ەلباسى نازارباەۆ ۋنيۆەرسيتەتىنىڭ باسشىسى شيگەو كاتسۋدى اقوردادا قابىلدادى.

76 جاستاعى ەلباسى شەتەل ازاسماتىمەن (ۋنيۆەرسيتەت باسشىسى شيگەو كاتسۋدى ايتامىز) اعىلشىن تىلىندە اڭگىمەلەستى. ۋنيۆەرسيتەت جۇمىستارى جايلى سۇراپ، كاتسۋدىڭ بايانداماسىن تىڭدادى.

ەلباسى نۇرسۇلتان نازارباەۆتىڭ قازاق تىلىندە (انا تىلىندە) توم-توم ەڭبەكتەرى جارىق كورگەن.

كەشەگى كەڭەستەر وداعى تۇسىندا ۇلكەن ساياساتتىڭ الاڭىنا كىرگەن نازارباەۆتىڭ ورىسشاعا دا ءتىلى جەتىك ەكەنى بەلگىلى. ەندى مىنە، جاسى ەگدە تارتقاندا اعىلشىن  تىلى ءۇشىن اۋدارماشىنى كەرەك ەتپەي وتىر.

ەلباسىنىڭ «Please, your report» دەپ باستالعان كەزدەسۋىنەن تۇيگەنىمىز، ءتىل ۇيرەنبەك ادامعا جاس تا، باسقا دا كەدەرگى ەمەس ەكەن.

نۇرسۇلتان نازارباەۆ 76 جاسىندا اعىلشىن ءتىلىن ۇيرەنىپ العانىن كورگەن كەزدە تاۋەلسىزدىكتىڭ 26 جىلىندا قازاق تىلىنە تىلدەرى سىنباعان مينيسترلەردىڭ جايى ەسكە ءتۇستى.

مەملەكەتتىك تىلدەن ماقۇرىم مينيسترلەرگە ەلباسى ۇلگى بولار. سازارعان بەتىم سازارعان دەپ وتىرعان مينيسترلەر مۇنى تۇسىنەدى مە؟ ءاي، قايدام...

تۇسىنسە، تيمۋر سۇلەيمەنوۆ «انا ءتىلىمدى ۇمىتىپ قالدىم» دەمەس ەدى عوي. ۇلتتىق ەكونوميكا مينيسترلىگىنە تاعايىندالعان تيمۋردى تىلدەن بەزدىرگەن - ماسكەۋ. سول جاقتا بەس جىل ءجۇرىپ،  قازاقشانى ۇمىتىپ قالعانىن ءوزى ايتتى. ايتپاقشى، «6 ايدا قازاقشا سايراپ شىعامىن» دەپ انت سۋ ىشكەن ەدى.  مامىردا 4 اي تولادى. ازىرگە تيمۋر قازاقشا جاق اشقان جوق.

ۇلتتىق بانك باسشىسى دانيار اقىشەۆ تا ءتىل ۇيرەنۋگە تۇپ-تۋرا 1 جىل ۋاقىت سۇراعان. ۋادەسىندە تۇردى ما؟ ال ەرلان ىدىرىسوۆ، ۆلاديمير بوجكو سەكىلدى كەي شەندىلەر «باسىمدى كەسىپ الساڭدار دا قازاق ءتىلىن ۇيرەنبەيمىن» دەپ اشىق ايتقان.

بۇلاردىڭ ىزىمەن، ادىلەت ءمينيسترى مارات بەكەتاەۆ تا مەملەكەتتىك ءتىلدى بىلمەيتىن بولىپ شىقتى. زاڭعا جاۋاپتى مينيستر زاڭدى ورەسكەل بۇزىپ وتىرعانىنا باس اۋىرتپايتىن بولسا كەرەك. بۇل دا 1 جىل ۋاقىت سۇرادى.

ايتا كەتۋ كەرەك، سۇلەيمەنوۆ (39 جاس) تە، بەكەتاەۆ (39 جاس) تا، اقىشەۆ(40 جاس) تا - قىلشىلداپ تۇرعان جاستار. بيلىكتىڭ جاس كادرلارى قازاق ءتىلىن بىلمەي-اق قۇزىرلى ورىندارى مەن پارمەندى قىزمەتتەرگە قونجيعانى كۇدىكتى ويلارعا جەتەلەيدى. 40-تاعى ۇشەۋ 76-داعى نازارباەۆتان ۇلگى الىپ، انا تىلىندە (قازاق ءتىلى) سويلەپ شىقسا، حوش... بۇل ءبىر جىل دا وتەر. قالعان اڭگىمەنى سوندا تاعى دا ايتا جاتارمىز.

نۇرگەلدى ابدىعانيۇلى

Abai.kz