قازاقستان رەسپۋبليكاسى پارلامەنتى سەناتىنىڭ توراعاسى ق.توقاەۆقا

قازاقستان رەسپۋبليكاسى پارلامەنتى ءماجىلىسىنىڭ توراعاسى  ن.نىعماتۋلينگە

قازاقستان رەسپۋبليكاسىنىڭ پرەمەر-ءمينيسترى ب.ساعىنتاەۆقا

قازاقستان رەسپۋبليكاسىنىڭ مەملەكەتتىك حاتشىسى گ.ابدىقالىقوۆاعا

قازاقستان حالقى اسسامبلەياسى توراعاسىنىڭ ورىنباسارى،

اسسامبلەيا حاتشىلىعىنىڭ مەڭگەرۋشىسى ە.توقجانوۆقا

اشىق حات 

بيىل ەلىمىز تاۋەلسىزدىك الىپ، كوك بايراعىمىز جەلبىرەگەنىنە، ەلتاڭبامىزدىڭ ەلەنگەنىنە، گيمنىمىزدىڭ اسقاقتاتا شىرقالعانىنا 25 جىل تولادى. الايدا، ەلدىگىمىزدى ايشىقتاپ، ازاماتتىققا تاربيەلەيتىن جانە وتانسۇيگىشتىگىمىزدى قالىپتاستىراتىن تۋ، ەلتاڭبا، گيمنىڭ قادىر-قاسيەتىن ۇعىنىپ، ءتيىستى دارەجەدە قۇرمەت كورسەتە الماي ءجۇرمىز.

قر 2007 جىلعى 4 ماۋسىمداعى  "قازاقستان رەسپۋبليكاسىنىڭ مەملەكەتتiك رامiزدەرi تۋرالى"  زاڭىنىڭ 5-بابى،  2 تارماعىندا: «قوعامدىق بىرلەستىكتەردىڭ جانە باسقا دا ۇيىمداردىڭ تۋلارى قازاقستان رەسپۋبليكاسىنىڭ مەملەكەتتiك تۋىمەن بىردەي بولماۋعا ءتيىس دەپ انىق جازىلعان. دەسەكتە، استانا قالاسىندا  جانە وزگە وڭىرلەردە ورنالاسقان رەسپۋبليكا مەن وبلىس كولەمىندە ۇلكەن ساياسي-قوعامدىق جانە مادەني ءىس-شارالار وتەتىن  قازاقستان حالقى اسسامبلەياسىنىڭ عيماراتى الدىندا قازاقستان رەسپۋبليكاسىنىڭ تۋى مەن اسسامبلەيانىڭ ايرىقشا بەلگىسىن كورسەتەتىن تۋى (كوپ ۋاقىتتان بەرى) بىردەي ورنالاسقان. قازاقستان حالقى اسسامبلەياسى — 1995 جىلعى 1 ناۋرىزدا  كونسۋلتاتيۆتى-كەڭەسشى ورگان عانا. جيىرما ءبىر جىلدىق تاريحى بار اسسامبلەيا سول كەزەڭدە جاڭادان قۇرىلعان تاۋەلسىز ەلىمىزدە ەتنوسارالىق قاتىناستاردى دامىتۋ ماسەلەلەرىن جوعارى دەڭگەيدە شەشۋ ءۇشىن جانە رەسپۋبليكاداعى تۇراقتىلىقتى ساقتاۋ ماقساتىندا قۇرىلعان ينستيتۋت قانا. ال، قازاق ەلى - تاريحى تەرەڭدە جاتىرعان، ەلباسى ن.نازارباەۆتىڭ ساليقالى ساياساتى ارقاسىندا الەم مويىنداعان ماڭگى ەل. سول سەبەپتى، قازاقستان تاۋەلسىزدىگى 25 جىلدىعى قارساڭىندا  استانا قالاسىنداعى جانە ەلىمىزدىڭ بارلىق وبلىس ورتالىقتارىنداعى قازاقستان حالىق اسسامبلەياسى عيماراتتارى الدىندا ورنالاسقان قازاقستان تۋى، اسسامبلەيا تۋىنان جوعارى ءىلىنۋى ءتيىس. ءبىزدىڭ سىنىمىزدان كەيىن ورال قالاسىنداعى اسسامبلەيا تۋى تومەن تۇسىرىلگەن بولاتىن. وسى باستاما وزگە وڭىرلەردە جالعاسىن تابۋ كەرەك.

قر پرەزيدەنتى ن.نازارباەۆ: ء«بىز تاۋەلسىزدىكتى اڭساپ، زارىعا جەتتىك. ەندى سول تاۋەلسىزدىگىمىزدىڭ قاسيەتتى بەلگىلەرىن دە ەرەكشە قادىرلەۋىمىز، قاستەرلەۋىمىز كەرەك. ءاربىر ازامات قازاقستاننىڭ تۋىن، ەلتاڭباسىن، ءانۇرانىن تۇمارداي قاسيەت تۇتۋى قاجەت. ەلىمىزدىڭ سىنالاتىن ءبىر تۇسى وسى» دەگەن ەدى. ەندەشە، رامىزدەردى وزدەرىڭىزدەن باستاپ قۇرمەت كورسەتۋ جانە ەلباسىنىڭ دانا ءسوزىن تۇمار ەتىپ، مويىندارىڭىزعا تاعىپ ءجۇرۋ سىزدەردىڭ ءتول مىندەتتەرىڭىز ەكەنىن ەستەن شىعارماڭىز!!!

          «تالاسقا تۇسسە جان مەن تۋ

           جان ەمەس ماعان كەرەگى-

           كوك تۋدىڭ جەلبىرەگەنى» دەپ الماس احمەتبەكۇلى جازعانداي، قازاقستان تۋى بارىنەن جوعارى، بيىك جەلبىرەۋى ءتيىس!

تالعات قاتاۋوۆ

Abai.kz