شۇكىر، قازىر اۋىلشارۋاشىلىق سالاسىندا كاسىبىن دوڭگەلەتەمىن دەگەندەرگە مەملەكەت تاراپىنان جان-جاقتى قولداۋ جاسالادى. تۇركىستان قالاسىندا «ماكسيمۋم» ايو اشىلعالى بەرى جەرگىلىكتى شارۋالاردىڭ جالپى سوماسى 2,9 ملرد. تەڭگەنى قۇرايتىن 1038 جوبانى قارجىلاندىرعان. ونىڭ ىشىندە 1,6 ملرد. تەڭگەنى قۇرايتىن 1018 جوبا «ىرىس» ميكروقارجى ۇيىمىنا تيەسىلى.

 جەرگىلىكتى اكىمدىكتىڭ ءتيىستى ماماندارىنىڭ مالىمدەۋىنشە، قازىرگى تاڭدا اتالعان جوبالار ءساتتى جۇزەگە اسىپ، كاسىپكەرلەر ەڭبەگىنىڭ جەمىسىن كورىپ جاتىر ەكەن. ماسەلەن، 3 گەكتار جەرگە جىلىجاي كەشەنىن ۇيىمداستىرۋدى جوسپارلاعان جەرگىلىكتى «ديدار» شارۋا قوجالىعى 2014 جىلى «ماكسيمۋم» ايو-نان 270 ملن. تەڭگە نەسيە الىپ، جوسپارلاعان ءىسىن جولعا قويۋعا مۇمكىندىك العان. ءىستىڭ كوزىن تاۋىپ، كاسىبىن بەرەكەگە اينالدىرعان كاسىپكەر بۇگىندە سول جىلىجايىندا وندىرگەن ونىمدەرىن العاش جەرگىلىكتى نارىققا شىعارسا، قازىر رەسەي ەلىنە دە ەكسپورتتاپ جاتىر. ال، 3 اي بۇرىن عانا 9 ملن. تەڭگە كولەمىندە نەسيە العان كاسىپكەر ەربول اشاباەۆ ءىرى قارا مالدى بورداقىلاۋدى جولعا قويىپ ۇلگەردى. ول جىلىنا 70 توننا ەت ءوندىرۋدى الدىنا ماقسات ەتىپ قويعان. وسىلايشا، ءوز وڭىرىندە مال شارۋاشىلىعىن دامىتۋعا ەلەۋلى ۇلەسىن قوسۋدا.

سول سەكىلدى يندۋستريالدى ايماقتا ورنالاسقان «Grand Miks» - جيھاز تسەحى عيماراتىن زاماناۋي جابدىقتارمەن جابدىقتاۋدا. ول «ماكسيمۋم» ايو-نان 68 ملن. تەڭگە كولەمىندە العان نەسيەنى قىتايدان سوڭعى ۇلگىدەگى جابدىقتاردى ساتىپ الۋعا جۇمساپتى. وسىلايشا تسەح جۇمىسىنا جان بىتىرگەن كاسپكەر الدىنا ۇلكەن ماقساتتار قويىپ وتىر. قازىردىڭ وزىندە بىرنەشە ادامدى جۇمىسپەن قامتىپ وتىر.

 جەكە كاسىپكەر نۇرلان ساۋلەباەۆ تا «ىرىس» مقۇ تاراپىنان قولداۋ كورگەن ازاماتتاردىڭ ءبىرى. 12 ملن. تەڭگە نەسيە العان ول بۇل قاراجاتتى اعاش وڭدەۋ بيزنەسىنە باعىتتاپتى. ونىڭ اشقان تسەحىنان شىققان بۇيىمدار لەزدە-اق ۇلكەن سۇرانىسقا يە بولىپ، سونىڭ ارقاسىندا 20-عا جۋىق ادامدى جۇمىسپەن قامتىدى. الداعى ۋاقىتتا تسەح قۋاتتىلىعىن ارتتىرۋدى ويلاعان ن.ساۋلەباەۆ العاشقى نەسيەسىنەن قۇتىلعاننان كەيىن جاڭا قادامداردى باستاۋ ءۇشىن تاعى دا وسى ۇيىمنىڭ كومەگىنە جۇگىنبەك. تالاپتى ەرگە نۇر جاۋار دەمەكشى، تالاپتى ازاماتتىڭ العا قويعان ماقساتتارى ورىندالا بەرسىن دەگەن تىلەك بىلدىرگىمىز كەلەدى.

Abai.kz