كورەسىنى قانات ايتباەۆتان كورىپ ءبىتتىم. ديماش تۋرالى گازەتكە بىردەڭە بەرە قويايىن دەسەڭ: «قويا تۇر...»، «ۇيات بولادى...» دەپ دىڭكەلەتەدى دە تۇرادى.

ديماش قىتايداعى «مەن ءانشىمىن» بايقاۋىنان ورالعاندا سەنات توراعاسى قاسىم-جومارت توقاەۆ قانات پەن سۆەتانى قۇتتىقتاپ، جەدەلحات جولدادى. سونى ەستي سالا، جاتا كەپ جابىستىم: «گازەتكە بەرەيىك...». «جو-جوق، ول — جەكە، وتباسىمىزعا كەلگەن دۇنيە عوي. ۇيات بولادى». قاناتتان قايىر بولماعاسىن سۆەتانى جاعالادىق. «قانات ۇرسادى...» دەپ ازار دا بەزەر بولدى ول دا. اقىرى ارەڭ يلىكتى. گازەتىمىزدىڭ سايتىنا جارق ەتكىزدىك. باسقا سايتتار ءىلىپ اكەتتى. جاقسى جاڭالىق قوي.

قانات ءبىراز كىرجىڭدەدى. سۆەتاعا دا سويلەپتى. مەيلى، قۋىرىپ جەسە دە، ءوز ايەلى، وندا شارۋام قانشا؟! «ەسەگىم سۋدان ءوتتى»، باستىسى...

سول قۋانىشتى كۇندەردىڭ بىرىندە دوسىمىز، ديماشتىڭ قىتايلىقتار تۇگەل جاتتاپ العان «ۇمىتىلماس كۇن» اتتى ءانىنىڭ ءسوزىن جازعان ورال بايسەڭگىر ادەمى ۇسىنىس ايتتى. «اقتوبەدە بيىل بىرقاتار الەۋمەتتىك نىساندار ىسكە قوسىلادى عوي. سونىڭ ىشىندە جاستار سارايى بار. سوعان ديماشتىڭ اتى بەرىلسە، قاتىپ كەتەر ەدى، ءيا؟ وسى ۇسىنىسىمدى گازەتكە جاريالاڭدارشى». جۇرت دۋ ەتە قالدى. قاناتتان باسقاسى، ارينە. ول باياعى «انىنە» باستى: «شىعارمايتىندارىڭ جوق. ۇيات بولادى». استانادان، قىتايدان حابارلاسىپ، الگى ۇسىنىستىڭ گازەتكە شىعىپ كەتپەۋىن قاداعالاۋمەن بولدى. ماعان ءماتىبي، ايتەۋىر...

مەنىڭشە، ورالدىڭ ۇسىنىسى وتە دۇرىس. ءارى بىزدە بۇرىن مۇنداي تاجىريبە بار. جاڭىلىسپاسام، قاراعاندىدا، وسكەمەندەگى سپورت سارايلارىنا وليمپيادا چەمپيوندارى سەرىك ساپيەۆ پەن ولگا شيشيگينانىڭ ەسىمدەرى بەرىلدى. ال اقتوبەدەگى سۋ جاڭا جاستار سارايىنا 23 جاسىندا كۇللى الەمدى مويىنداتقان ديماشتىڭ اتىن بەرسە، جۇزىككە قاس قوندىرعانداي بوپ شىعا كەلمەي مە؟! قالاي ويلايسىزدار؟

باۋىرجان باباجانۇلى

Facebook-تەگى پاراقشاسىنان