«اشىق ۇكىمەت» تەتىگى ارقىلى ازاماتتار بارلىق دەڭگەيدەگى مەملەكەتتىك ورگانداردىڭ شەشىم قابىلداۋ ۇدەرىستەرىنە بەلسەندى تارتىلۋى ءتيىس يدەياسى ەلىمىزدە جۇزەگە اسىرىلاتىن ينستيتۋتسيونالدىق رەفورمالاردىڭ ءبىرى.

سوڭعى ۋاقىتتا ساياسي ۇدەرىستەرگە ازاماتتاردى تارتۋدىڭ جاڭا ءادىسى رەتىندە «كراۋدسورسينگ» ءادىسى قولدانىلۋدا، اسىرەسە، ءار ءتۇرلى كراۋدسورسينگتىك شارالار وتكىزۋ تەحنولوگياسى ۇلكەن تانىمالدىققا يە بولعانىن اتاپ ءوتۋ كەرەك.

كراۋدسورسينگ حالىقتىڭ پىكىرىن ەسكەرۋ، ساياساتقا ارالاستىرۋ تەحنولوگياسى رەتىندە 2003 جىلدان باستاپ قولدانىلا باستادى. بۇل تەرمين مەملەكەت جانە قوعام، بيزنەس الدىندا تۇرعان ماسەلەلەردى شەشۋ ماقساتىندا اقپاراتتىق تەحنولوگيالار نەگىزىندە ادامداردىڭ رەسۋرستارىن جۇمىلدىرۋ ۇدەرىسىن بىلدىرەدى.

كراۋدسورسينگ ءجيى ءار ءتۇرلى زاڭ جوبالارىن ءارى باسقا دا مەملەكەتتىك باستامالاردى تالقىلاۋدا ءبىرىنشى ككەزەكتە قولدانىلادى. ادەتتە تالقىلاۋلار داۋىس بەرۋ ارقىلى ونلاين رەجيمدە، نە ناقتىلى پىكىرلەردى جيناۋ جولدارىمەن جۇزەگە اسىرىلادى.

كراۋدسورسينگ، باسقا دا تاسىلدەرمەن قاتار، ساياساتتاعى ازاماتتىق بەلسەندىلىك ءۇشىن جاڭا مۇمكىنشىلىكتەر بەرىپ، دەموكراتيالى قوعام ماقساتىنا جەتۋگە نەگىز بولادى. سول سەبەپتى، ترانسپارەنتتى جانە ەسەپ بەرۋشى مەملەكەت دامىتۋ يدەياسىن كراۋدسورسينگ تەحنولوگياسى نەگىزىندە جۇزەگە اسىرۋعا بولادى.

الۋا سەرىكقىزى، ساياساتتانۋشى

Abai.kz