ماسكەۋگە كوشىپ كەتكەن كراسيەنكو دەگەن ءجۋرناليستىڭ سۇحباتى ونىڭ (جانە كراسيەنكو سەكىلدىلەردىڭ) شىنايى بەتپەردەسىن اشىپ بەرگەندەي ەكەن. ءوزىنىڭ ايتۋىنشا، قازاقستاندا جۇرگەندە ول جىگىتتە ءبارى بولىپتى، ىشكەنى الدىندا، ىشپەگەنى ارتىندا. ءتىپتى پرەزيدەنتتىڭ وزىنە دەمالىپ جاتسا دا ويىنا كەلگەن ۋاقىتتا، ەمىن-ەركىن بارا بەرەدى-ءمىس. قازىر ول ماسكەۋدە كوپتىڭ ءبىرى. ء«بارىن جوعالتتىم» دەپ قويادى ءوزى. نە ءۇشىن؟ «بالا-شاعامنىڭ بولاشاعى ءۇشىن». انانى قاراڭىز. ءوزىنىڭ، ءۇرىم-بۇتاعىنىڭ كەلەشەگىن قازاقستانمەن بايلانىستىرعىسى جوق. بۇل جەردەن بولاشاق كورىپ وتىرعان جوق. نەسىن جاسىرايىق، وزگە ۇلتتىڭ وكىلدەرى تۇرماق، ءوزىمىزدىڭ كەي قاراكوزدەرىمىزدىڭ ءوزى مۇمكىندىك بولسا شەتەلگە تايىپ تۇرساق دەيتىن بولىپتى قازىر. 

كراسيەنكو ۇلتشىل-پاتريوتتاردان ەلگە زاۋال كەلۋى مۇمكىن دەيدى، قۇداي بەتىن ءارى قىلسىن، ەلگە زاۋال كەلسە، وسىنداي قوسمەكەندىلەردەن كەلەدى. سويتە تۇرا قيت ەتسە، ورمانعا قاراپ ۇلىپ تۇراتىن كراسيەنكو تەكتەستەرگە ءبىزدىڭ شەندى-شەكپەندىلەر كوپشىك قويۋىن قويمايدى.

ايتايىن دەگەنىم، جۋرناليستيكانى يدەولوگيالىق قۇرال ەكەنىن ەسكەرسەك، ناعىز «ەلگە بولسىن» دەگەن مەملەكەتشىل، ۇلتجاندى ازاماتتاردى كوتەرمەلەۋ كەرەك! 

ايتپاقشى، ەگەر ەل تۋرالى، ەلباسى تۋرالى قىزىقتى فيلم جاساۋ كەرەك بولسا، كراسيەنكونىڭ ماسكەۋدەن كەلگەنىن كۇتپەي، ءوزىمىزدىڭ جىگىتتەرگە سەنىپ تاپسىرسا، (مىسالى اتىراۋدا اسقار ءاشىموۆ دەگەن بىلىكتى مامان بار، سەرىك اباس-شاح مىقتى پروديۋسەر، قاسىم امانجول دا ناعىز مامان، رينات دۋمانۇلى دەيتىن زامانداس بار جاڭاشىل ويلايتىن. كوپ قىسقاسى) ارتىق جاساماسا كەم جاساماس ەدى. 
ۇزىن ءسوزدىڭ قىسقاسى، بىزدە ەكى وتان جوق، «ۋ ىشسەك تە ءوز ۇلتىڭمەن، تۋعان جۇرتىڭمەن» دەيتىن قازاقپىز، ءبىز كراسيەنكولارعا قاراعاندا، ەكىجۇزدى، قوسمەكەندى ەمەسپىز! قۇداي ەلىمىزدى قوسمەكەندى، ەكىجۇزدىلەردەن ساقتاسىن!

قۋات اۋەسباي

Facebook-تەگى پاراقشاسىنان