استانا. 10 قىرقۇيەك. قازتاگ – «جولاۋشىلار تاسىمالى» اق الماتى-ماسكەۋ باعىتىندا جايلىلىق دەڭگەيى جوعارى «الاتاۋ» پوەزدىن جولعا شىعاردى، دەلىنگەن كومپانيانىڭ جۇما كۇنى تاراتقان حابارلاماسىندا.

«2010 جىلدىڭ 10 قىرقۇيەگىندە الماتى-ماسكەۋ باعىتىنداعى №7/8 جايلىلىق دەڭگەيى جوعارى پوەزد رەيسكە اتتاندى. جولاۋشىلار قۇرامى وتاندىق كاسىپورىنداردا كۇردەلى جوندەۋدەن وتكىزىلىپ، جاڭارتىلعان ۆاگونداردان جاساقتالدى»، - دەلىنگەن حابارلامادا.

قۇرامدى دايىنداۋ بارىسىندا زاماناۋي ماتەريالدار مەن جاڭا تەحنولوگيالاردى پايدالانۋ ارقىلى ۆاگونداردىڭ سىرتى مەن ءىشىنىڭ جاڭا ديزاينىن جاساۋعا ەرەكشە نازار اۋدارىلدى، دەپ اتاپ كورسەتەدى كومپانيانىڭ ءباسپاسوز قىزمەتى. قوراپتىڭ سىرتىن بەزەندىرۋ بارىسىندا سارى ءتۇستى ورنەكتەرمەن ايشىقتالعان اسپان ءتۇس پايدالانىلدى.

«الاتاۋ» پوەزدى 3 ءتۇرلى ۆاگونداردان (سۆ، كۋپە جانە پلاتسكارت), مەيرامحانا-ۆاگوننان جاساقتالدى. جىل سوڭىنا دەيىن الماتى-ماسكەۋ باعىتىنىڭ تاعى ءۇش قۇرامىن جاڭارتۋ جۇمىستارىن اياقتاۋ جوسپارلانعان.

«الاتاۋ» پوەزى ەكى قالانىڭ اراسىنداعى 4 مىڭ شاقىرىم قاشىقتىقتى 78 ساعات 40 مينۋتتا ءجۇرىپ وتەدى.

حابارلامادا اتاپ كورسەتىلگەندەي، 2010 جىلدىڭ ماۋسىم ايىنان باستاپ استانا-ماسكەۋ باعىتىنداعى №71/72 جايلىلىق دەڭگەيى جاقسارتىلعان «قازاقستان» پوەزىنىڭ جاڭارتىلعان قۇرامدارى جولعا شىقتى.