ءبىز جازاسى بىرنەشە جىلعا كەسىلگەن گەنەرال-لەيتەنانت ءىلياس باقتىباەۆتى بالا كەزدەن بىلەتىن، تانيتىن ادامدارمىز. جەتىمدىكتىڭ ءدامىن تاتىپ وسكەن ءىلياس – باۋىرىمىز ەڭبەكقور، ۇلكەن-كىشىگە بىردەي ءىلتيپاتتى ازامات. زاماننىڭ تالابىنا ساي كوپ وقىپ، ىزدەنىپ، ءوزى سۇيگەن قازۇۋ-دىڭ زاڭ فاكۋلتەتىنە ءتۇسىپ، ويداعىداي ءبىتىرىپ شىقتى. ءوز ءبىلىمى مەن ەڭبەكقورلىعىنىڭ ارقاسىندا ساتىلاپ ءوسىپ، تاۋەلسىزدىگىمىزدىڭ العاشقى جىلدارىندا  ەلباسى  ن.ءا.نازارباەۆتىڭ جانىنان تابىلدى. وتكەن عاسىردىڭ 90- جىلدارىنداعى اۋىر كۇندەردى ءبارىمىز دە جاقسى بىلەمىز عوي. سوندىقتان دا وعان كوپ توقتاماي-اق قويايىق. ءبىزدىڭ ايتپاعىمىز ؘ– ەستافەتا تۋىن وزىنەن كەيىنگى جاستارعا تاپسىرىپ، قۇرمەتتى زەينەتكە كەتىپ، كوپ بەينەتىنىڭ زەينەتىن كورەم دەگەن جاستا شاتىلۋى ءبىزدى الاڭداتىپ وتىرعانىن جاسىرا المايمىز.

وي ەلەگىنەن وتكىزىپ كورسەك، ء«وزى قىزعىشتاي قورعاپ، ءوزى قۇرىسقان مەملەكەتىنىڭ تامىرىنا بالتا شاۋىپ، توڭكەرمەك بولدى» دەگەنگە سەنۋ مۇمكىن بە؟ ءبىز ەشقاشان سەنبەيمىز.

بىرىنشىدەن، ءى.باقتىباەۆ وندايدى ويلايتىن جاستان اسقان ادام. ساياساتپەن اينالىسقان جوق. توماعا-تۇيىق، بىرقالىپتى ءومىر وتكىزىپ جاتتى. «سىرا كورولى» ت.تولەشەۆپەن داستارقانداس بولسا بولعان شىعار، سۋرەتكە تۇسكەن ەكەن دەپ ءى.باقتىباەۆتى ونىڭ ىستەرىنە قوساقتاۋدىڭ ەش قاجەتى جوق. قازىرگى زاماندا كىم كىممەن ارالاسپاي جاتىر؟

1986 جىلعى جەلتوقسان كوتەرىلىسىنە قاتىسۋشىلاردى اقتاۋ،  ەل بولاشاعىن، ەر نامىسىن قورعاۋ كەزىندە دە جاقسى قىرىنان كورىنگەنىن بىلەمىز. جاس كەزىنەن ۇلتىنىڭ ار-نامىسىن ءوز دەڭگەيىندە قورعاي بىلگەن ءى.باقتىباەۆ سياقتى ار-وجدانى تازا، ءبىلىمدى زاڭگەرلەر كوپ ەمەس.

سوندىقتان دا، ونىڭ بىلىكتىلىگىن جاس زاڭگەرلەردى دايىنداۋعا نەگە پايدالانباسقا؟ ونى الدەكىممەن ارالاس بولعان ەكەن دەپ قارالاۋدىڭ ەش قاجەتى جوق. باقتىباەۆتى جاقسى تانيتىن ادامدار اراسىنداعى پىش-پىش اڭگىمەلەر «مەملەكەتكە، اتا زاڭعا، ەلباسىعا ادال بولۋدىڭ اقىرى وسىنداي بولسا، جەتىسكەن ەكەنبىز» دەگەندەرىن ەستىپ ءجۇرمىز. سوندىقتان ءى.باقتىباەۆ ءىسى تولەشەۆ ىسىنەن اجىراتىلىپ، جەكە قارالۋى ءتيىس دەگەن ويدامىز. سوندا عانا اقيقاتقا جاقىنداۋىمىز مۇمكىن.

مەملەكەتىمىزدىڭ ىرگەتاسىن قۇيىسقان ازاماتتىڭ سۇراۋسىز كەتۋى مۇمكىن ەمەس دەپ بىلەمىز. الماتى وبلىسى، رايىمبەك اۋدانىنىڭ «قۇرمەتتى ازاماتى»، باسقا دا مەملەكەتتىك ماراپاتتان كەندە ەمەس ەكەنىن ەسكەرسەك، ماراپاتىمىزدىڭ دارەجەسى تىم تومەندەپ كەتپەي مە؟ ءى.باقتىباەۆ سياقتى بىلىكتى زاڭگەردى قارالاپ، سوتتى قىلۋىمىز قۇقىق سالاسىنا اۋىر سوققى دەپ بىلەمىز.

الماتى وبلىسى، رايىمبەك اۋدانىنىڭ ءبىر توپ ازاماتتارى اتىنان

قۇرمانباي سارمانبەت

Abai.kz