قازاق باسىلىمىنىڭ قاراشاڭىراعى سانالاتىن، 96 جىلدىق تاريحى بار "جاس الاش" گازەتىنىڭ جۋرناليستەرى كومانداسىمەن قىزمەتتەن كەتتى. رىسبەك سارسەنبايۇلى باسقارىپ كەلگەن بۇل ۇجىم نەگە مۇنداي قادامعا بارىپ وتىر. بۇگىن "جاس الاش" گازەتىنىڭ جۋرناليستەرى مەن قىزمەتكەرلەرى رەسمي مالىمدەمە جاريالادى. ءبىز اتالعان مالىمدەمەنى وقىرمان نازارىنا تولىعىمەن ۇسىنىپ وتىرمىز. 

Abai.kz اقپاراتتىق پورتالى

«جاس الاش» گازەتى جۋرناليستەرى

مەن قىزمەتكەرلەرىنىڭ

مالىمدەمەسى

حالىقتىڭ گازەتى – «جاس الاشتىڭ» باسىنا بۇلت ءۇيىرىلدى. بيلىكتىڭ ۇزىن قۇرىعى بىزگە دە جەتتى.

«جاس الاشتىڭ» 96 جىلدىق تاريحىن ايتپاعاننىڭ وزىندە، باسىلىمنىڭ بۇگىنگى قوعامداعى ورنى مەن ءرولىن جانە ەلدەگى ساياسي، الەۋمەتتىك، ۇلتتىق پروبلەمالاردى، ونىڭ سەبەپتەرىن، سالدارلارىن تالداپ جازاتىنىن جاقسى بىلەسىزدەر. ءسوز بوستاندىعىنىڭ شەڭبەرى تارىلدى. ەركىن وي مەن سانالى كوزقاراس ءۇشىن، ازاماتتىق قۇقىقتارىن پايدالانعانى ءۇشىن ازاماتتارىمىز قۋدالانىپ، سوتتالۋدان كوز اشپاي كەلەدى. ادىلەتسىزدىككە قارسى تۇرۋ مۇمكىن بولماي بارادى. تاۋەلسىزدىككە، مەملەكەتتىلىككە زالالىن تيگىزەتىن بيلىكتىڭ ساياساتىنا، زاڭدارىنا نارازىلىق تانىتقانداردى  جاۋ ساناۋ ادەتكە اينالدى. وتانداستارىمىز شاراسىزدىقتان ءوزىن ءوزى ورتەۋگە كوشتى. حالىقتىڭ ءسوزىن سويلەيتىن، تالابىن، كوزقاراسىن، پىكىرىن بىلدىرەتىن، جانايقايىن جەتكىزەتىن تاۋەلسىز ءۇش-ءتورت-اق باسىلىم قالعانىن، سونىڭ ءبىرى «جاس الاش» ەكەنىن جاقسى بىلەسىزدەر. بۇل گازەتتىڭ 2006 جىلعى قاندى اقپاننان بەرى تالاي قيىندىقتى باستان كەشىرگەنىن، بىراق باعىتىنان قايتپاي، ادىلەتتىلىك، اقيقات جولىندا ايقاسىپ، شايقاسىپ جۇرگەنىن كورىپ كەلەسىزدەر. اقشاعا قىزىقتىرىپ ساتىپ الۋ، قورقىتىپ تارتىپ الۋ، سوت ارقىلى قىسىم جاساپ، ميلليونداپ ايىپ تولەتتىرىپ السىرەتۋ، جۋرناليستەردىڭ اراسىندا ىرىتكى سالۋ، ارقيلى قاۋەسەتتەر تاراتۋ سياقتى بيلىكتىڭ قۇيتىرقى ارەكەتتەرىنىڭ ءبارىن باستان وتكەردىك. يدەيالىق جەتەكشىمىز رىسبەك سارسەنباي ۇجىمدى توپتاستىرا، قايراتتاندىرا ءبىلدى.

 گازەتتىڭ قوعامدا الاتىن وزىندىك ورنى، سالماعى بار. مۇنى باسقانى بىلاي قويعاندا، بيلىكتەگىلەردىڭ ءوزى مويىندايدى. اقيقاتتان قورقاتىن،  جەمقورلىققا، جاعىمپازدىق پەن ساتقىندىققا، بىلىق-شىلىققا باتقان، مەملەكەتتى مايلى جىلىككە اينالدىرعان ءىرىلى-ۇساقتى شەنەۋنىكتەر «جاس الاشقا» ولەردەي ءوش. كەز- كەلگەن ساتتە تالاپ تاستاۋعا ءازىر. سىنعا ىلىككەندەردى ايداپ سالىپ، سوتقا سۇيرەلەۋدى توقتاتقان ەمەس. باس رەداكتور ءبىزدىڭ قورعانىمىز، ايبىنىمىز بولدى. ر.سارسەنبايۇلى دالەلدى، جان-جاقتى زەرتتەلگەن، ار-نامىسقا تيمەيتىن، ەشجاققا بۇرا تارتپايتىن ماتەريالدارعا كەڭىنەن جول اشتى، ەركىن جازاتىنىمىز دا سوندىقتان. جوعارىدا وتىرعان جۋاندار تاۋەلسىز باسىلىمداردى جويىپ، وي ەركىندىگىن، ءسوز بوستاندىعىن تۇنشىقتىرۋدىڭ سان ءتاسىلىن قولدانۋدا. «جاس الاشتى» ەسكى تاسىلدەرمەن جوق ەتۋ مۇمكىن بولماعاندىقتان، ىشتەن ىرىتكى سالۋعا كوشكەنى ەندى كۇمان تۋعىزبايدى. رىسبەك سارسەنبايدى باس رەداكتورلىق قىزمەتتەن كەتىرۋ، ونى گازەتتەگى قانداي دا ءبىر باسشىلىق جۇمىسقا جولاتپاۋ ارقىلى «جاس الاشتى» جۋاسىتۋدى، ونىڭ باعىتىن وزگەرتۋدى، قىزىقسىز ەتۋدى، اقىرىندا وقىرماندارىنان اجىراتۋدى كوزدەپ وتىر. قازىرگى ارەكەتتەر سونىڭ بەلگىسى.  

باسىلىمدى ىشتەن ءىرىتىپ، تۇقىرتارداي «جاس الاش» نە جازىپ قويدى؟ كىمدەرگە ۇنامادى؟ مۇنى وقىرماندار جاقسى ءبىلۋى ءتيىس. ارىعا بارماي-اق قويايىق، سوڭعى جىلدارداعى جايتتارعا توقتالايىق. قازاق جەرىن شەتەلدىكتەرگە جالعا بەرۋ ماسەلەسى قوزعالعاندا-اق «جاس الاش» العاشقىلاردىڭ ءبىرى بولىپ قارسىلىق تانىتتى. فەرمەرلەردى، تاريحشىلاردى، ساياساتكەرلەردى، زيالىلاردى جانە ۇلت جاناشىرلارىن شاقىرىپ، دوڭگەلەك ۇستەل وتكىزدى. ولاردىڭ وي-پىكىرىن جاريالادى. ماكس بوقاەۆ پەن تالعات ايانعا ارا ءتۇستى. ولاردى «سىرا كورولىمەن» بايلانىستىرۋدىڭ قيانات ەكەنىن جازدى.

2016 جىلدىڭ 21 مامىرىنداعى الماتىدا وتكەن ميتينگىدە «جاس الاشتىڭ» التى بىردەي قىزمەتكەرى قاماۋعا الىندى. باسىلىم رەداكتورى ر.سارسەنبايۇلىن سول كۇنى تۇنگى ساعات 12 شاماسىندا سوتتاپ، ايىپپۇل ارقالاتتى.

«جاس الاش» ۇشتىلدىلىكتى تىقپالاعان ءبىلىم بەرۋ رەفورماسىنداعى جونسىزدىكتەرگە دە قارسى تۇردى. ەكى دۇركىن قوعامدىق تىڭداۋ وتكىزدى. ءبىلىم سالاسىنىڭ بىلىكتى ماماندارىنا، عالىمدارعا ءوز بەتىنەن ورىن بەردى. ولاردىڭ ورنىقتى، دالەلدى ۋاجدەرىن جۇرتقا جەتكىزدى. ۇشتىلدىلىك يدەياسىنىڭ قازاق ۇلتىنا، ونىڭ كەلەشەگىنە جاسالعان قيانات ەكەنىن دالەلدەپ كورسەتتى.

 بيلىكتىڭ اتا زاڭنىڭ 26-بابىنا تولىقتىرۋ، تۇزەتۋ ەنگىزۋدى كوزدەگەن ارام ويى – قازاقتىڭ جاۋىرىنىنا قادالعان قانجارمەن بىردەي ەدى. «جاس الاش» مۇنى وزگەلەردەن بۇرىن سەزدى. ءنومىر سايىن ماقالا جاريالادى. «اركىمنىڭ» ەكىنشى اتى –  ازىرەيىل» تاقىرىبىمەن دوڭگەلەك ۇستەل وتكىزدى. 26-باپتىڭ وزگەرۋى – قازاقتىڭ سوڭعى تايانىشى­ – جەردەن ايرىلىپ قالۋ قاۋپىن تۋعىزاتىنىن قاتاڭ ەسكەرتتى.

«جاس الاش» پرەزيدەنتتىڭ ءوزى مەن ونىڭ اينالاسىن جانە بيلىكتى وزدەرىنىڭ مەنشىگى سانايتىن وتباسى مۇشەلەرىن دە سىن تەزىنە الدى. قىلت ەتكەن قىلىعىن، جىلت ەتكەن مىنەزىن قالت جىبەرمەي قاداعالاپ وتىردى.

  وزدەرىڭىز بىلەسىزدەر، سوڭعى ۋاقىتتا بيلىك ءسوز بوستاندىعىن شەكتەۋگە، تاۋەلسىز باسىلىمداردى جوق ەتۋگە اشىق كىرىستى. ارەكەتتەرى شەكتەن شىقتى. جۋرناليستەر وداعى عيماراتىنىڭ تالقاندالۋى، اكەلى-بالالى ماتاەۆتاردىڭ جالاعا ىلىگۋى، «تريبۋنا: ساياسي قالام» گازەتىنىڭ باس رەداكتورى جانبولات مامايدىڭ قامالۋى – سونىڭ ايعاعى.

 ەندى مىنە، «جاس الاشتىڭ» باس رەداكتورىن سوتسىز، ءتيىستى ورىنداردىڭ ءىس قوزعاۋىنسىز، قىزمەتتەن كەتىرۋ،  ونى گازەتكە جولاتپاۋ ارقىلى دىمىن ءوشىرۋ ءتاسىلى قولدانىلدى. ءبىز گازەتتى ساقتاپ قالۋ ءۇشىن قۇرىلتايشىلارمەن كەلىسىمگە كەلۋگە تىرىستىق. ورتاق مامىلە جاساۋعا ۇمتىلدىق. الايدا «جاس الاش» جشس پرەزيدەنتى ا.رىسبەكوۆ   «2017 جىلدىڭ 16 اقپانىنان باستاپ ن. سارسەنباەۆ  مىرزانى باس رەداكتوردىڭ مىندەتىن اتقارۋشى رەتىندە ءۇش ايلىق سىناق مەرزىمىمەن جۇمىسقا قابىلدانسىن» دەگەن بۇيرىق شىعاردى. سىناق مەرزىمىمەن جۇمىسقا قابىلدانعان ادام باس رەداكتوردىڭ مىندەتىن قالاي اتقارماق؟ نۇرلان باس رەداكتوردىڭ بالاسى بولعاندىقتان اكەسىنىڭ ورنىن باسقان ەكەن عوي، اكەسىنىڭ قالاۋى سولاي بولسا، ول اكە جولىن سونىڭ باعىتىمەن جالعاستىرار دەپ ويلاعان وقىرمان  تاراپىنان نارازىلىق تۋماس دەگەن ماقساتتى كوزدەسە كەرەك. گازەت جۇمىسىنا قاتىسىپ كورمەگەن ادام شىعارماشىلىق ۇجىمعا قالاي باسشىلىق ەتپەك؟ رەداكتسيانى ءتۇن جامىلىپ، جۋرناليستەر جوق كەزدە، كوشىرىپ جىبەرۋلەرى دە قۇيتىرقىلىق. بۇرىنعى ورنىندا وتىرا بەرۋگە گازەتتىڭ قارجىلىق جاعدايى جەتكىلىكتى ەدى. مىنە، وسى جاعدايلار ءبىزدىڭ جاڭا باسشىلىققا دەگەن سەنىمىمىزدى جوعالتتى.

  ء بىز وقىرمانعا ادال قىزمەت ەتتىك. شىندىقتى جەتكىزۋدىڭ قيىندىعى مەن قاۋىپ-قاتەرىن تالاي كوردىك. ءبىز «بارىنەن دە اقيقات قىمبات!» دەگەن باستى ۇرانىمىزدى بەرىك ۇستاندىق. ءدال مىناداي قياناتقا، جۋرناليستەر پىكىرىمەن ساناسپايتىن، ولاردى قادىرلەمەيتىن ادامداردىڭ وزىمبىلەرمەندىگىنە كونە المايمىز!  

   ءبىز باس رەداكتور ر.سارسەنبايدىڭ  قاراشا ايىنا دەيىن بىزبەن بىرگە جۇمىس ىستەۋىنە، ءسويتىپ بيىلعى جىلعا گازەتكە جازىلعان جيىرما ءتورت مىڭعا جۋىق وقىرمانىمىزدىڭ ءۇمىتىن، سەنىمىن اقتاۋعا كەدەرگى كەلتىرمەۋدى تالاپ ەتكەن ەدىك. تالابىمىز ورىندالمادى. سوندىقتان ءبىز ءوز ارىمىزدىڭ تازالىعى ءۇشىن «جاس الاشتىڭ» قازىرگى باعىتىنان تايماسىنا، ادىلەتتىلىك پەن اقيقات جولىنداعى كۇرەسىنەن اينىماسىنا كۇمانىمىز كۇشەيگەندىكتەن جانە وسىنداي ءجونسىز وزگەرىسكە نارازىلىق رەتىندە جۇمىستان كەتەتىنىمىزدى مالىمدەيمىز!                        

ءامىرحان مەڭدەكە، «جاس الاش» گازەتى باس رەداكتورىنىڭ ءبىرىنشى ورىنباسارى،

سانسىزباي وكەنۇلى، باس رەداكتوردىڭ ورىنباسارى،

اسىلحان ءابدىرايىم، ءفوتوتىلشى، رەداكتسيالىق القانىڭ مۇشەسى،

ءادىل ۇزاقباي، جۋرناليست،

قۋانىش نۇردانبەكۇلى، جۋرناليست،

مەرۋەرت حۋساينوۆا، جۋرناليست،

عالىم بورانباەۆ، ديزاينەر-سۋرەتشى،

الىبەك ءابدىراش، قاراعاندى وبلىسىنداعى مەنشىكتى ءتىلشى،

ءسانيا تويكەن، اتىراۋ، ماڭعىستاۋ وبلىستارىنداعى مەنشىكتى ءتىلشى،

الماس قۇدايبەرگەنوۆ، گازەت قىزمەتكەرى،

نۇرتاي بولەكباەۆ، گازەت قىزمەتكەرى

Abai.kz