تۇركىستان قالاسىنداعى مادەنيەت ۇيىندە ۆەتەريناريا سالاسى بويىنشا سەمينار كەڭەس ءوتتى.

كەڭەسكە اشم ۆبجقك توراعاسىنىڭ ورىنباسارى قر باس ۆەتەريناريالىق-سانيتاريالىق دارىگەرىنىڭ ورىنباسارى ت.قابدۋلدانوۆ، وقو اۋىل شارۋاشىلىعى باسقارماسىنىڭ ۆەتەريناريا سالاسىنداعى جۇمىستاردى ۇيىمداستىرۋ ءبولىمىنىڭ باسشىسى ب.وماروۆ باستاعان ارنايى توپ جانە 7 اۋداننان ماماندار كەلىپ قاتىستى.

تۇركىستان قالاسى اكىمىنىڭ ورىنباسارى ت.مۇساەۆ جۇرگىزگەن سەميناردىڭ ماقساتى – بۇگىنگى تاڭداعى وزەكتى ماسەلەلەردى  تۇرعىندارمەن بىرلەسە وتىرىپ شەشۋ جانە مالدارعا سىرعا سالۋ، ەكپەلەردىڭ ۋاقىتىلى ەگىلۋى. جيىن بارىسىندا قازىرگى تاڭداعى قاۋىپتى ءارى كۇردەلى توپالاڭ دەرتى (سيبيرسكايا يازۆا) جايىندا  ايتىلدى. تۇلىك تاڭدامايتىن اۋىر ىندەت جايىندا كەڭىنەن تالقىلاندى.

جينالعاندار الدىندا بايانداما جاساعان وبلىستىق ۆەتەريناريا ورتالىعىنىڭ مامانى ب.دوسقوجاۇلى ارنايى سلايدپەن كەڭىنەن ءتۇسىندىرىپ اۋرۋ وشاقتارىن انىقتاۋدىڭ جانە كۇرەسۋدىڭ ءتيىمدى جولدارىن ايتقان مامان ەلىمىز بويىنشا وسى دەرتتەن 3 ادام كوز جۇمعان اتاپ ءوتتى. سونىمەن بىرگە، اۋرۋدىڭ الدىن الۋى، ساۋىقتىرۋ جۇمىستارىنىڭ جۇرگىزىلۋى  باستى نازاردا بولۋى كەرەك ەكەنىن العا تارتتى. ۆەتەريناريا سالاسى بويىنشا  ساراپتاۋ لابوراتورياسىنىڭ قۇجات پەن ءونىم سايكەستىگى دە ءبىرىنشى كەزەكتەگى ماسەلە ەكەندىگى ايتىلدى. جيىن سوڭى سۇراق-جاۋاپپەن ۇلاسىپ، كوكەيدە جۇرگەن ماسەلەلەرگە ماماندار تاراپىنان جان جاقتى جاۋاپتار بەرىلدى.

Abai.kz