شاردارا اۋدانىنا قاراستى ۇزىن اتا اۋىلىنداعى «ايتكۇل اتا قونىس» قوجالىعىنىڭ توراعاسى راحىمبەردى ايتمىرزاەۆ ءۇشىن وسى جىل تابىستى بولدى. الا جازداي توككەن تەرى اقتالىپ، 100 تونناعا جۋىق ماقتا، 200 توننادان استام كۇرىش جيناعان. بۇدان بولەك، قاۋىن-قاربىزىن بەرىسى ەلىمىزدىڭ سولتۇستىگىنە، ارىسى رەسەيگە ساۋدالاپ، پايداسىن كورگەن.

— ءوزىم 48 گا، ال شاعىن قوجالىقتارمەن بىرلەسىپ 140 گا ماقتا جانە 35 گا كۇرىش ەكتىم. اسا مول پايدا كورگەن جوقپىز. دەگەنمەن، شىعىندى وتەدى. تۇقىم سەبىلگەن كۇننەن باستاپ، جيناپ العانعا دەيىن قول كۇشى جانە تەحنيكانى قاجەت ەتەتىن ماقتانىڭ شىعىنى شاش-ەتەكتەن. سوندىقتان دا بولار، ديقاندار اق التىننىڭ كولەمىن ازايتىپ جاتىر. ماسەلەن، ورتا ەسەپپەن العاندا ءبىر گەكتار ماقتالىققا 150-200 مىڭ تەڭگە شىعىن كەتەدى. ەگەر شارۋانىڭ تەحنيكاسى بولسا، از بولسا دا پايدا كورۋگە مۇمكىندىگى بار. ال، تەحنيكاسى جوقتارىنىڭ جاعدايى قيىنداۋ. ديقاندار ءالى دە تولىق اياقتان تۇرىپ كەتكەن جوق. سول سەبەپتى، مەملەكەت تاراپىنان ولار قولداۋعا مۇقتاج، — دەيدى راحىمبەردى ايتمىرزاەۆ.

شاردارا اۋدانى نەگىزىنەن كەڭەس داۋىرىنەن بەرى ەلىمىزدىڭ حالىق شارۋاشىلىعىندا شەشۋشى ماڭىزى بار داقىلدىڭ ءبىرى، كۇرىش وسىرەتىن كەڭشارلارمەن اتى شىققان. 1980 جىلدان باستاپ اۋداننىڭ ونەركاسىپ كەشەنىندە تاعى ءبىر جەتەكشى سالا –ماقتا ءوندىرىسى جەدەل دامي باستادى.قازىرگى ۋاقىتتا شاردارا اۋدانى اۋىل شارۋاشىلىعى مەن ءوندىرىسى قاتار دامىعان نارىقتىق ەكونوميكاعا تولىق بەيىمدەلىپ مەڭگەرگەن ايماق. اۋدان قازىرگى تاڭدا كۇرىشتەن مول ءونىم الۋدى ماقسات ەتىپ وتىر.

Abai.kz