سارسەنبى, 28 شىلدە 2021
بيلىك 2820 0 پىكىر 5 قاڭتار, 2017 ساعات 09:44

الدا – ۋنيۆەريسادا. دايىندىق قالاي؟

يمانعالي تاسماعامبەتوۆ دۇنيەجۇزىلىك قىسقى ۋنيۆەرسيادانى وتكىزۋدىڭ دايىندىعىن تەكسەردى

كەشە, ياعني قاڭتاردىڭ 4-ءى كۇنى، قازاقستان رەسپۋبليكاسى پرەمەر-ءمينيسترىنىڭ ورىنباسارى، 28-ءشى دۇنيەجۇزىلىك قىسقى ۋنيۆەرسيادا-2017 ۇيىمداستىرۋ كوميتەتىنىڭ توراعاسى يمانعالي تاسماعامبەتوۆ الماتى قالاسىنداعى اۋقىمدى سپورتتىق شارانى وتكىزۋدەگى نىسانداردىڭ سوڭعى دايىندىعىن تەكسەرىپ، كوشپەلى كەڭەس وتكىزدى.

ۋنيۆەرسياداعا دايىندىق جۇمىستارى اياقتالۋعا تايادى. بۇل ءوز كەزەگىندە بارلىق قىزمەتتەر تاراپىنان مۇقيات تەكسەرۋدى قاجەت ەتەدى. كولىك قىزمەتى مەن جول قاۋىپسىزدىگىن ساقتاۋ – وسى باعىتتاعى جۇمىستىڭ جاۋاپتى بولىگى سانالادى.

«كولىك لوگيستيكاسىن ۇيىمداستىرۋعا كەلسەك، وندا ءبىزدىڭ ەقىۇ ساميتىنە جانە 2011 جىلعى قىسقى ازيا ويىندارىنا دايىندىقتى جۇرگىزۋدە تاجىريبەمىز بار. مۇنى دەلەگاتتارعا، سپورتتىق كوماندالارعا قىزمەت كورسەتۋدە قولدانۋعا بولادى. بۇعان قاراماستان، الاۋ ەستافەتاسىن وتكىزۋ كەزىندە كولىك قوزعالىسىنىڭ ارتۋىنا بايلانىستى باسقا دا سۇراقتار تۋىندايدى. بۇل ورايدا، ەلىمىزدەگى قالالاردىڭ، ونىڭ ىشىندە استانا مەن الماتى قالالارىنىڭ تۇرعىندارى ءۇشىن قولايسىزدىقتار تۋدىرماۋ ماقساتىندا كولىك قوزعالىسىن رەتتەۋگە قوسىمشا شارالار قابىلداۋ قاجەت»، - دەدى ۆيتسە-پرەمەر كوشپەلى كەڭەستە.

سپورتتىق عيماراتتاردىڭ دايىندىعىنا قاتىستى يمانعالي تاسماعامبەتوۆ نەگىزگى نىساندارداعى جۇمىستاردىڭ اياقتالعانىن ەسكەرە وتىرىپ، ولاردى بەلگىلەنگەن تالاپتار مەن ستاندارتتارعا جانە پايدالانۋعا بەرۋ قاۋىپسىزدىگىنە سايكەس تولىق جابدىقتاۋ قاجەتتىگىن ەسكەرتتى. سونىمەن قاتار، ۆيتسە-پرەمەر دايىندىق جۇمىستارىنىڭ جاقسى جۇرگىزىلىپ وتىرعانىن ايتا كەلە، الماتى قالاسىنىڭ اكىمى باۋىرجان بايبەككە قۇزىرلى قالالىق ۆەدومستۆولار مەن قىزمەتتەرمەن بىرلەسىپ قالىڭ كوپشىلىكتىڭ قاتىسۋىمەن وتەتىن نىسانداردى پايدالانۋ ەرەجەسى مەن قاۋىپسىزدىك تالاپتارىن مىندەتتى ورىنداۋ بويىنشا جۇمىسشى كوميسسيالاردى وتكىزۋدى تاپسىردى. 

سونداي-اق، قر پەرمەر-ءمينيسترىنىڭ ورىنباسارى قىسقى ۋنيۆەرسيادانىڭ ۇيىمداستىرۋ كوميتەتى وكىلدەرىنىڭ قاتىسۋىمەن جارىستار وتكىزىلەتىن ءاربىر نىساننىڭ فۋنكتسيونالدىق تالاپتارىنىڭ ورىندالۋ ماسەلەلەرىن پىسىقتاۋ مىندەتىن قويدى. جاڭا سپورت عيماراتتارىنا ىرگەلەس اۋماقتى كوگالداندىرۋ جانە اباتتاندىرۋ جوباسىنا سايكەس اباتتاندىرۋ، جارىقتاندىرۋ، بەزەندىرۋ جۇمىستارىن ورىنداۋ جانە كولىك تۇراقتارىن جابدىقتاۋ تاپسىرىلدى.

ء«بىزدىڭ سپورتشىلارىمىزدىڭ دايارلىعى مەن شارانىڭ سالتاناتتى اشىلۋ ءراسىمىنىڭ ماڭىزدىلىعىنا ەرەكشە توقتالعىم كەلەدى. وسىناۋ ءىرى الەمدىك سايىس ۇلكەن ماڭىزعا يە جانە ول سپورتپەن شۇعىلدانۋ جانە سالاۋاتتى ءومىر سالتىن ءتيىمدى ناسيحاتتاۋدى قامتاماسىز ەتۋى ءتيىس»، - دەدى قر پرەمەر-ءمينيسترىنىڭ ورىنباسارى.

28-ءشى دۇنيەجۇزىلىك قىسقى ۋنيۆەرسيادانىڭ باستالۋىنا ءبىر ايدان از ۋاقىت قالدى. ويىنداردى وتكىزۋگە دايىندىقتىڭ ۇيىمداستىرۋ كەزەڭى اياقتالۋعا جاقىن. وسىعان وراي، يمانعالي تاسماعامبەتوۆ دايىندىقتى تاعى ءبىر پىسىقتاپ، سپورتتىق نىساندار مەن عيماراتتاردىڭ، قوناق ۇيلەردىڭ، مەيرامحانالاردىڭ، كولىك جانە كوممۋنيكاتسيا جۇيەسىنىڭ، شەتەلدىك دەلەگاتتار مەن كوماندالارعا، تۋريستەر مەن قالا قوناقتارىنا قىزمەت كورسەتەتىن باسقا دا قالا نىساندارىنىڭ ۋاقىتىلى دايىن بولۋىن قامتاماسىز ەتۋ ءۇشىن قوسىمشا شارالار قابىلداۋ قاجەتتىگىن اتادى.

سونىمەن قاتار، يمانعالي تاسماعامبەتوۆ «سۇڭقار» حالىقارالىق شاڭعى ترامپليندەر كەشەنىندە سپورتشىلار مەن قوناقتاردى قارسى الۋ دايىندىعىن تەكسەرىپ، ۋنيۆەرسيادا بارىسىندا قولدانىلاتىن تەحنيكا، ۆولونتەرلىق توپ، اقپاراتتىق ورتالىق جانە ۋنيۆەرسيادا اتريبۋتتارىمەن تانىستى.

Abai.kz

0 پىكىر