دۇيسەنبى, 20 قىركۇيەك 2021
بيلىك 6497 20 پىكىر 7 مامىر, 2017 ساعات 13:23

قازاق تاريحىندا بۇرىن-سوڭدى بولماعان اسكەري پاراد ءوتتى

استانادا وتان قورعاۋشىلار كۇنى مەن قازاقستاننىڭ قارۋلى كۇشتەرىنىڭ 25 جىلدىعىنا ارنالعان قازاق تاريحىندا بۇرىن-سوڭدى بولماعان اسكەري پاراد ءوتتى، - دەپ حابارلايدى اباي-اقپارات.

پارادتىڭ اشىلۋ سالتاناتىندا ءسوز سويلەگەن ەلباسى نۇرسۇلتان نازارباەۆ: «قارۋلى كۇشتەرىمىز ءار ۋاقىتتا دا  تاۋەلسىزدىگىمىزدىڭ باستى تىرەگى بولىپ قالا بەرەدى. سىزدەر وزدەرىڭىزدىڭ قاسيەتتى بورىشتارىڭىزدى ادال اتقارىپ، تۋعان  جەرىمىزدىڭ تىنىشتىعىن قورعاڭىزدار، وزدەرىڭىزدىڭ كاسىبي شەبەرلىكتەرىڭىزدى، جاۋىنگەرلىك داعدىلارىڭىزدى ارتتىرىپ، جاۋىنگەرلىك باۋىرلاستىق پەن بىرلىكتى نىعايتىڭىزدار. مەرەيتويلىق شەرۋدىڭ قازاقستاندىق ارميانىڭ اسكەري قۋاتىن، جوعارى رۋحىن كورسەتەتىندىگىنە سەنىمدىمىن»، - دەدى.

«ەل تاۋەلسىزدىگىمەن بىرگە بيىل قارۋلى كۇشتەرىمىزدىڭ 25 جىلدىق مەرەكەسىن اتاپ ءوتىپ وتىرمىز. مەن شيرەك عاسىر بۇرىن تاۋەلسىز ەلىمىزدىڭ ءتول ارمياسىن قۇرۋ تۋرالى ءدال بۇگىنگى كۇنى جارلىققا قول قويعان بولاتىنمىن. سودان بەرى از عانا ۋاقىت وتسە دە قارۋلى كۇشتەرىمىز بەس قارۋى ساي زاماناۋي ۇلگىدەگى ايبىندى ارمياعا اينالدى. سايىپ قىران ساربازدارىمىز بۇگىندە ۇلى دالانىڭ سەنىمدى قورعانى، ازاماتتىعىمىزدىڭ الماس الداسپانى. ءبىز قازىرگى زامان تالاپتارىنا ساي كەلەتىن، الەۋەتتى اسكەرىمىزدى جاساقتادىق. ەل قاۋىپسىزدىگىنىڭ باستى باعىتتارى ايقىندالدى. اسكەري دوكترينامىز قابىلداندى. ەكونوميكامىز قارقىندى دامىعان سايىن ەلىمىزدىڭ قارۋلى كۇشتەرى دە جەتىلىپ، نىعايا ءتۇستى. اسكەري قاۋىپسىزدىگىمىز «قازاقستان-2050»  باعدارلامانىڭ باستى باعىتتارىنىڭ ءبىرى بولىپ سانالادى. جاۋىنگەرىمىز الەمنىڭ ءارتۇرلى تۇكپىرىندە بىتىمگەرشىلىك ميسسيالاردى وزىنە الىپ، اابىرويمەن اتقارىپ شىقتى. ءبىزدىڭ اسكەرىمىز تمد ەلدەرىنىڭ ىشىندە الدىڭعى قاتارلى اسكەر رەتىندە تانىلدى»، - دەدى ەلباسى.

سونىمەن قاتار مەملەكەت باسشىسى اسكەري قىزمەتشىلەردى باتىر بابالارىمىزدىڭ ەرلىك جولىن ودان ارى جالعاستىرۋعا شاقىرىپ، ەكىنشى دۇنيەجۇزىلىك سوعىس ارداگەرلەرىنە ريزاشىلىعىن ءبىلدىردى.

«بولاشاق  ۇرپاق  ءۇشىن تاۋەلسىز قۋاتتى قازاقستاندى قۇرۋعا مۇمكىنشىلىك جاساعاندارىڭىز ءۇشىن بارلىق ارداگەرلەرگە شىنايى ريزاشىلىعىمدى بىلدىرەمىن. ءبىزدىڭ ەلىمىزدىڭ قارۋلى كۇشتەرى سىزدەردىڭ جاۋىنگەرلىك داڭقتارىڭىزدى جالعاستىرۋشىلار، اكەلەرىمىز بەن اتالارىمىزدىڭ ەرلىك ءداستۇرىن جالعاستىرۋشىلاردىڭ سيمۆولى. وتاندى قورعاۋ جانە ونىڭ قاۋىپسىزدىگىنە قامقورلىق تانىتۋ - ەلىمىزدىڭ ءاربىر ازاماتىنىڭ بورىشى ءارى مىندەتى»، - دەدى مەملەكەت باسشىسى.

اسكەري پارادقا بەس مىڭنان استام اسكەر قاتىسىپ، 300 اسكەري تەحنيكادان قۇرالعان كولوننا ءجۇرىپ ءوتتى.

ۇشقىشتار استانا كوگىندە 25 سانى مەن بايتەرەكتىڭ بەينەسىن سالدى.  قر قك-ءنىڭ وكىلدەرى 2017 جىلعى پاراد ەل تاريحىنداعى ەڭ كولەمدى پاراد بولعانىن اتاپ ءوتتى.

پارادتى تاماشالاۋشىلار "كاز گراد", "سمەرچ", "پريما" سياقتى رەاكتيۆتى جۇيەلەردى، بمپ-2 اسكەري ماشينالارىن، توس-1 "سولنتسەپەك" وت شاشاتىن جۇيەلەردى، "شتۋرم-س" تانكىگە قارسى زىمىراندار كەشەنىن، بتر-80 ماشينالارىن، "مستا-ب" گاۋبيتساسىن، "گياتسينت" باتارەيالارىن، "تيۋلپان" مينومەتتەرى مەن "توچكا-ۋ" تاكتيكالىق زىمىراندارىن كوردى.

نەگىزگى اسكەري تانكىلەرمەن قاتار، "ارلان", "حامەر", "كوبرا" جانە "فەدەرال" سياقتى وق وتپەيتىن كولىكتەر دە كورسەتىلدى.  كوككە 70 اۋە تەحنيكاسى كوتەرىلدى.

اباي-اقپارات

20 پىكىر