№2 اتىراۋ قالالىق سوتىندا ماكس بوقاەۆ پەن تالعات ايانوۆتىڭ ءىسى بويىنشا سوت پروتسەسى جالعاسۋدا. ەكىنشى كۇنگى سوت وتىرىسىنىڭ باسىندا قورعاۋشى تاراپ بىردەن 10-عا جۋىق ءوتىنىش حاتتارىن جاريالادى. اتاپ ايتساق، ونىڭ ىشىندە سوت پروتسەسىنىڭ حاتتاماسىن قولمەن تولتىرۋ، اۋديو جانە بەينەجازبانىڭ ساپاسىن ارتتىرۋ، سوتتالۋشىعا بۇلتارتپاۋ شاراسىن وزگەرتۋ، سوتقا باسقا كۋاگەرلەردى شاقىرۋ، باق-تاردا جاريالانعان ماتەريالداردى قىلمىستىق ىسكە قوسا تىركەۋ، سوتتالۋشى تالعات ايانوۆتىڭ جۇبايى مەن سوتتالۋشى ماكس بوقاەۆتىڭ اپكەسىن كۋاگەرلەر تىزىمىنەن شىعارۋ تۋرالى ءوتىنىش حاتتار بار. سوتقا توراعالىق ەتۋشى سۋديا گۇلنار داۋلەشوۆا بىردەن ولاردىڭ بىرنەشەۋىن قابىلداماي تاستادى. تەك باق-دا جاريالانعان ماتەريالداردى قىلمىستىق ىسكە قوسا تىگۋ، سوتتالۋشى تالعات ايانوۆتىڭ جۇبايى مەن سوتتالۋشى ماكس بوقاەۆتىڭ اپكەسىن كۋاگەرلەر تىزىمىنەن الىپ تاستاۋ تۋرالى ءوتىنىش قاناعاتتاندىرىلدى.

نەگىزىنەن العاندا، قورعاۋشى تاراپ اقىلعا سىيىمسىز شاعىمدارىن العا تارتتى. الدىمەن قورعاۋشى تولەپقالي ايانوۆ اۋديو جانە بەينەجازبانىڭ ساپاسىنا كۇمان كەلتىردى. «ەگەر الداعى ۋاقىتتا قىلمىستىق ءىس بويىنشا اپەللياتسيالىق سوتقا شاعىمداناتىن بولساق، ولار حاتتامانى قالاي وقيدى؟»،- دەپ دۇرسە قويا سويلەدى تولەپقالي ايانوۆ. ايتپاقشى، ونىڭ بۇل ارەكەتىنەن سوتقا جەڭىلەتىنىنە سەنىمدىلىكپەن كەلگەنى بايقالىپ قالدى. ءاۋ باستان-اق ول سوتتىڭ الداعى شىعاراتىن ۇكىمىنە قارسىلىق تانىتىپ، اپەللياتسيالىق سوتقا شاعىمداناتىنىن جەتكىزدى. وسى كورىنىستەن-اق سوت پروتسەسىنە قاتىسۋشىلار قورعاۋشى تاراپتىڭ تايعاناق ۇستانىمىنا كوزىن جەتكىزدى.

سونىمەن قاتار، تولەپقالي ايانوۆ سوتتى ساياسيلاندىرۋ ماقساتىمەن پروتسەسكە بۇرىنعى قر-نىڭ پرەمەر-ءمينيسترى كارىم ءماسىموۆتى، بۇرىنعى ۇلتتىق ەكونوميكا ءمينيسترى ەربولات دوساەۆتى،  ونىڭ ەكس-ورىنباسارى قايىربەك وسكەمباەۆتى، اۋىل شارۋاشىلىعى ءمينيسترى، جەر رەفورماسى جونىندەگى كوميسسيانىڭ توراعاسى اسقار مىرزاحمەتوۆتى كۋاگەر رەتىندە شاقىرۋدى ۇسىندى.  

قورعاۋشى «ماكس بوقاەۆ پەن تالعات ايانوۆتىڭ كوپە-كورىنەۋ جالعان اقپارات تاراتتى دەپ ايىپتالۋى نەگىزسىز» دەگەن تۇجىرىم ايتتى. ونىڭ پايىمىنشا، ولاردىڭ جۇرتقا تاراتقان اقپاراتى جالعان ەمەس. «قازاقستاندا 1,7 ملن. گەكتار جەر اۋكتسيون ارقىلى قازاقستان ازاماتتارىنا ساتىلادى»، «1 ملن. گەكتار جەر شەتەلدىكتەرگە جالعا بەرىلەدى» دەگەن رەسمي اقپارات بيلىكتەگى لاۋازىمدى تۇلعالاردىڭ  اۋزىمەن ايتىلدى»،- دەدى ول. قورعاۋشى بۇعان نەگىز ەتىپ، ۇلتتىق ەكونوميكا ەكس-ءمينيسترى ەربولات دوساەۆتىڭ ورتالىق كوممۋنيكاتسيالار قىزمەتىندەگى بريفينگتە سويلەگەن ءسوزىن كەلتىردى. «وسىعان وراي، ءبىز ۇكىمەتتەن «ۇلت جوسپارى» بويىنشا قازاقستاندا قانشا جەردىڭ قازاقستاندىقتارعا ساتىلاتىنى، قانشا جەر شەتەل ازاماتتارىنا جالعا بەرۋگە جوسپارلانعانى تۋرالى سۇراۋ سالۋىمىز كەرەك»،- دەدى تولەپقالي ايانوۆ.

الايدا مەملەكەتتىك ايىپتاۋشىلار قۇزىرلى مەملەكەتتىك ورگاندارعا سۇراۋ سالۋدىڭ، جوعارى لاۋازىمدى بيلىك وكىلدەرىن سوتقا شاقىرىپ، جاۋاپ الۋدىڭ ەشقانداي نەگىزسىز ەكەنىنە ناقتى دالەل كەلتىردى. «اتالعان تۇلعالاردىڭ سوتتالۋشىلارعا ەشقانداي قاتىسى جوق. سوندىقتان ولاردى شاقىرۋ نەگىزسىز» دەدى پروكۋرور سىدىقوۆ. ايتپاقشى، تولەپقالي ايانوۆ ءوتىنىش حاتىن وقىپ تۇرىپ، توقتار تولەشوۆتى سوتقا كۋاگەر رەتىندە شاقىرۋدى ۇسىندى. وسىلايشا قورعاۋشىلاردىڭ ايىپتاۋ اكتىسىن دە تولىق وقىماعانى اشكەرەلەندى. ايتا كەتەرلىگى، ءوزىنىڭ قورعاۋشىسى ءارى اكەسى تولەپقالي ايانوۆ سوت وتىرىسىندا سويلەپ تۇرعانىندا بەيقام قالپىندا گازەت وقىپ وتىرعان تالعات ايانوۆقا سۋديا ەسكەرتۋ جاسادى.

قازىر سوت وتىرىسىندا تۇسكى ءۇزىلىس جاريالاندى. 

اباي-اقپارات