بۇرىنعى اكىم، بۇرىنعى دەپۋتات، ءماجىلىستىڭ بۇرىنعى توراعاسى، ال، بۇل كۇندەرى رەسپۋبليكالىق ارداگەرلەر كەڭەسىنىڭ توراعاسى باقىتقوجا ىزمۇحامبەتوۆتىڭ ۇلى سالۋات باق ارقىلى كوپشىلىككە «اكەمدى مازالاي بەرمەڭىزدەر»، - دەگەن ءوتىنىش ايتىپ وتىر. «اكەمدى مازالاي بەرمەڭىزدەر، بارىنە مەن ءوزىم جاۋاپ بەرەمىن»، - دەيدى ول. سالاۋاتپەن nur.kz سايتىنىڭ ءتىلشىسى جولىعىپ، سۇحبات جاسادى.

ايتپاعىمىزدى وقىرماننىڭ جادىنا سالىپ قويعانىمىز ارتىق بولماس. وسىدان بىرەر اي بۇرىن «باقىتقوجا ىزمۇحامبەتوۆتىڭ ۇلىنا جار بولعانمىن» دەپ ايگەرىم ەسىمدى ايەل عالامتوردا ۇلكەن شۋ كوتەردى (سۋرەتتە). ىزمۇحامبەتوۆتىڭ ءىزباسارىنان اجىراسىپ كەتكەندىگىن جاريا ەتكەن ايگەرىم قازىر بالا-شاعاسىمەن الاقان جايىپ قالعانىن دا جاسىرماعان ەدى. «ىزمۇحامبەتوۆتىڭ نەمەرەلەرى تىلەنشىلىكپەن تىرشىلىك كەشىپ ءجۇر» دەگەندى سۋرەتىمەن قوسا عالامتور بەتىنە توعىتقان ايگەرىمنىڭ ءحالى ەستىگەن جۇرتتىڭ جاعاسىن ۇستاتقىزعان. ەندى مىنە، ءۇنسىز قاراپ وتىرا بەرمەۋ كەرەك دەپ شەشسە كەرەك، ايگەرىمنىڭ بۇرىنعى كۇيەۋى سالاۋات تا ءسوز الىپ وتىر.

تىلشىمەن سۇحبات بارىسىندا سالاۋات ءوزىن ۇستامدى، بايسالدى ادام رەتىندە كورسەتىپتى. كوزىندە مۇڭ، كەۋدەسىندە كۇرسىنىس بارىن دا ءبىلدىرىپ وتىرعان. ول ايگەرىممەن تىم البىرت شاعىندا باس قۇراعانىنا وكىنەدى ەكەن. شاحماتتان حالىقارالىق جارىس وتەتىن بولىپ، يالتاعا بارعان سالاۋات سول ورتادا قوستانايلىق ارۋ ايگەرىممەن ۇشىراسادى. «ايگەرىم راسىندا بادەندى ەدى. شاشى ۇزىن بولاتىن» دەپ ەسكە الادى سالاۋات. الايدا، كوركەم كەلبەتتى، ۇزىن شاشتى قىزدى سالاۋاتتىڭ اتا-اناسى دا، تۋعان ورتاسى مەن دوستارى دا ەتەنە قابىلدامايدى. اتا-انا مەن دوستارىنىڭ تاراپىنان جىلى قاباق بولماعان سوڭ قوس عاشىق قول ۇستاسىپ ماسكەۋ اتتانادى. اتالعان الىپ شاھاردا ءبىراز تۇرىپ، ەل-جۇرتتى ساعىنعان سوڭ قايتىپ ورالادى. بۇعان سالاۋاتتىڭ اتا-اناسى، باۋىرلارى قۋانىپ، توي جاسايدى. الماتىدان، باي-باعىلاندار تۇراتىن اۋداننان داڭعاراداي ءۇش بولمەلى پاتەر سىيعا تارتادى. سودان كەيىن... ءبارى ويداعىداي ەدى. الايدا ايگەرىم مىنەز شىعارا باستايدى. «ماعان ونىڭ قۇربىلارى قوڭىراۋ شالىپ، «ايەلىڭنىڭ جەڭىل ءجۇرىسى بار» دەگەندى دە ايتىپ قالىپ ءجۇردى» دەپ كۇرسىنەدى سالاۋات. سودان كەيىن-اق جاس جۇبايلاردىڭ جۇلدىزى ءبىر-بىرىنە سۋىق تارتا باستاسا كەرەك.

«مەن ۇيدەن كەتىپ قالىپ تا ءجۇردىم. كەيدە ويىنحانالاردا قونىپ قالاتىنمىن. بىراق، بارىمدى توگىپ-شاشىپ، وتباسىما، اتا-انامنىڭ داۋلەتىنە زيان كەلتىرگەن ەمەسپىن»، - دەيدى سالاۋات.

وسىنداي قارىم-قاتىناستان كەيىن سالاۋات پەن ايگەرىم اجىراسىپ تىنادى. اجىراساردا سالاۋات ايگەرىمگە ءۇش بولمەلى پاتەردى بەرمەك بولادى. الايدا ايگەرىم ۇيدەن باس تارتادى. سالاۋاتتىڭ اكە-شەشەسى بەرىگە دەيىن ايگەرىمگە كومەكتەسىپ تۇرادى. «سەبەبى نەمەرەلەرى ايگەرىمنىڭ قولىندا كەتتى ەمەس پە؟» - دەيدى سالاۋات.

سالاۋات-ايگەرىم جىرىنىڭ باس-اياعى – ازىرگە وسى. «ايگەرىم شۋ شىعارعان سوڭ مەن ءساۋىر اينان بەرى اليمەنت تولەي باستادىم. قازىردىڭ وزىندە 1 805 870 تەنگە تولەدىم. ەندى تابىسىمنىڭ 50 پيىزىن بالالارىما جىبەرىپ تۇرامىن»، - دەدى ول تىلشىمەن سۇحابتىنىڭ سوڭىن قورتىندىلاپ.

سالاۋات باقىتقوجاۇلى ىزمۇحامبەتوۆ اقتوبەدەگى مۇناي كومپانيالارىنىڭ بىرىندە جۇمىس ىستەيدى. ايەل زاتىنان كوڭىلى قاتتى قالسا كەرەك، ايگەرىمنەن كەيىن ول ەشكىممەن وتاۋ قۇرماپتى. ءسۇر بويداق.

«اكە-شەشەمنىڭ جۇرەگى اۋىراتىنى بار. ولاردىڭ الدىندا مەن كىنالىمىن. سول ءۇشىن ەكەۋىنەن كەشىرىم سۇرايمىن. مەن اكەمنىڭ ءمىنسىز قىزمەتى مەن كولەڭكەسىز ومىرىنە كىرەۋكە سالدىم. سوعان قاتتى وكىنەمىن. مەنىڭ اكەمدى مازالاي بەرمەڭىزدەرشى. مەن ءوزىم بارىنە جاۋاپ بەرەمىن»، - دەيدى سالاۋات.

Abai.kz