وڭتۇستىك قازاقستان وبلىسىنىڭ استاناداعى كۇندەرى اياسىندا «ۇلىسىمنىڭ ۇيىتقىسى - وڭتۇستىك» وبلىس اقىن، جازۋشىلارىنىڭ كەزدەسۋى مەن كىتاپ كورمەسى ءوتتى.  بۇل تۋرالى "Abai.kz" پورتالى وقو اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

قر ۇلتتىق اكادەميالىق كىتاپحانادا وتكەن شارانىڭ ماقساتى تاۋەلسىز قازاقستاننىڭ مادەنيەتى مەن ادەبيەتىنىڭ دامۋىنا ءوز ۇلەسىن قوسىپ كەلە جاتقان وڭتۇستىك قازاقستان وبلىسى اقىن-جازۋشىلارىنىڭ استانا حالقىمەن جۇزدەسۋى، ادەبي شىعارماشىلىق جايىندا سۇحباتتاسۋى، ادەبي پروتسەستىڭ دامۋ بارىسىن سارالاۋى، قالامگەر مەن وقىرمان اراسىنداعى ادەبي بايلانىستى نىعايتۋ جانە كىتاپ وقىتۋدى ناسيحاتتاۋ بولىپ تابىلادى.

رۋحاني كەش بارىسىندا وڭتۇستىك ولكەسىنەن شىققان اقىن، جازۋشىلار - نارماحان بەگالىۇلى، مارحابات بايعۇت، ءحانبيبى ەسەنقاراقىزى، باقىتجان الديار، زىليحا جانتاسوۆا، مۇقاعالي كەنجەتاي سىندى قالامگەرلەر شىعارماشىلىق ىزدەنىستەرى مەن قازاق ادەبيەتىنىڭ كوركەمدىك دامۋ ارنالارى جايىندا وي ءبولىستى.

سونىمەن قاتار، وسى كۇنى استاناداعى جاستار تەاترىندا ج.شانين اتىنداعى وبلىستىق اكادەميالىق قازاق دراما تەاترىنىڭ ارتىستەرى «توزاق شەڭبەرى» قويىلىمىمەن قوسا، م.گوركي اتىنداعى مەملەكەتتىك اكادەميالىق ورىس دراما تەاترىندا وبلىستىق ورىس دراما تەاترىنىڭ اكتەرلارى «ودنوكلاسسنيكي» شىعارماسىن قالىڭ كوپشىلىككە ساحنالادى.

وقو اكىمىنىڭ ءباسپاسوز قىزمەتى