ايگىلى اقىن ورازاقىن اسقار: كۇلتەگىن، تونىكوك - تەگىمىز،

ەجەلگى تۇرىك ەلىمىز.

التايدان الپىعا دەيىن

سوزىلعان بايتاق، جەرىمىز، - دەپ جىرلاپ كەتكەندەي، اتا-بابامىز ەتەك جەڭىمىزدى ەن قوندىرىپ كەتكەن قازاق دەگەن ەلمىز. بابالىرمىز بىزگە ميراس ەتىپ كەتكەن كەڭ دالالى، وزەن-كولى داريالى، تاۋلارى بيىك قىراتتى، شالقىعان شەكسىز جەرى بار قازاق ەلىنىڭ، تاۋەلسىز ەل اتانىپ، وزگە مەملەكەتتەرمەن تەرەزەمىزدى تەڭەستىرگەنىمىزگە دە جيىرما جىل بولدى. «تاۋەلسىز ەل»، «تاۋەلسىز مەملەكەت» - دەگەن قاسيەتتى دە، قاستەرلى ۇعىمداردى ءوز الدىمىزدا دا، وزگەنىڭ الدىندا دا، دالەلدەپ، ۇيالماي كورسەتىپ تۇراتىن ءار مەملەكەتتىڭ وزىندىك سيمۆولدارى بولاتىنى شارت. ولار تاۋەلسىز مەملەكەتتىڭ تۋى، ءانۇرانى، مەملەكەتتىڭ حالىقارالىق قاۋىمداستىق مويىنداعان شەكاراسى جانە - ءتول ۆاليۋتاسى.

ايگىلى اقىن ورازاقىن اسقار: كۇلتەگىن، تونىكوك - تەگىمىز،

ەجەلگى تۇرىك ەلىمىز.

التايدان الپىعا دەيىن

سوزىلعان بايتاق، جەرىمىز، - دەپ جىرلاپ كەتكەندەي، اتا-بابامىز ەتەك جەڭىمىزدى ەن قوندىرىپ كەتكەن قازاق دەگەن ەلمىز. بابالىرمىز بىزگە ميراس ەتىپ كەتكەن كەڭ دالالى، وزەن-كولى داريالى، تاۋلارى بيىك قىراتتى، شالقىعان شەكسىز جەرى بار قازاق ەلىنىڭ، تاۋەلسىز ەل اتانىپ، وزگە مەملەكەتتەرمەن تەرەزەمىزدى تەڭەستىرگەنىمىزگە دە جيىرما جىل بولدى. «تاۋەلسىز ەل»، «تاۋەلسىز مەملەكەت» - دەگەن قاسيەتتى دە، قاستەرلى ۇعىمداردى ءوز الدىمىزدا دا، وزگەنىڭ الدىندا دا، دالەلدەپ، ۇيالماي كورسەتىپ تۇراتىن ءار مەملەكەتتىڭ وزىندىك سيمۆولدارى بولاتىنى شارت. ولار تاۋەلسىز مەملەكەتتىڭ تۋى، ءانۇرانى، مەملەكەتتىڭ حالىقارالىق قاۋىمداستىق مويىنداعان شەكاراسى جانە - ءتول ۆاليۋتاسى.

ءتول تەڭگەمىزدى شىعارۋ ءارى ونى قولدانىسقا ەندىرۋ وڭايشىلىقپەن بولماعانى بەسەنەدەن بەلگىلى. مەملەكەتىمىز ەگەمەندىك العان سوناۋ 90-شى جىلداردا، ەكونوميكامىز توقىراۋعا ۇشىراپ، حالىقتىڭ الەۋمەتتىك جاي-كۇيى تىپتەن ناشارلاپ، جاس-كارىسى نە زەينەتاقىسىن، نە جالاقىسىن الا-الاماي، السا دا، قۇنسىزدانىپ كەتكەن اقشاسىن مىسە تۇتقان، تۇرمىس-تىرشىلىك كۇرت تومەندەپ كەتكەن جاداۋ كەزەڭ بولدى. سول كەزەڭدەردىڭ باسىندا ونداعان جىلدار بويى تاسكەنەشە قابىسا جابىسىپ قالعان كوممۋنيستتىك جوسپارلاۋ جۇيەسىنەن نارىقتىق ەكونوميكا جۇيەسىنە بوزداتىپ كوشكەن جىلدارى، جالپى العاندا مەملەكەت ءۇشىن دە، قارابايىر حالىق ۇشىندە ادام توزگىسىز مەحناتتى ۋاقىتتا، جاعدايدىڭ قيىندىعىنا جانە قىسپاقتىعىنا قاراماي، ءوزىمىزدىڭ ۇلتتىق ۆاليۋتامىز بولۋى كەرەك جانە ونى ۋاقىت ۇتتىرماي ەنگىزۋ كەرەك دەگەن وڭ باستاما كوتەرىلدى. ەلىمىز ءۇشىن وسى ءبىر ماڭىزدى باستامانى ەلباسى نۇرسۇلتان نازارباەۆ كوتەرىپ جانە اتالعان يگى باستامانى جۇزەگە اسىرۋ بارىسىندا باسى-قاسىندا ءجۇرىپ، ات قۇنىنا بەرگىسىز اقىلىن، نار قۇنىنا بەرگىسىز ناقىلىن ايتىپ، اتسالىسقان ازامات-اعالارىمىزدىڭ بىردەن-ءبىرى -  داۋلەت حاميتۇلى سەمباەۆ.

داۋلەت حاميتۇلى سەمباەۆ - مۇقىم قازاققا كەڭىنەن تانىمال مەملەكەت جانە قوعام قايراتكەرى. داۋلەت حاميتۇلى 1935-ءشى جىلدىڭ 10-شى تامىزىندا الماتى قالاسىندا دۇنيەگە كەلدى. كەيىننەن ۆ.ي.لەنين اتىنداعى قازاق پوليتەحنيكالىق ينستيتۋتىن 1958-ءشى جىلى «ينجەنەر-مەتاللۋرگ» ماماندىعى بويىنشا ءتامامدادى. جۇمىس جولىن 1958-ءشى جىلى س.م.كيروۆ اتىنداعى زاۋىتتا تەحنولوگ، ماستەر بولىپ باستاپ، وسى زاۋىتتا 1966-شى جىلعا دەيىن تەر توگىپ، قىزمەت ەتىپ، كەيىن قازاق كوممۋنيستتىك سوتسياليستتىك رەسپۋبليكاسىنىڭ مەملەكەتتىك جوسپارلاۋىندا ءبولىمنىڭ باس مامانى، بولىمشە باستىعى، ءبولىم باستىعىنىڭ ورىنباسارى قىزمەتتەرىن اتقاردى. كسرو مەملەكەتتىك جوسپارلاۋى - كەڭەس زامانىندا جاس مامانداردىڭ ىسىلىپ، ۇرشىقشا ءيىرىلىپ، مول تاجىريبە جيناقتاپ، مىقتى مامان بولىپ شىعاتىن بىردەن-ءبىر ۇيىمنىڭ ءبىرى بولاتىنتۇعىن. داۋلەت حاميتۇلى - مەملەكەتتىك جوسپارلاۋدان تاجىريبەسى مول، جەتىك مامان، ىسكەر ازامات بولىپ شىقتى. كەڭەس ۇكىمەتىنىڭ داۋرەنى ءجۇرىپ تۇرعان كەزەڭدە داۋلەت حاميتۇلى، مەمجوسپارلاۋدان سوڭ قازكسر مينيسترلەر كەڭەسىنىڭ كەڭەسشىسى، مينيسترلەر كەڭەسى حاتشىلىعىنىڭ مەڭگەرۋشىسى، مينيسترلەر كەڭەسىنىڭ ىستەر باسقارۋشىسىنىڭ ورىنباسارى، قازكسر مەملەكەتتىك جوسپارلاۋىنىڭ ءبولىم باستىعىنىڭ ورىنباسارى، مەملەكەتتىك جوسپارلاۋ توراعاسىنىڭ ورىنباسارى قىزمەتتەرىن ۇزاق جىلدار بويى ابىرويمەن اتقاردى.

قازاق ەلى تاۋەلسىز مەملەكەت اتانعان سوڭ، كوپتەگەن ماڭىزدى سالالاردى ۋاقىت تالابىنا سايكەستەندىرىپ قايتادان قۇرىلىمداۋ قاجەت بولدى. ونىڭ ىشىندە جەتپىس جىل بويى جوسپارلاۋمەن جۇرگىزىلگەن، اناۋ-مىناۋىڭا بەيىمى جوق ەكونوميكالىق جۇيەنى نارىقتىق ەكونوميكاعا بىرتىندەپ بەيىمدەۋ، جاڭا فورماتسياعا كوشۋگە بايلانىستى الدا قيىن مىندەتتەرمەن ماقساتتار تۇردى. سول كەزدەرى جاڭا تالاپتارمەن جاڭا زامان تولقىنىنا ۇيرەنىسۋ، بەيىمدەلۋ كىم-كىمگە دە وڭاي سوقپاعانى راس. پرەزيدەنت نازارباەۆتىڭ باسقارۋىمەن جاسالعان رەفورمالاردى ومىرگە ەنگىزۋ بارىسىندا، رەفورماتورلار توبى وزگەرىستەردى «ءبىر جاعىنان بۇقانى دا ولتىرمەي، ەكىنشى جاعىنان اربانى دا سىندىرماي» جۇزەگە اسىرۋعا تىرىسىپ باقتى. وسى وزگەرىستەردىڭ باسى-قاسىندا جۇرگەن داۋلەت حاميتۇلى 90-شى جىلدارى قازكسر پرەزيدەنت كەڭەسىنىڭ مۇشەسى، قازكسر جوعارى ەكونوميكالىق كەڭەسى توراعاسىنىڭ ورىنباسارى، قازاقستان رەسپۋبليكاسى پرەمەر-ءمينيسترىنىڭ ورىنباسارى، كەيىنىرەك پرەمەر-ءمينيستردىڭ ءبىرىنشى ورىنباسارى سەكىلدى، جوعارى لاۋازىمدى قىزمەتتەردى بەلسەندىلىكپەن جانە ىجداعاتتىلىقپەن اتقارا وتىرىپ، ۇكىمەتتە مەملەكەتتىڭ قارجى-ەكونوميكالىق سەكتورى ءۇشىن جاۋاپ بەردى. ول كەزدەگى قيىن الەۋمەتتىك-ەكونوميكالىق جاعدايدا، پرەزيدەنت نۇرسۇلتان نازارباەۆ ءوزىنىڭ قاسىنا بىلگىر-بىلىكتى، تاجىريبەلى، كەرەك ۋاقىتىندا ارقا سۇيەي الاتىن ازاماتتاردى جيناعانى بەلگىلى. وسى ورايدا، داۋلەت حاميتۇلىنىڭ كوپتەگەن جىلدار بويى جيناقتاعان تاجىريبەسىمەن ىسكەرلىگى، بىلىمدىلىگىمەن بىلىكتىلىگىنىڭ، قابىلەت-قارىمىنىڭ مەملەكەت ءۇشىن ەڭ بيىك كادەگە جاراعان جىلدارى، اعامىزدىڭ - قازاقستان رەسپۋبليكاسى ۇلتتىق بانكىنىڭ توراعاسى بولعان جىلدارى دەسەك ارتىق ايتپاعانىمىز شىعار. داۋلەت حاميتۇلى قر ۇلتتىق بانكىن 1993-ءشى جىلدىڭ جەلتوقسانىنان 1996-شى جىلدىڭ قاڭتار ايىنا دەيىن باسقاردى. قازاق قارجى-بانك جۇيەسىنىڭ جاڭا اعىمعا بەيىمدەلىپ، ورنىعىپ، تۇراقتالا باستاعانى، ەلىمىزدىڭ قارجى-مونەتارلىق جۇيەسىنە ەڭ قاجەتتى زاڭنامالىق قۇجاتتاردىڭ قابىلدانعان، جالپىلاي ايتساق، قازاق قارجى جۇيەسىنىڭ تۇپقازىعى قاعىلعان كەزەڭ  - ءداپ وسى جىلدار ارالىعى ەكەنىنە ەشكىمنىڭ داۋى دا، ءشۇباسى دە جوق شىعار. داۋلەت حاميتۇلىنىڭ قر ۇلتتىق بانكىندە باسىن باستاپ كەتكەن جۇمىستارى كەيىن دە، ونىڭ شاكىرتتەرىمەن جالعاستىرىلىپ، كەڭەستىك قارجى-نورماتيۆتىك جۇيەسىنەن بىرتىندەپ ارىلا باستالدى، تاۋەلسىز  مەملەكەتكە قاجەتتى جاڭادان نورماتيۆتىك بازالار ەنگىزىلۋ ساياساتى جۇرگىزىلدى. ول كەزەڭ ءبىزدىڭ قارجى جۇيەمىزدىڭ حالىقارالىق قارجى ۇيىمدارىمەن ارالاس-قۇرالاستىعى باستالىپ، ولار ءبىز ءۇشىن، ءبىز ولار ءۇشىن اشىلا باستاعان، ءبىر-بىرىمەن تانىسا باستاعان جىلدار ەدى. قارجى-بانك سالاسىنداعى سول كەزەڭدەگى جاۋاپكەرشىلىگى جوعارى شەشىمدەردىڭ باستاۋىندا داۋلەت حاميتۇلى سەمباەۆ جالعىز ءوزى تۇردى نەمەسە جالعىز ءوزى اتقاردى دەۋدىڭ اۋىلىنان اۋلاقپىز. جالپى ايتقاندا، ەلدەگى جاقسىلى-جاماندى جاسالعان ءىستىڭ بارلىعىن ءبىر ادام جاسامايدى جانە ول ءۇشىن ءبىر نەمەسە ەكى-ءۇش ادام جاۋاپ بەرمەيتىنى بەلگىلى. داۋلەت سەمباەۆ بۇل جەردە قازاقتىڭ دانا ناقىلدارىنىڭ ءبىرى، «كەڭەسكەن جەردە كەمدىك جوق، كەڭەسسىز جەردە تەڭدىك جوق» - دەگەن قاعيداتتى بەرىك ۇستانا وتىرىپ، قانداي دا بولماسىن كۇردەلى، تۇيتكىلدى ماسەلەلەردىڭ ءتۇيىنىن ارىپتەستەرىمەن بىرگە تالقىلاۋ ارقىلى شەشىپ وتىردى.

داۋلەت حاميتۇلى مەملەكەتىمىزدىڭ اتقارۋشى بيلىك تارماعىندا جۇمىس جاساپ قانا قويماي، سونىمەن قاتار، 1996-شى جىلدىڭ قاڭتار ايىندا قازاقستان رەسپۋبليكاسى پرەزيدەنتى نازارباەۆتىڭ ۇسىنىسىمەن قر سەناتىنىڭ دەپۋتاتتىعىنا تاعايىندالدى. داۋلەت سەمباەۆ اتالعان قىزمەتتى اتقارا ءجۇرىپ، سەناتتىڭ ەكونوميكا، قارجى جانە بيۋدجەت كوميتەتىنىڭ توراعاسى بولدى. بۇل قىزمەتتى دە، داۋلەت حاميتۇلى ۇلكەن ابىرويمەن اتقارا وتىرىپ، قارجى-مونەتارلىق سەكتورعا بايلانىستى، كەرەكتى زاڭنامالاردى دايىنداۋعا  ات-سالىسىپ،  ۇسىنىپ، ولاردىڭ قابىلدانۋىنا از تەر توككەن جوق. داۋلەت حاميتۇلى سەمباەۆ سەنات دەپۋتاتتىعىنان 1997-ءشى جىلدىڭ ءساۋىر ايىندا كەتىپ، سول جىلدان بەرى جەكە جانە بانك سەكتورىندا قىزمەت ەتىپ كەلەدى. ءار جىلدارى «ابس-بالحاش» تاۋ-كەن كومپانياسى» جتاق ديرەكتورلار كەڭەسى توراعاسىنىڭ ورىنباسارى، «Hong Kong-Shanghai Bank Corporation Kazakhstan» (HSBC) اق-ى ديرەكتورلار كەڭەسىنىڭ مۇشەسى قىزمەتتەرىن اتقاردى. ال، 1999-شى جىلدان 2002-ءشى جىلدىڭ قىركۇيەگىنە دەيىن ەلىمىزدىڭ ەكىنشى دەڭگەيلى ەڭ ءىرى بانكى «قازكوممەرتسبانكىندە» ديرەكتورلار كەڭەسىنىڭ توراعاسى قىزمەتىندە بولدى. سول 2002-ءشى جىلدىڭ قىركۇيەك ايىنان بەرى، ءدال قازىرگى كۇنگە دەيىن «قازكوممەرتسبانك» اق-ى ديرەكتورلار كەڭەسى توراعاسىنىڭ ورىنباسارى قىزمەتىندە. شىنى كەرەك، قازاق قارجى جۇيەسىندە داۋلەت حاميتۇلىنىڭ الاتىن ورنى ەرەكشە بولەك.   داۋلەت حاميتۇلى 1999-شى جىلى ءوزىنىڭ باستاماسىمەن قۇرىلعان «قازاقستان قارجىگەرلەر قاۋىمداستىعى» ۇيىمىنىڭ باس كەزەڭىندە كەڭەس توراعاسى قىزمەتىن اتقاردى، ال بۇگىنگى كۇنى وسى ۇيىمنىڭ قۇرمەتتى توراعاسى بولىپ وتىر. داۋلەت سەمباەۆ باستاماسىندا تۇرعان، اتالمىش ۇيىم قۇرىلعان كەزەڭىنەن ون ءبىر جىلدان بەرى قارجى سەكتورىمەن بيلىك اراسىنداعى كوپىرگە اينالىپ، زادى اتىنا ساي جۇمىسىن اتقارىپ كەلەدى. بۇل قاۋىمداستىقتىڭ ەلىمىزدەگى بىردەن-ءبىر، ۇلكەن ىسكەر قاۋىمداستىقتاردىڭ ءبىرى بولۋىنا جانە بەلسەندى جۇمىس جاساپ، دامۋىنا داۋلەت حاميتۇلىنىڭ جەكە باسىنىڭ بەدەلىمەن قوسقان ۇلەسى وراسان زور. بىلايشا ايتساق، داۋلەت حاميتۇلى زەينەتكەر جاسىنا باياعىدا شىعىپ، قازىر جەتپىس بەستى القىمداسا دا، ەلىمەن حالقىنىڭ الدىندا قىزمەتىن جالعاستىرىپ كەلەدى. وسى ەلگە ادال قىزمەت اتقارعانى ءۇشىن ول ءار جىلدارى «ەڭبەك قىزىل تۋ قۇرمەت بەلگىسى» وردەنىنىڭ، قازاقستان رەسپۋبليكاسى قۇرمەت گراموتاسىمەن جانە «پاراسات» وردەنىنىڭ يەگەرى اتاندى.
داۋلەت سەمباەۆتى ءبىز تەك تاجىريبەلى قارجىگەر دەپ بىلسەك، بۇنىمىز داۋلەت اعامىزدىڭ تۇلعاسىنا دەگەن بىرجاقتى كوزقاراس بولار ەدى. داۋلەت اعا ءوزىنىڭ نەگىزگى جۇمىسىن اتقارا وتىرىپ، سونىمەن قاتار، ارتىندا بىلىكتى، تاجىريبەلى، ۋاقىت تالابىنا ساي، وزگەرىستەرگە تەز بەيىمدەلە الاتىن مامان-شاكىرتتەر دايىنداعان  - ۇلاعاتتى ۇستاز. داۋلەت حاميتۇلىمەن ءار جىلدارى قىزمەتتەس، جۇمىستاس بولعان سەرىك احانوۆ،  گريگوري مارچەنكو، وراز جاندوسوۆ، نۇرجان سۇبحانبەردين، ايبار ءداۋىتوۆ، ءانۋار سايدەنوۆ، نينا ءجۇسىپوۆا، قادىرجان داميتوۆ سەكىلدى ەل الدىندا جۇرگەن مارعاسقا قارجىگەرلەردى، داۋلەت اعانىڭ مەكتەبىنەن وتكەن، بىلىكتى شاكىرتتەرى دەپ اتاۋعا تولىق نەگىز بار. داۋلەت حاميتۇلى شاكىرت دايىنداۋ ۇدەرىسىن توقتاتقان ەمەس، ول قازىرگى كەزدە قازاق مەنەدجمەنت ەكونوميكا جانە بولجاۋ ينستيتۋتىنىڭ قۇرمەتتى پروفەسسورى، حالىقارالىق بيزنەس اكادەمياسى قامقورشىلىق كەڭەسىنىڭ مۇشەسى بولىپ تابىلادى.
داۋلەت حاميتۇلىنىڭ تاعى ءبىر قىرى، «قاتاردان اسساڭ دا، حالىقتان اسپا» دەگەن قازاقتىڭ ناقىل ءسوزى سەكىلدى، ارقاشاندا قاراپايىمدىلىقپەن ءجۇرۋى، ول كىسى «بايتاقتان وزعان باقتىلى، سۇلەيمەندەي تاقتىلى» ورىنداردا قىزمەت ەتسە دە، ەشقاشان دا اسىپ-تاسۋ نەمەسە تاكاپپارلىق دەگەن جات قاسيەتتەردى بىلگەن ەمەس جانە ول كىسىنى جاقسى بىلەتىندەردىڭ ايتۋىنشا،  داۋلەت حاميتۇلى سەمباەۆ قاي قىزمەتتە جۇمىس ىستەسە دە، ەشقاشان جەكە باسىنىڭ مۇددەسىن كۇيتتەگەن ەمەس. ۇلتىمىز «جەتىم كورسەڭ، جەبەي ءجۇر» - دەيدى. داۋلەت حاميتۇلى وسىدان بىرنەشە جىل بۇرىن ءوز باستاماسىمەن «قۇس جولى» قايىرىمدىلىق قورىن» قۇرعان بولاتىن، اتالعان قور قازىرگى كەزدە ەلىمىزدىڭ اۋماعىندا قايىرىمدىلىق ءىس-شارالارىن وتكىزىپ، جەتىم بالالار ۇيىنە ماتەريالدىق كومەك، ءار-ءتۇرلى الەۋمەتتىك شارالارعا بەلسەنە قاتىسىپ، قارجىلاي جانە ماتەريالدىق كومەگىن كورسەتىپ، ءبىلىمدى بالالاردىڭ وقۋىنا دەمەۋ جاساپ، وزىندىك الەۋمەتتىك جاۋاپكەرشىلىگىن ەسكەرىپ، جۇمىستارىن اتقارۋدا. داۋلەت حاميتۇلىنىڭ تاعى ءبىر ايتا كەتەتىن قاسيەتى، قاي لاۋازىمدى ورىندا جۇمىس جاساسا دا، ول سول «جىلى» ورىنداردا «كەت» دەگەنشە وتىرا بەرمەي، ءوز ەركىمەن بوساتىپ وتىراتىن. سونىمەن قاتار، داۋلەت حاميتۇلى «التىن كورىپ ازبايتىن، كۇمىس كورىپ قىزبايتىن»، ويىنداعىسىن ىرىكپەي تۋرا ايتاتىن، «اعىن - اق، قاراسىن - قارا» - دەپ، ايتسا ءادىل ايتاتىن، ادال ازاماتتاردىڭ قاتارىنان! «بولدىم-تولدىم»، «بولدىم-جەتتىم» دەگەندەردىڭ اراسىنان ەمەس! نەگىزىندە، مىقتى، دارىندى، ءبىلىمدى تۇلعالاردى وزگە ەلدىڭ ۇلى، تاريحي تۇلعالارىمەن سالىستىرۋ عادەتى بار ەمەس پە، ال داۋلەت سەمباەۆتى ەشكىممەن سالىستىرۋعا كەلمەيدى، داۋلەت سەمباەۆتى تەك داۋلەت سەمباەۆپەن سالىستىرعان دۇرىس سەكىلدى.
ءدال قازىرگى كەزدە بىرەۋ-مىرەۋ، باقىتتى ادام كىم دەپ، -  سۇراسا، بۇل سۇراققا ەش مۇدىرمەستەن - داۋلەت حاميتۇلى سەمباەۆ، - دەپ جاۋاپ بەرۋگە بولادى. سەبەبى، داۋلەت حاميتۇلى ەلىنە قىزمەت ەتۋدەن ايانعان ەمەس، ءالى دە قىزمەت ەتۋدە، ءوز ومىرىندە بىرنەشە، ەل الدىندا ۇيالماي كورسەتە الاتىن، اتپالداي شاكىرتتەرىن دايىندادى، سونىمەن قوسا قيىن كەزەڭدە تاۋەلسىز ەلدىڭ اياققا تۇرىپ، دامۋىنا ءوز سەپتىگىن تيگىزىپ، ەل تاريحىنا ءوزىنىڭ اتىن قالدىرىپ وتىر. وسىنىڭ ءوزى ۇلكەن باقىت ەمەس پە! قازاق حالقىنىڭ توبە بيلەرىنىڭ ءبىرى، موڭكە بي كەزىندە «ءسوزدىڭ ماعىناسى كەتىپ، سامالى قالدى، ادامنىڭ جاقسىسى كەتىپ، جامانى قالدى»، - دەپ ايتىپ كەتكەن ەكەن، الايدا، ءبىزدىڭ ارامىزدا اتىنا زاتى ساي، سارابدال داۋلەت حاميتۇلى سەمباەۆ سەكىلدى جاقسىلى-جايساڭدى اعالارىمىز بار، اللاعا شۇكىر! بىزدەن تىلەك بىرەۋ، وسىنداي اعالارىمىز امان جۇرسە ەكەن دەيمىز!

عادىلبەك اكىم،

الەۋمەتتانۋشى-ەكونوميست.

«اباي-اقپارات»