1. مي ءومىر مەن قيال اراسىنداعى شەكتى كورمەيدى 

ءسىز ويلاعان ءار نارسەدەن مي اسەرلەنەدى. ول ءۇشىن قيال مەن ءومىردىڭ شەگى جوق. سوندىقتان پلاتسەبو اسەرى بولۋى ابدەن مۇمكىن. 

ەگەر مي ءدارى ءىشتىڭىز دەپ قابىلداسا (قانت قوسىلعان كامپيت ەمەس), وندا سوعان ساي جاۋاپ قايىرادى. پلاتسەبو ءىشىپ الاسىز دا، ونى اسپيرين دەپ ويلاپ قالاسىز، مي بىردەن اعزاعا دەنە قىزۋىن تومەندەت دەپ بۇيىرادى. 

نوتسەبو دا ءدال وسىلاي اسەر ەتەدى. بىراق كەرى باعىتتا. ەگەر يپوحوندريك كەشكى جاڭالىقتاردى كورىپ، جاڭا اۋرۋ شىعىپتى دەگەندى ەستىسە، سول اۋرۋدىڭ بەلگىلەرىن سەزىنە باستاۋى مۇمكىن. 

جاقسى جاڭالىق – ەگەر الەمگە جارقىن كوزبەن قاراساڭىز، وندا ءوزىڭىزدى باقىتتى سەزىنەسىز. قان قۇرامىنداعى سەروتونين (قۋانىش گورمونى) ەرەكشە كوبەيە تۇسەدى. ءاربىر ىزگى وي نەمەسە كەلەشەك تۋرالى جارقىن ارماندار ءسىزدىڭ احۋالىڭىزدى بۇگىن جانە وسى جەردە جاقسارتا تۇسەدى.

2. نەنى كوپ ويلاساڭىز، سونى كورەسىز 

نە تۋرالى ويلاساڭىز دا، ول ءسىزدىڭ ومىرلىك تاجىريبەڭىزدىڭ تۇعىرى بولادى. ەگەر جاڭا كولىك ساتىپ الساڭىز، كوشەدەن وسىنداي ماركالى كولىكتى كوپ كورەتىن بولاسىز. ساتىپ العان سوڭ ءوز كولىگىڭىز تۋرالى الدەقايدا كوپ ويلايسىز. مۇنى ءبىلۋدىڭ نە ماڭىزى بار؟ كەز كەلگەن كۇيزەلىستەن شىعۋ ءۇشىن ويلاۋ جۇيەڭىزدى وزگەرتۋ كەرەك. ەكىنشى جاعىنان، ساياسي ناۋقاندى تالداعىڭىز كەلسە، ءار ءتۇرلى باق-تىڭ جاڭالىعىن قارايسىز عوي. ءسىزدىڭ پىكىرىڭىزگە ۇيلەسەتىنىن جاقتايسىز. 

تاعى دا ءبىر ەسكەرەرلىك جايت، ادامدار تەز ارادا توپتاسىپ كەتەتىنىن بايقادىڭىز با؟ كۇلىپ جۇرەتىن ادامدار وزدەرى سەكىلدى كۇلىپ جۇرەتىندەرمەن تەز ءتىل تابىسادى. يپوحوندريكتەر وزدەرىندەي يپوحوندريكتەردى تاۋىپ الادى. سايكەستىك پە؟ جوق. ءومىرىڭىز وزگەرسىن دەسەڭىز، ويىڭىزدى ءتۇپ-تامىرىمەن وزگەرتىڭىز.

3. مي نەگىزىنەن اۆتوپيلوتتا جۇمىس ىستەيدى 

ورتا ەسەپپەن العاندا ادام ميى ءبىر كۇندە 60 مىڭ ويدى ەلەكتەن وتكىزەدى. بىراق سونىڭ 40 مىڭى جاي وي بولىپ قالا بەرەدى. ونى ساناڭىزدان كەشە دە وتكىزگەنسىز. مىنە، وسىنداي ويلاۋدان تومەنشىكتەۋدى ىڭعايلى ساناۋ، كەرى ويدىڭ تۇبىنە ءتۇسىپ كەتۋ قيىن ەمەس. ميداعى جامان ويدى الاستاۋ ءۇشىن ادەتتەگى ورىندى بوتەن جاعدايمەن الماستىرىپ وتىرۋدىڭ پايداسى وسىدان بارىپ شىعادى. جامان وي كۇيزەلىسكە جەتەلەيدى. ادام وزىنەن ءوزى الاڭداي بەرەدى. ءتپىتى سەبەپ بولماسا دا ۇرەي بويىن بيلەپ تۇرادى. ءسويتىپ يممۋنيتەتىن كۇيرەتەدى. ويتكەنى، اعزا بارىنەن اسەرلەنەدى. 

ءوز ميىڭىزدى جاتتىقتىرىڭىز. ساناڭىزدا ىلعي جاقسى نارسەنى ساقتاۋعا، كورۋگە تىرىسىڭىز. نەعۇرلىم كوبىرەك تىرىسساڭىز، سوعۇرلىم ناتيجەلى بولادى. ومىرگە سانالى تۇردە قاراڭىز. بەيسانالى ۇدەرىستىڭ ءبارىن ءوز قاداعالاۋىڭىزعا الىڭىز. بۇل تاجىريبەنىڭ ەڭ سوڭعى نۇكتەسى – ۇندەمەس ويدىڭ ءبارى تەك جاقسىلىق بولاتىن كۇنگە جەتۋ.

4. الما-كەزەك ءوشىپ تۇرۋ – ومىرلىك ماڭىزى بار قۇبىلىس

كۇنى بويى مىڭداعان جامان ويدىڭ تۇنەگىندە باتۋىڭىز مۇمكىن. سوندىقتان اراسىندا ءوشىپ تۇرۋ ماڭىزدى. بۇل يممۋندىق جۇيەگە تىنىم بەرەدى. ءسىزدىڭ دەنىڭىزدى ساۋ، باقىتتى ەتە تۇسەدى. 
 بىرنەشە مينۋتقا ميدى تىنشىتىپ ادەتتەنۋ كەرەك. ونىڭ ەڭ ۇتىمدى ءتاسىلى – مەديتاتسيا. ساناڭىزدى پايدالى، ءتيىمدى قۇرالعا اينالدىرادى. 

تاعى دا. دەمالىس تۋرالى. بەلسەندى دەمالىستى تاڭداڭىز. شاڭعى، دايۆينگ، تاۋعا شىعۋ. كورگەنىڭىزدەن كوبىرەك ءلاززات العان سايىن مي تەز تازالانادى.

5. ميدى وزگەرتە الاسىز. ءتاني تۇرعىدا.

نازار اۋدارۋعا ءتيىستى جۇمىسپەن اينالىسىپ جاتساڭىز، ميىڭىز ءاپ-ساتتە جاڭا جۇيكە تالشىقتارىنىڭ بايلانىسىن بەلسەندى تۇزەدى. مۇنداي ۇدەرىستى بيولوگتار نەيروپلاستيكا دەپ اتايدى. 

ول بىلاي جۇزەگە اسادى. ارىقتاي المايمىن دەپ ويلاساڭىز، ۋاقىت وتكەن سايىن وسى ويعا بەكي تۇسەسىز. وسى بەيسانالى ويدى: «مەن كەرەمەت كۇيدەمىن» دەگەن ويمەن الماستىرساڭىز، مي كۇندەلىكتى سول ويعا جاڭا نەيروندى تالشىقتاردى بايلاي بەرەدى. جاڭا مۇمكىندىكتەردى كوپ بايقايتىن بولاسىز. بەيسانالى تۇردە جاڭا كوكجيەككە قادام باساسىز. 

ءوز ساناڭىزدى وزىڭىزگە باعىندىرا الاسىز. قالاعان نارسەڭىزدىڭ بارىنە قول جەتكىزۋىڭىزگە مۇمكىندىك بار. باستىسى – سوعان سەنىڭىز! ويتكەنى، كەز كەلگەن فيزيولوگيالىق ۇدەرىس ويدان باستالادى. وي ءسىزدىڭ ساناڭىزدا تۋادى.

اۋدارعان شىنار ءابىلدا

Facebook-تەگى پاراقشاسىنان