استانا. 16 قىرقۇيەك. قازتاگ – قازاقستان پرەزيدەنتى نۇرسۇلتان نازارباەۆ تۇركى تىلدەس مەملەكەتتەر باسشىلارىنىڭ ح ءسامميتى شەڭبەرىندە تۇركيالىق ارىپتەسى ابدوللا گۇلمەن كەزدەستى، دەپ حابارلايدى مەملەكەت باسشىسىنىڭ ءباسپاسوز قىزمەتى.

اق وردا سايتىنداعى حابارلامادا اتاپ كورسەتىلگەندەي، كەزدەسۋ بارىسىندا مەملەكەت باسشىلارى ءسامميتتىڭ كۇن تارتىبىندەگى ماسەلەلەر مەن ىنتىماقتاستىق جايىن قوزعادى.

سونىمەن قاتار، ن. نازارباەۆ تۇركيا رەسپۋبليكاسىنىڭ پرەمەر-ءمينيسترى رەجەپ تايپ ەردوعانمەن كەزدەستى. كەزدەسۋدە ەكونوميكالىق ىنتىماقتاستىق ماسەلەلەرى تالقىلاندى.

سامميت كەزىندە مەملەكەت باسشىسى ءسوز سويلەيدى دەپ جوسپارلانعان. ءباسپاسوز قىزمەتى ونىڭ تاقىرىبىن ناقتىلاماعان.

بۇرىن حابارلانعانداي، سامميت 15-16 قىرقۇيەكتە ىستامبۇلدا ءوتىپ جاتىر.

فورۋم بارىسىندا تۇركى تىلدەس مەملەكەتتەردىڭ باسشىلارى سامميتكە قاتىسۋشى مەملەكەتتەردىڭ اراسىنداعى قاتىناستاردىڭ كەڭ كولەمدى ماسەلەلەرى، ءوزارا قىزىعۋشىلىق تۋدىراتىن حالىقارالىق پروبلەمالار بويىنشا پىكىر الماسىپ، تۇركى كەڭەسىنىڭ حاتشىلىعىن قۇرىپ، ونىڭ باسشىلىعىن بەكىتۋ ماسەلەسىن قارايدى.

ءسامميتتىڭ كۇن تارتىبىنە تۇركى كەڭەسىنىڭ قامقورلىعىمەن قىزمەت ەتەتىن كونسۋلتاتيۆتى-كەڭەسۋشى ورگان - اقساقالدار كەڭەسىن قۇرۋ ماسەلەسى ەنگىزىلىپ وتىر. كەڭەستىڭ قۇرامىنا ءار مۇشە مەملەكەتتەن قۇرمەتتى وكىلدەر كىرەدى دەپ جوسپارلانعان.

بۇدان باسقا، شارا شەڭبەرىندە تاراپتار ن. نازارباەۆتىڭ باستاماسىمەن بيىل مامىر ايىندا استانادا تۇركيا پرەزيدەنتى ابدوللا گۇلدىڭ قازاقستانعا رەسمي ساپارى بارىسىندا اشىلعان تۇركى اكادەمياسىنىڭ قىزمەتىن تالقىلايدى.

ءسامميتتىڭ قورىتىندىسى بويىنشا تۇركى تىلدەس مەملەكەتتەر باسشىلارىنىڭ دەكلاراتسياسى قابىلدانادى.

ەسكە سالا كەتەيىك، قازاقستان پرەزيدەنتىنىڭ باستاماسىمەن 2009 جىلى قازاندا ناحيچەۆاندا جاڭا حالىقارالىق قۇرىلىم – تۇركى تىلدەس مەملەكەتتەر ىنتىماقتاستىعىنىڭ كەڭەسىن قۇرۋ تۋرالى كەلىسىمگە قول قويىلدى. بۇل قۇجاتقا قول قويۋ ءتىلى مەن مادەنيەتى جاقىن حالىقتاردىڭ بىرلىگىن كۇشەيتۋگە باعىتتالعان جالپىتۇركىلىك ايماقتىق بىرلەستىك قۇرۋعا نەگىز بولدى.