وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ «شىمكەنت دەندرولوگيالىق ساياباعى» مكقك-نا وبلىستا جوق «Optimal - 1400» اعاش قازىپ-وتىرعىزۋ اگرەگاتى ساتىپ الىندى.

بۇل اگرەگاتتىڭ قىلقان جاپىراقتى اعاشتاردىڭ بيىكتىگى 2 مەتردەن جوعارى، ال قالعان اعاشتاردىڭ 4 مەتردەن جوعارى جاسىل جەلەكتەردى توپىراعىمەن قوسا قازىپ الۋعا جانە باسقا ورىنعا وتىرعىزۋعا ارنالعان مۇمكىندىگى بار. اگرەگاتتىڭ قازۋ تەرەڭدىگى 90 سم بولسا، قازاتىن توپىراقتىڭ ۇستىڭگى ديامەترى 140 سم قۇرايدى. ال تەحنيكالىق پارامەترى بويىنشا ساعاتىنا 3-5 اعاشتى قازىپ الىپ، كەلەسى ورىنعا وتىرعىزا الادى.

قازىرگى تاڭدا، دەندراري ساياباعىندا 97 مىڭعا جۋىق جاسىل جەلەك جايقالىپ تۇرسا، سونىڭ بۇگىندە 7 مىڭى ورنىنان قايتا الماستىرۋدى قاجەت ەتەدى. الۋان ءتۇرلى اعاش تۇرلەرىنىڭ جالپى ايماققا شاشىراي ورنالاسىپ، ۇلكەن اۋماقتا ارالاس وسۋىنە بايلانىستى ولاردى تاماشالاۋ ىڭعايسىزدىق تۋدىرۋدا.

سول سەبەپتى، اعاشتاردى كلاسس جانە تۇرىنە قاراي شوعىرلاندىرۋ ساياباققا كەلۋشىلەرگە اعاش تۇرلەرىمەن تولىق تانىسۋعا جاعداي جاساۋعا وسى اگرەگات كوپ سەپتىگىن تيگىزبەك. ماماندار بيىلعى جىلدىڭ جوسپارى بويىنشا جاڭا جىلعا دەيىن 2 مىڭ ءتۇپ اعاشتى اتالعان تەحنيكانىڭ كومەگىمەن «كوشىرۋدى» جوسپارلاپ وتىر.

وسىلايشا، وبلىس كولەمىندە مەملەكەتتىك مەكەمەلەردىڭ قاجەتتىلىگىنە جانە جەكە تۇرعىندارعا اقىلى قىزمەت كورسەتۋ ارقىلى وسى كۇنگە دەيىن قۇرىلىس پەن كوممۋنيكاتسيا جۇرگىزۋگە كەدەرگى بولعان اعاشتار كەسىلىپ الىنعان بولسا، اتالمىش ماشينانىڭ كومەگىمەن ەشقانداي قيىندىقسىز باسقا ورىنعا كوشىرۋ مۇمكىندىگى تۋىپ وتىر.

اباي اقپارات