قازاقستاننىڭ حالىق جازۋشىسى
اق تىلەگىم
تارىلماسىن دەمىمىز،
بۇگىلمەسىن بەلىمىز،
شىعىمدى بولسىن جەرىمىز،
بەرەگەن بولسىن كەنىمىز،
بەدەلدى بولسىن ءتورىمىز،
شىرايلى بولسىن ەلىمىز،
ەسەن-ساۋ بولىپ ءوزىڭىز،
قاراقتى بولسىن كوزىڭىز،
دۇعالى بولسىن ءسوزىڭىز،
ال، نۇرسۇلتان قاراعىم،
تاريحپىن دەپ سەنىڭىز!
ءاۋمين!
ءازىلحان نۇرشايىقوۆ
قازاقستاننىڭ حالىق جازۋشىسى
اق باتا
ۋا، قادىرلى،
قاجىرلى،
قايراتتى،
ايباتتى نۇرەكە!
ۇزاق جاساپ،
بار بولىڭىز!
تمد-نىڭ ىشىندەگى نار بولىڭىز!
جارلىلارعا جار بولىڭىز!
جاقسىلىققا زور بولىڭىز!
جەمقورلىققا تور بولىڭىز!
جارامساققا سور بولىڭىز!
ەڭبەكشى حالىققا قامقور بولىڭىز!
ادالدىق، ادىلدىك، تۋرالىعىڭىزبەن;
ءدۇبىرى جەر جارعان تۇلپارلىعىڭىزبەن;
دۇنيە ءجۇزىن شارلاعان سۇڭقارلىعىڭىزبەن;
تاريحتىڭ تار كەزىندە
تاۋەلسىزدىك تۋىن كوتەرىپ،
قازاق جەرىنە
دەموكراتيانىڭ التىن قازىعىن قاققان
ورلىگىڭىزبەن;
از جىلدا استاناداي الىپ قالا ورناتقان
ەرلىگىڭىزبەن;
كەمەڭگەرلىگىڭىزبەن;
جۇيرىك وي، جۇيتكىگەن شەشەندىگىڭىزبەن;
تاعدىرمەن تارتىسىپ،
تاۋلاردان،
تەڭىزدەردەن اساتىن
تاماشا جول سالعان
كوسەمدىگىڭىزبەن;
ۇرپاقتار ۇنەمى شىرقايتىن،
وشپەس وت سەكىلدى،
ۇلتتىق ۇلى جىر بولىڭىز، نۇرەكە!
ءاۋمين!
قادىر مىرزا ءالي
قازاقستاننىڭ حالىق جازۋشىسى
ەلدىڭ سالەمى
ماقسات پەن ماقسات،
ويى مەن ويى مەجەلەس،
جاقسىعا جاقسى ەشقاشان قارۋ كەزەمەس.
بۇگىنگى مىناۋ قيىندىق جايلى ايتسام مەن،
ءسىز سونى كورمەي وتىر-اۋ دەگەن ءسوز ەمەس.
بۇزۋعا بولماس تابيعي تاعدىر جەلىسىن،
بيىل مەن ءبىراز ارالاپ قايتتىم ەل ءىشىن.
شىندىقتى ايتۋ شىنىمەن قيىن كەزدە،
وتىرىك ايتۋ ودان دا قيىن مەن ءۇشىن!
ادىپتەپ تانىپ ءراسىمىڭىزدى گۇلدەرمەن،
باعزى ءبىر جاندار وزگەدەن بۇرىن ۇلگەرگەن.
ماقتاماس ەدىم، ماقتانار ەدىم زامانمەن،
بىراق تا بىزگە ونداي زاماندى كىم بەرگەن؟!
دالاعا قاراپ الاڭداي بەرەم، الاڭداي:
باياعى مالدان قالىپتى-اۋ بوساپ دالام باي.
جەتكىز دەپ تۇگەل جولدادى سالەم ەل مەنەن،
مەن سىزبەن كۇندە سىرلاسىپ جۇرگەن ادامداي.
ءارتۇرلى ويلار، ءارتۇرلى پىكىر ءار ۇيدە...
كورەگەن كوڭىل الدامشى سوزگە ەري مە؟!
ماراپات، ماداق، ماقتاۋدىڭ ءبارى – دوستىق تا،
سىناۋدىڭ ءبارى – دۇشپاندىق ەمەس، ارينە!
تىرناعىڭ كەلمەس جازىلماي جاتقان جارانى،
سىيلىقتىڭ ەمەس، ابىرويى ءوستى پارانىڭ!
شىداۋداي شىداپ: «شۇكىرشىلىك!» دەسە بىرەۋلەر،
كەيبىرەۋلەردىڭ اشىلعان ابدەن ارانى!
تىرشىلىك تىرلىك وكىنىشپەنەن وتپەسىن!
ءتوزىمدى دەگەن تۋىستىڭ شىعىپ كەتتى ەسى.
سىزگە ايتپاعاندا ايتادى ەل كىمگە ارىزىن؟
سىزگە ايتپاعاندا ايتادى كىمگە وكپەسىن؟!
قيىنى – قيىن! امال جوق بىراق كونبەسكە!
قاقىمىز دا جوق سول قيىندىقتى جەڭبەسكە.
ءسىز دەگەن جاندار اقتاۋعا سونى ءتيىس قوي،
ەلباسىن الداۋ – حالقىن دا الداۋ ەمەس پە؟!
سەنگەننەن كەيىن توزبەيدى نەگە سالماققا؟!
ءبۇلدىرىپ بىرەۋ... ۇياتقا بىرەۋ قالماق پا؟!
تۇرمەدە جاتىپ شىرۋگە ءتيىس ارسىزدار
سىتىلىپ شىعىپ، جوعالىپ جاتىر جان-جاققا!
سەنەمىز: ەرتەڭ عاجايىپ قوعام ورنايدى.
جەتكەنشە سوعان قانشاما قازاق سورلايدى؟!
اقىندار استە حالىقتىڭ ءسوزىن سويلەيدى،
پرەزيدەنتىن دە قورعايتىن تۇستا قورعايدى.
از ەمەس قازىر كىنالى مەنەن جازىقتى.
ىشمەرەز جاندار ىشقۇسا قىلدى-اۋ نازىكتى.
ءبىر پالە كەتسە، ءبىر پالە كەلىپ ورنىنا،
بىلەمىز استە، بىلەمىز ءسىزدى قاجىتتى!
كەي جەردە كەيدە ءادىلىن ايتار جوق ۇلىق،
جىلايدى جاندار ماڭدايى تاسقا سوعىلىپ.
حالقىڭىز بىزگە بەلگىلى ابدەن: جىرتىقتىڭ
تىكسەڭىز ءبىرىن، بىرەۋى جاتىر سوگىلىپ!
شىرىلداپ ءجۇرسىز، شىرىلداپ ءجۇرسىز، بىلەمىن،
شىعادى بىردە، شىقپايدى بىردە بۇل ەگىن...
وسەتىن ەلدىڭ ءوزىن ۇمىتىپ اكىمى،
كەمەڭگەر بولىپ ويلاۋعا ءتيىس تۇلەگى.
جەتەدى قىران، جەتەدى بىزدە قارشىعا،
جەتەدى بىزدە قىز-قايىڭ مەنەن نار-شىنار.
ەڭ ۇلكەن ونەر – نان تابۋ ەمەس، - جان تانۋ،
اقىلدى جاندار ءالى دە بولسا بار شىعار؟
حالىقتان تۋماي تۋادى كىمنەن الىپتار؟
سەنسەڭىز ەگەر، سەنۋگە تاتىر حالىق بار!
بۇگىنگى مەنەن تاريحتاعى ورىن ءبىر ەمەس،
بولاشاق ءوزى باعاسىن بەرەر، انىقتار!
گۇلگە بولەر كەلەشەك ۇرپاق قۇمايتتى،
زامانا بىراق بىزدەردى بۇرىن مۇڭايتتى.
پرەزيدەنتتىڭ جۇگى قاشان دا اۋىر – بىلەمىز،
پەرزەنتتىك پارىز ودان جەڭىل دەپ كىم ايتتى؟!
adebiportal.kz
