الماتى قالاسىنىڭ اكىمى

باۋىرجان بايبەكتىڭ نازارىنا

الماتى قالاسىنىڭ ورتالىق كوشەلەرىنىڭ ءبىرىنىڭ اتىن "ازاتتىق داڭعىلى" دەپ اتاۋ كەرەك، - دەپ حابارلايدى اباي-اقپارات.

بۇل باستامانى بەلگىلى جەلتوقسانشى ەرلان دەكەلباەۆ Facebook الەۋمەتتىك جەلىسىندە پاراقشاسىندا مالىمدەگەن. "الماتى قالاسىنداعى فۋرمانوۆ كوشەسىن اتا-بابالارىمىزدىڭ ارماندارىنا ساي "ازاتتىق داڭعىلى" دەپ قويۋ كەرەك" دەيدى ول.

دەكەلباەۆ بۇل ۇسىنىستى 2003 جىلى الاڭنىڭ ماكەتىن جاساعاندا ۇسىنعان ەكەن. جەلتوقسانشىنىڭ اتالمىش باستاماسىن سول كەزدەگى قالا اكىمى حراپۋنوۆ قولداپتى-مىس. بىراق، نەگە ەكەنى بەلگىسىز فۋرمانوۆ كوشەسىنىڭ اتى تاۋەلسىزدىك العالى 26 جىل وتسە دە وزگەرگەن جوق.

ەندى ءوز ويىمىزدى ايتساق...

قىزىل كوميسسار ديمون فۋرمانوۆتىڭ الماتىداعى ەسكەرتكىشى

ەرلان دەكەلباەۆتىڭ اتالعان كەرەمەت يدەياسىن جۇزەگە اسىرۋ باۋىرجان بايبەككە سىن. سەبەبى، اتى مەن سويى تاۋەلسىزدىككە قىزمەت ەتپەگەن فۋرمانوۆتىڭ الماتىنىڭ ءدال ورتاسىنداعى داڭعىلدى يەلەنۋگە ەشقانداي حاقى جوق.

بۇل - ازاتتىققا ۇمتىلعان جەلتوقسانشىلاردى الاڭعا اپارعان، ازاتتىققا باستاعان الاشتىڭ جولى.

بۇل - تۇڭعىش پرەزيدەنتىمىز نۇرسۇلتان ءابىشۇلىنىڭ ازات ەلدىڭ باسشىسى رەتىندە جۇمىسىن باستاعاندا كۇندەلىكتى جۇرگەن سوقپاعى.

قازاقتىڭ تاۋەلسىزدىگى وسى جولدان باستالعان. سول سەبەپتى دە 2003 جىلى جۇزەگە اسپاي قالعان كەلەلى ءىستى باۋىرجان بايبەك قولدايدى دەپ ويلايمىز. باۋىرجان بايبەك اۋىزبەن قولداپ، بىراق ايتقانىن جۇزەگە اسىرمايتىن حراپۋنوۆ ەمەس. بايبەك قولعا السا الىنبايتىن قامال جوق ەكەنىن باياعىدا-اق دالەلدەدى. ماسەلەن، ناۋرىزباي كوشەسىنىڭ بويىنداعى قۋعىن-سۇرگىن قۇرباندارىنا ەسكەرتكىش قويۋ ماسەلەسى شەشىلدى، بيىل. قارجى ءبولىنىپ، ەسكەرتكىش انە-مىنە سالىنعالى جاتىر. بۇل ءىس اكىمىنىڭ ۇلت دەپ سوققان جۇرەگىنىڭ، ۇلتى ءۇشىن تىنىم تاپپايتىن كۇش-جىگەرىنىڭ قانداي ەكەنىن تولىعىمەن دالەلدەپ بەردى.

قالىڭ كوپشىلىك "فۋرمانوۆ كوشەسىنە بولاشاقتا ەلباسىنىڭ اتى بەرىلۋى مۇمكىن" دەگەندى ءجيى ايتادى. ەلباسىمىزدىڭ قولداۋىمەن سوڭعى ۋاقىتتا الماتىنىڭ ماڭىندا قانشاما اينالما جولدار سالىنىپ جاتىر. سول اينالما جولدىڭ سالىنۋىنا ەلباسىمىزدىڭ تىكەلەي ەڭبەگى ءسىڭدى ەمەس پە؟ سوندىقتان دا تۇڭعىش ەلباسىمىزعا بەرىلەر كوشە الماتىدا وتە كوپ ەكەنىن ەسكەرۋىمىز كەرەك. "الماتىداعى اسا ۇزىن ەمەس فۋرمانوۆ داڭعىلىن پرەزيدەنتتىڭ اتىنا بەرەمىز" دەۋ ەلباسىنىڭ ەڭبەگىن باعالاماۋ بولىپ سانالادى.

سول سەبەپتى دە بىرىنشىدەن تاۋەلسىزدىككە تۇك قاتىسى جوق فۋرمانوۆتىڭ اتاۋىن قۇرتۋ كەرەك. ونىڭ ورنىنا ادام اتىن قويساق، ءتۇرلى تالاس-تارتىس ورىن الۋى مۇمكىن. سوندىتان دا، بۇل كوشەنىڭ اتىن ازاتتىق داڭعىلى دەپ اتاۋدى بۇگىننەن باستاۋىمىز كەرەك سەكىلدى.

ءسىز نە دەيسىز؟

ءشارىپحان قايسار

Abai.kz