاستاعان قورعاۋشىلاردىڭ بۇل ارەكەتى، الدىن الا تالقىلانىپ قويعان تاكتيكاعا كوبىرەك ۇقساپ تۇردى.

تۇيىندەي كەلە ايتارىمىز، كيبراەۆ پەن ەسىلباەۆتىڭ كۋاگەرلىگى – تالعات ايانوۆ پەن ماكس  بوقاەۆتى ميتينگ ۇيىمداستىرۋعا، تولەشوۆتەن كەلگەن كوك قاعازداردىڭ يتەرمەلەگەنىن دالەلدەي ءتۇستى.

ء بىر قىزىعى، جارتىلاي بوس قالعان سوت زالى – بۇقارانىڭ بۇل ىسكە دەگەن قىزىعۋشىلىعىنىڭ مۇلدە جوعالعانىن بايقاتىپ وتىر. ءسوزىمىز دالەلدى بولۋى ءۇشىن، ماقالاعا جۋرناليستەرگە ارنالعان زالدان  تۇسىرىلگەن سۋرەتتەردى دە قوسا جولداپ وتىرمىز. جانە جۋرناليستەر قاتارىنىڭ دا سەلدىرەۋى دە ءوز الدىنا بولەك تاقىرىپ سياقتى...

ايتپاقشى، قورعاۋشى تاراپقا «اتوم بومباسىنداي» اسەر ەتكەن كيبراەۆ پەن ەسىلباەۆتىڭ كۋاگەرلىگىنەن كەيىن، سوت زالىندا ادۆوكاتتاردىڭ وتىنىشتەرى تىڭدالدى. ادۆوكاتتار اتىراۋدا وتكەن ميتينگىگە بوقاەۆتىڭ قاتىسى جوعىن دالەلدەيتىن كۋاگەرلەردى سوت زالىندا تىڭداۋدى ۇسىندى. سۋديا داۋلەشوۆا ۇسىنىلعان كۋاگەرلەردىڭ بوقاەۆتان جاۋاپ الىنعاننان كەيىن تىڭدالاتىنىن ايتتى. مىنە، وسى ءبىر عانا فاكتى – سوتتىڭ قوس تاراپقا دا تولىق مۇمكىندىك بەرىپ جاتقانىن كورسەتەدى.

ايتپاقشى، كيبراەۆ پەن ەسىلباەۆتىڭ كۋاگەرلىگىن تىڭداعىسى كەلمەگەن بوقاەۆ پەن ايانوۆ سوت پروتسەسىنە قاتىسقان جوق. 

كەمەل قاراسارتوۆ

Abai.kz