سونىمەن، اتىشۋلى بوقاەۆ پەن ايانوۆقا قاتىستى سوت پروتسەسىندە «سىرا الەمىنىڭ كورولى» توقتار تولەشوۆ  كۋالىك ەتەتىن بولدى. تۇسكە دەيىن ونىڭ جەكە باسىنا قاتىستى مالىمەتتەر انىقتالدى. ەندى ول، تۇستەن كەيىن استانا قالاسى، ەسىل اۋداندىق سوتى ارقىلى بەينەبايلانىسقا شىعىپ، سوتتا قويىلعان ساۋالدارعا جاۋاپ بەرەتىن بولادى. بىرنەشە ايدان بەرى قاماۋدا وتىرعان تولەشوۆ قورعاۋشى تاراپتىڭ ءوتىنىشى بويىنشا جاۋاپ بەرگەلى جاتىر.

ايتپاقشى، تاڭعى ساعات وندا باستالعان سوت  كەزەكتى سپەكتاكلمەن جالعاستى. ماكس بوقاەۆتىڭ قورعاۋشىسى نۇربيكە ەسكەندىروۆا سۋديا داۋلەشوۆانى ىستەن شەتتەتۋ تۋرالى ءوتىنىش بەرىپ، پروتسەسس باستالماي جاتىپ،  ءۇزىلىس جاريالاندى.  شامامەن قىرىق مينۋتقا سوزىلعان ۇزىلىستەن سوڭ، كەڭەس داۋلەشوۆانى ىستەن شەتتەتۋ تۋرالى ءوتىنىشتى نەگىزسىز دەپ تاپتى. سەبەبى، «سوتتى ايىپتاۋ سيپاتىندا وتكىزىپ جاتىر، ەشبىر ءوتىنىشىمىز قاناعاتتاندىرىلمادى، سوتتالۋشىلارعا ءسوز بەرىلمەي جاتىر» دەپ ايىپ تاققان قورعاۋشى  ەسكەندىروۆانىڭ ايعاقتارى شىندىققا سايكەس كەلگەن جوق. ەسكەندىروۆانىڭ ەسىنە سالا كەتەيىك، بۇگىن سوتتىڭ ءۇشىنشى وتىرىسى عانا ءجۇرىپ جاتىر. جانە بارلىق تاراپتىڭ دا سويلەۋگە مۇمكىندىگى بولادى. سول ءۇشىن دە، سوت پروتسەسى ارنايى كەزەڭدەرگە بولىنگەن.

بۇعان دەيىن دە، سۋدياعا دا، پروكۋرورلارعا دا داۋىس كوتەرىپ، ايعايلاۋمەن بولعان قۇرمەتتى قورعاۋشى ەسكەندىروۆانىڭ ارەكەتى – جاي ۋاقىت سوزۋ نەمەسە اقپارات الاڭى ءۇشىن تاستالعان كەزەكتى قارماققا كوبىرەك ۇقسادى. قورعاۋشى حانىمنىڭ ءجوندى ءجونسىز ايىپتاۋعا ۋاقىت وتكىزگەننەن گورى، قورعاۋىنداعى بوكاەۆتىڭ جاعدايىن كوبىرەك ويلاعانى دۇرىس-اۋ...

ەسكە سالا كەتەلىك، بۇگىن تولەشوۆپەن بىرگە، ۆولكوۆ، بەكباۋوۆ، دوسانباەۆتار دا سوتتا كۋالىك ەتەتىن بولادى. جانە قورعاۋشى تاراپتىڭ «ەش ءوتىنىشىمىز قاناعاتتاندىرىلمادى» دەگەنىنە جاۋاپ رەتىندە ايتارىمىز، بۇعان دەيىن ادۆوكات ايانوۆتىڭ سۇراۋىمەن قورعاۋشى بالعاباەۆا ىستەن شەتتەتىلدى. ەسكەندىروۆانىڭ ءوتىنىشى بويىنشا سوت زالىندا اۋديوجازبا جۇرگىزۋگە رۇقسات بەرىلدى. اتىشۋلى تولەشوۆتى كۋاگەر رەتىندە شاقىرۋ تۋرالى يدەيا دا سول قورعاۋشى تاراپتىكى.

Abai.kz