بۇگىن دەپۋتاتتار جاقسى ءبىر ماسەلەنى كوتەردى. ولار "قازاقستان ازاماتتىعىن العىسى كەلەتىندەر (بوسقىندار مەن وزگە ەلدەن كەلەتىن كىرمەلەر) قازاق ءتىلى مەن تاريحىنان ەمتيحان تاپسىرۋى كەرەك"  دەگەن ۇسىنىستارىن ۇكىمەتكە جولدادى...

دەپۋتاتتاردىڭ ايتۋىنشا، الەمدەگى داعدارىس پەن ءتۇرلى ەلدەردەگى ازاماتتىق سوعىستاردىڭ كەسىرىنەن بوسقىندار قازاقستانعا دا جاپپاي باس ساۋعالاپ كەلە باستاۋى مۇمكىن. ەلىمىزگە ءتىلى مەن ءدىنى، مادەنيەتى بولەك ەلدەن مىڭداعان ميگرانتتاردىڭ باقىلاۋسىز كەلۋى ۇلت قاۋىپ توندىرەرى حاق. وسىنى ۇكىمەت قاپەرىنە سالعان ماجىلىسمەن ازات پەرۋاشەۆ بىرقاتار مەملەكەتتەگى بوسقىنداردىڭ قاتىسۋىمەن بولاتىن جانتۇرشىگەرلىك مىسالداردى كەلتىردى. وسىنى ەسكەرىپ، قازاقستان قابىلدايتىن ميگرانتتارعا دۇنيەجۇزىلىك تاجىريبەگە سۇيەنە وتىرىپ شارت قويۋ كەرەك دەيدى دەپۋتات.

ازات پەرۋاشەۆ "ازاماتتىق تۋرالى" زاڭدا ەمتيحان تاپسىرۋ تۋرالى نورما ەنگىزۋدى ۇسىندى. ياعني، قازاقستان ازاماتتىعىن العىسى كەلەتىندەر قازاق ءتىلى مەن تاريحىنان جانە كونستيتۋتسيانى بىلۋدەن سىناق تاپسىرۋى ءتيىس.

- جالپى ەڭبەك ميگرانتتارى بولسىن مەملەكەتكە كەلگەن ادامدار بىرىنشىدەن جەرگىلىكتى ءتىلىن، ەكىنشىدەن مەن زاڭىن ءبىلىپ، ۇشىنشىدەن ءداستۇرىن سىيلاۋ كەرەك دەپ تالاپ قويىپ وتىرمىز، - دەدى ول.

جالپى، "اق جول" پارتياسىنىڭ باسشىسى ازات پەرۋاشەۆتىڭ ۇسىنىسى قۇلاققا ءسىڭىمدى. بىراق، مۇنداي تالاپتى تەك بوسقىندارعا عانا ەنگىزىپ، ءوز ازاماتتارىمىزعا ەركىندىك بەرۋ - ادىلەتسىزدىك.

ماسەلەن، قازىر ەلىمىزدە قانشاما ادام مەملەكەتتىك ءتىلدى بىلمەيتىنى تۋرالى انىق دەرەك جوق. وسىنى انىقتاۋ ماقساتىندا بۇكىل قازاقستاندىقتاردان ەمتيحان الىپ، مەملەكەتتىك ءتىلدى ءبىلۋدى مىندەتتەۋ كەرەك. جاسى 40-قا دەيىنگىلەردەن قازاق ءتىلىن بىلمەيتىندەردى ازاماتتىقتان ايىرۋ قاجەت. سەبەبى، قازاقتىڭ نانىن جەپ، اۋاسىن جۇتقان ادام ونىڭ ءتىلى مەن تىنىنە قۇرمەت كورسەتۋى ءتيىس. ەگەر دە قۇرمەت كورسەتە المايدى ەكەن، ءوزى قالاعان ەلىنە كەتسىن. مەملەكەتتىك ءتىلدى بىلمەيتىن ازاماتتىڭ مەملەكەتكە قاجەتى جوق.

ءسىز نە دەيسىز؟

ءشارىپحان قايسار

Abai.kz