بۇگىن استانادا دۇنيەجۇزىلىك قازاق كۇرەسى فەدەراتسياسىنىڭ كونگرەسى باستالدى. جيىندا فەدەراتسيانىڭ جاڭا پرەزيدەنتى سايلاندى.

ۇزاق جىلدار بويى دۇنيەجۇزىلىك قازاق كۇرەسى فەدەراتسياسىن باسقارعان سەرىك توكەەۆ بايانداما جاساپ، الداعى وتەتىن جارىستارعا توقتالىپ ءوتتى، دەپ حابارلايدى Baq.kz.

«دۇنيەجۇزىلىك قازاق كۇرەسىن باسقارعان 12 جىلدىڭ ىشىندە 7 الەم، 11 ازيا بىرىنشىلىگى، 3 الەم كۋبوگى، 3 ەۋروپا مەن افريكا بىرىنشىلىگىن وتكىزدىك. ەندى، الدا جوسپار كوپ. بيىلعى جىلى الدىمەن سەربيادا ءۇشىنشى ەۋروپا چەمپيوناتىن، وسكەمەندە الەم كۋبوگىن، 20-25 مامىردا وڭتۇستىك افريكانىڭ كەيپتاۋن قالاسىندا افريكا بىرىنشىلىگىن، سونداي-اق ەكسپو-2017 كورمەسى كەزىندە تامىز ايىندا استانادا الەم چەمپيوناتىن وتكىزەمىز. ەڭ باستى قۋانىش، قازاق كۇرەسى اشحابادتاعى جابىق كەشەندەگى ازيا ويىندارىنىڭ باعدارلاماسىنا ەندى. مۇنداي جەتىستىككە بۇكىلالەمدىك كۇرەس وداعىنىڭ پرەزيدەنتى نەناد لالوۆيچ پەن ازيا وليمپيادا كەڭەسىنىڭ توراعاسى شەيح احمەد ءال-فاحاد ءال-احمەت ءال-ساباحتىڭ قول قويۋىنان كەيىن جەتىپ وتىرمىز. ەندى قوڭىر كۇزدە وسى جارىستا 70, 90 جانە 90 كەلىدەن جوعارى سالماقتاعى بالۋاندار بەلدەسەتىن بولادى»، – دەيدى سەرىك توكەەۆ.

وسى جيىندا الداعى بەس جىلعا دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى سايلاندى. الەمنىڭ 50-گە جۋىق مەملەكەتىنەن كەلگەن دەلەگاتتار قر اۋىل شارۋاشىلىعى مينيسترلىگى سۋ رەسۋرستارى كوميتەتىنىڭ توراعاسى يسلام ابىشەۆتىڭ كانديداتۋراسىن ءبىر اۋىزدان قولدادى. ول بۇعان دەيىن اتالعان فەدەراتسيانىڭ ۆيتسە-پرەزيدەنتى بولعان. ال سەرىك توكەەۆ ءبىرىنشى ۆيتسە-پرەزيدەنت لاۋازىمىنا تاعايىندالدى. سونداي-اق باس حاتشىلىققا نۇرلىبەك ەرماعامبەتوۆتىڭ كانديداتۋراسى قولداۋ تاپتى.

قر ۇلتتىق قاۋىپسىزدىك كوميتەتىنىڭ توراعاسى كارىم ءماسىموۆتىڭ اكەسى قاجىمقان ءماسىموۆ تە كونگرەستە ءسوز الىپ، قازاق كۇرەسىنىڭ الەمدىك ارەنادا شارىقتاۋىنا ءوز ۇلەسىن قوساتىنىن ايتتى.

ايتا كەتەيىك، قاجىمقان ءماسىموۆ دۇنيەجۇزىلىك قازاق كۇرەسى فەدەراتسياسىنىڭ قۇرمەتتى پرەزيدەنتى.

Abai.kz