سونىمەن مىنە، 2017 جىلدىڭ العاشقى كۇندەرى دە باستالىپ كەتتى. رەسمي كۇنتىزبە بويىنشا عاسىردىڭ تاعى ءبىر پاراعى اشىلىپ، جۇرت جاڭا جىلدى قارسى الىپ، تىنىس تاۋىپ جاتىر. ناقتىراق ايتساق، قازاقستاندىقتار جاپپاي دەمالىستا. الايدا ادامزات قوعامىنىڭ قاربالاس تىرلىگى  توقتاپ تۇرعان جوق، ءتىپتى، قاڭتاردىڭ 1-ءى كۇنى-اق شەتىن وقيعالاردىڭ شەتى كورىنىپ ۇلگەردى. بۇل، ارينە، بولەك اڭگىمە. قازىر كوپشىلىكتى اعىمداعى جىلدىڭ الدا بولۋى ىقتيمال الەۋمەتتىك-تۇرمىستىق ماسەلەلەرى تولعاندىرىپ وتىر. ماسەلەن كوپتىڭ ويىنداعى سۇراق: كۇنكورىس دەڭگەيىن قامتاماسىز ەتەتىن قاراجاتتىڭ كولەمى قانداي بولادى؟ زەينەتاقى، جاردەماقى توقتاپ قالماي ما؟، ت.ب. وسىلاردىڭ بارىنە شەتىنەن جاۋاپ بەرىپ كورەلىك. ءيا، جاڭالىقتىڭ كوكەسى تاقىرىپتا تۇرعان ماسەلەدە. ءبىلىم سالاسى بيىل ءۇش تىلگە كوشەدى...

ەڭ تومەنگى ايلىق پەن زەينەتاقى وسەدى. بىردەن ەمەس، بىرتىندەپ...

ەڭ تومەنگى ەڭبەكاقى دەڭگەيىن بەلگىلەگەن «2017 -2019 جىلدارعا ارنالعان رەسپۋبليكالىق بيۋدجەت» تۋرالى زاڭعا بايلانىستى تومەنگى زەينەتاقى 28 148 تەڭگە، تومەنگى كۇنكورىس مولشەرى 24 459 تەڭگە بولادى. دۇنيەگە كەلگەن ءار سابيگە بەرىلەتىن اقشا 20 پايىزعا وسپەك، بىراق بىردەن ەمەس، بىرتىندەپ. زەينەتاقى دا بىردەن وسپەيدى. 1 – قاڭتاردان باستاپ زەينەتاقىعا 9 پايىز، شىلدە ايىندا 11 پايىز ۇستەمە قوسىلادى.

ابايلاپ ءجۇرىڭىز، ايىپپۇل كۇشەيدى

بيىل اۆتوكولىك يەلەرىنە جول ەرەجەسىن بۇزباي، ءتارتىپتى قاتاڭ ساقتاپ جۇرۋگە تۋراپ كەلىپ تۇر. ويتكەنى ايىپپۇل اسپانداماق. ماسەلەن، الىپ-ۇشىپ اسىعىپ، القىن-جۇلقىن جۇرەتىن جۇرگىزۋشى جىلدامدىقتى ساعاتىنا 10-20 شاقىرىمعا ارتتىرسا، 22 690 تەڭگە، ايالدامالار مەن اۆتوتۇراقتاردا ءتارتىپ بۇزسا، 11 345 تەڭگە ايىپپۇل تولەمەك. تولەمەسەڭ، ماي قىزمەتكەرى توبەڭدى ويادى.

جىلداعىداي تاعى دا كوممۋنالدىق قىزمەت تۇرلەرى قىمباتتايدى

بيىل دا جىلداعىداي  كوممۋنالدىق قىزمەت تۇرلەرى قىمباتتايدى. اتاپ شىعايىق. ەلەكتر قۋاتىنا تولەيتىن قاراجاتىڭىز – 5,9 پايىزعا، سۋىق سۋعا بەرەتىنىڭىز – 7,2 پايىزعا، جىلۋ قۋاتىنا «جىلجىتاتىن» اقىڭىز – 10,2 پايىزعا، ىستىق سۋعا «ىسىراپ» قىلاتىن تەڭگەڭىز – 11,8 پايىزعا وسپەك.  

ورىستىڭ "ارباسىنا" وتىرامىز

قىمباتشىلىق ىشىمدىككە اۋەس جاندار مەن شىلىمقورلاردى دا اينالىپ وتپەيتىن سياقتى. ەندى ەڭ ارزان تەمەكىنىڭ ءوزى 300 تەڭگەگە ساتىلماق. ال، ءبىر ليتر «وتتى سۋ»  - 1560, ونىڭ جارتى بوتەلكەسى – 780 تەڭگەگە شىقتى. «وتتى سۋدان» تارتىپ جىبەرىپ، ساياسات سوعاتىندار ءۇشىن تاعى ءبىر اڭگىمە: ەۋرازيا ەكونوميكالىق وداعىنىڭ اياسىنان تىس ەلدەن اۆتوكولىك ايداپ كەلە قالساڭىز قالتاڭىزدان قاعىلاسىز. نەگە؟ سەبەبى ەاەو شەڭبەرىنەن شىعانداپ بارىپ اكەلگەن كولىگىڭىزدە دابىل قۇرىلعى بولمايدى. ول نە ءۇشىن كەرەك دەرسىز؟ 1-قاڭتاردان باستاپ جولاۋشىلار تاسىمالدايتىن بارلىق اۆتوكولىك تۇرىندە توتەنشە شۇعىل قىزمەت ورتالىعىمەن بايلانىساتىن اۆتوماتتى دابىل قۇرىلعىسى ورناتىلۋى ءتيىس. ول قۇرىلعىنى ەۆاك جۇيەسى عانا جاسايدى. دەمەك، ەكونوميكالىق وداققا مۇشە ەمەس ەلدەردەن ماشينا ساتىپ الۋدىڭ ەندىگە قاجەتى شامالى. ال بۇل وداققا مۇشە ەلدەر بۇدان بىلاي تەك رەسەيدىڭ «ارباسىنا» عانا اياق ارتپاق دەگەندى بىلدىرسە كەرەك.     

 قازاق ادەبيەتى مەن قازاقستان تاريحى عانا قازاق تىلىندە وقىتىلادى

وسى جىلى بيلىك ۇشتۇعىرلى ءتىل شارۋاسىنا شىنداپ كىرىسەتىنىن كورسەتىپ وتىر. بيىل ەلىمىزدەگى وقۋ ورىندارى – مەكتەپتەر ءۇش تىلگە كوشەدى. قازاق ادەبيەتى مەن قازاقستان تاريحى عانا قازاق تىلىندە وقىتىلادى. 2, 5 جانە 7سىنىپ وقۋشىلارى اپتاسىنا بەس رەت وقيدى. سوعان بايلانىستى بولسا كەرەك، وقۋشىلار جازعى كانيكۋلعا كەشىرەك شىعادى. جوعارى وقۋ ورنىنا تۇسكىسى كەلەتىن تالاپكەرلەر الدىمەن مەكتەپتە، سودان سوڭ قالاعان وقۋ ورنىندا ەمتيحان تاپسىرادى. ۇبت-نىڭ فورماسى وزگەرەدى. وقۋشىلار اسكەري دايىندىق ساباعىندا كولىك جۇرگىزۋدى ۇيرەنە باستايدى. ءسويتىپ 18 جاسىندا كولىك جۇرگىزۋگە جارامدى كۋالىك الىپ شىقپاق.

 «نۇرلى جەر» باعدارلاماسى. نۇرلاناتىن سياقتىمىز!

بيىل ارەدىك ايتىلىپ قالىپ جۇرگەن «نۇرلى جەر» باعدارلاماسى ىسكە قوسىلادى. اتالعان باعدارلاما شىنىمەن دۇرىس جۇمىس ىستەپ، جولعا قويىلسا، 2031 جىلعا دەيىن جارتى ميلليون قازاقستاندىق باسپانامەن قامتاماسىز ەتىلەدى ەكەن. 600 مىڭ جەر ۋچاسكەسى، 35 000 ارەندالىق باسپانا جانە 280 000 نەسيەلىك باسپانا دا وسى باعدارلامانىڭ بارىسىندا ەل يگىلىگىنە جارماق دەگەن جوسپار بار. بۇل جوسپارلاردىڭ جۇزەگە اسۋىنا قاتىستى كۇماندانساڭىز دا جوعارىدا اتالعان جايتتاردىڭ جانىڭىزدان تابىلاتىنىنا باس قاتىرماي-اق قويساڭىز دا بولادى.

Abai.kz