قازاق ونەرى ورنى تولماس اۋىر قازاعا دۋشار بولدى. 101 جاسقا قاراعان شاعىندا ايگىلى اكتريسا، قازاق تەاتر ونەرىنىڭ التىن بۋىنىنىڭ ءىرى وكىلى حابيبا ەلەبەكوۆا دۇنيە سالدى.

حابيبا قاراقبايقىزى 1935 جىلدان بەرى قازاق تەاتر ونەرىنە تالماي قىزمەت ەتتى. ول تەاتردa ۇلتتىق بوياۋى قانىق، رۋحاني قۇنارى مول تالاي وبرازداردى سومدادى. كينو ونەرىندە دە ءوز قولتاڭباسىن قالدىردى.

مارقۇمىن وتباسىنا، تۋعان-تۋىستارىن، شاكىرتتەرىنە قايعىرىپ كوڭىل ايتامىز!

حابيبا قاراقبايقىزىن اقتىق ساپارعا شىعارىپ سالۋ، قوشتاسۋ ءراسىمى 20 قازان كۇنى ساعات 10-دا م.اۋەزوۆ تەاترىندا وتەدى.

حابيبا ەلەبەكوۆا 

ەلەبەكوۆا حابيبا قاراقبايقىزى، قازاقستاننىڭ ەڭبەك سىڭىرگەن ءارتيسى، «مادەنيەت ۇزدىگى» توسبەلگىسىنىڭ يەگەرى.

1916 ج. قاراعاندى وبلىسى، قارقارالى اۋدانى، تومار اۋىلىندا  دۇنيەگە كەلگەن.

1934-35 ج ج.  قارقارالى حالىق تەاترىندا قىزمەت ىستەگەن.

1935-37 ج ج.  م. اۋەزوۆ اتىنداعى دراما تەاتر  جانىنداعى ەكى جىلدىق ستۋديانى بىتىرگەن.

1935 ج. بەرى م. اۋەزوۆ تەاترىندا ۇزىلىسسىز قىزمەت ەتتى.

حابيبا قاراقبايقىزى قازاقتىڭ تۇڭعىش كاسىبي تەاتر رەجيسسەرى ج. ءشانيننىڭ ءوزى جازىپ، ءوزى قويعان «ارقالىق باتىر» تاريحي دراماسىنداعى قاراكوزدەن باستاپ،  قارا شاڭىراق تەاتردا ۇلتتىق قۇنارى مول كوپتەگەن رول جاسادى.

ساحناداعى رولدەرى:

ۇلتتىق كلاسسيكا مەن زاماناۋي دراماتۋرگيادا: «ارقالىق باتىر» تاريحي دراماسىندا قاراكوز، م. اۋەزوۆتىڭ «قارا قىپشاق قوبىلاندىسىندا» كۇنىكەي، «ابايىندا» قانىكەي، ۇلجان، ب.ءمايليننىڭ «مايدانىندا» مامىق، ع. مۇسىرەپوۆتىڭ «قوزى كورپەش-بايان سۇلۋىندا» ماقپال، ش. قۇسايىنوۆتىڭ «مارابايىندا» ءمارياش، «امانگەلدىدە» اقجان، ق. امانجولوۆتىڭ «دوسىمنىڭ ۇيلەنۋىندە» ايعانىم، ا. تاسىمبەكوۆ پەن ق.ىسقاقتىڭ «كەبەنەك كيگەن ارۋلارىندا» تۇتقىن، ا. سۇلەيمەنوۆتىڭ «جەتىنشى پالاتاسىندا» كەمپىر، يران-عايىپتىڭ» «ەستايدىڭ قورلانىندا» ايناش ت.ب.

الەمدىك دراماتۋرگيادا: گ. لوركانىڭ «بەرناردا البانىڭ ۇيىندە» پونسيا، وستروۆسكيدىڭ «نايزاعايىندا» كەزبە ايەل، «تالانتتار مەن تابىنۋشىلارىندا» د. اندرەەۆنا، گوگولدىڭ «رەۆيزورىندا» پوشلەپكينا، «ۆەتنام جۇلدىزىندا» تحان، م. مەتەرلينكتىڭ «سوقىرلارىندا» سوقىر ايەل ت.ب.

ح. ەلەبەكوۆا ءبىراز كوركەم جانە دەرەكتى فيلمدەرگە ءتۇستى. ولاردىڭ ىشىندە ايگىلى رەجيسسەر س. قوجىقوۆتىڭ «ەگەر ءبىزدىڭ ارقايسىمىز…» (1961), سونداي-اق، اكتريسا تۇسكەن ەڭ سوڭعى فيلم د. جولجاقسىنوۆتىڭ ء«بىرجان سالىن» (2009) اتاۋعا بولادى.

ح. ەلەبەكوۆا ءوزىنىڭ ومىردەگى ءارى ونەر سەرىگى ج. ەلەبەكوۆ جانە حح عاسىرداعى قازاق ونەرى تۋرالى ء«ۇنى كەتپەس قۇلاقتان» (1981) كىتابىن جازدى، بۇل ەڭبەگى تولىقتىرىلىپ ء«ان-امانات» (1984) «قايران، جۇسەكەم» (1998) دەگەن اتاۋلارمەن قايتا باسىلدى. ۇلتتىق ونەر تاريحىن جاقسى بىلەتىن اكتريسا ءبىراز ءاننىڭ، مىسالى، ابايدىڭ «سەگىز اياعى»، ت.ب. اندەردىڭ تۇپنۇسقاسىندا جەتۋىنە ۇلكەن ەڭبەك ءسىڭىردى. كەۋدەسى التىن ساندىق، كونەكوز حابيبا اپا كوپ جىرلاردى، سونىڭ ىشىندە ماعجان جۇماباەۆتىڭ جىرلارىن تۇگەلدەي دەرلىك جاتقا  وقيتىن ەدى. 

قازاقستاننىڭ ەڭبەك سىڭىرگەن ءارتيسى (1976), قر مادەنيەت مينيسترلىگىنىڭ  «مادەنيەت ۇزدىگى» توسبەلگىسىمەن ماراپاتتالدى (2012).

«حابيبا ەلەبەكوۆا» اتتى كىتاپ (جوبا اۆتورى ءا. بوپەجانوۆا) «ايگىلى ادامدار» سەرياسىمەن «ونەر» باسپاسىندا جارىق كوردى (2012).

Abai.kz