كەزەكتەن تىس پرەزيدەنتتىك سايلاۋعا تۇسەتىن ۇمىتكەرگە قول جيناۋ ۇستىندە 30-جىلداردان بەرى كەلە جاتقان قورقىنىش پەن ۇرەي تاعى دا الدىمىزدان شىقتى.

24 جىل بويى ادام قۇقىعى مەن ەركىندىگى بيلىك قۇرعان قازاق ەلىندەگى قول قويۋدان باس تارتقان ادامداردان: «مەنىڭ بالام اكىمدىكتە جۇمىس ىستەيتىن ەدى»، «كەلىنىم دەپارتامەنتكە جۇمىسقا تۇرايىن دەپ جاتىر، كەيىن ءبىر پالەسى ءتيىپ كەتىپ جۇرەر»، «پرەزيدەنكە قول قويىپ قويىپ ەدىك» دەگەن سوزدەردى ەستىپ، تاڭ قالدىم. اكىمدىكتە جۇمىس ىستەيتىن ادامدار ازاماتتىق قۇقىعىنان ايرىلىپ، دەپارتامەنتكە جۇمىسقا كىرەتىن ادامدار سايلاۋعا تۇسەتىن ادامداردى تاڭداي المايدى، ال ءبىر ۇمىتكەرگە قولداۋ جاساعان ادام ەكىنشى ءبىر ۇمىتكەردىڭ سايىسقا تۇسۋىنە قولداۋ جاساي المايدى دەگەندى ەشقاشان ەستىمەپپىن.

بۇل ۇرەي – قايدان كەلگەن ۇرەي! قانىمىزدا قالعان جاسقانشاقتىقتىڭ دەرتى مە، الدە ورەسى ءبىر قارىس جەرگىلىكتى بيلىكتىڭ «ساياسي-يدەولوگيالىق جۇمىسىنىڭ» جەمىسى مە، نەمەسە قۋ تىرشىلىكتىڭ تەزىندەگى بەيساياسات جانداردىڭ «كولەڭكەدەن قورقۋ» ۇستانىمى ما؟ ونداي ەلگە، ونداي حالىققا سايلاۋدىڭ قاجەتى نە! ازات ەلدىڭ، ازات ازاماتتارىنىڭ بەتىڭە قاراي الماي، مىڭگىرلەپ، تۇتىعىپ تۇرعانىن كورگەندە «قازاق ەلى، قورقاق 30 ەلدىڭ قاتارىنا قالاي قوسىلىپ كەتتىك؟» دەپ، ءوز حالقىڭنان ءوزىڭ جەرىنەسىڭ.

دوس كوشىم.

Abai.kz