قازاقستان رەسپۋبليكاسى اۋىل شارۋاشىلىعى مينيسترلىگى ورمان جانە اڭشىلىق شارۋاشىلىعى كوميتەتىنىڭ پاۆلودار وبلىستىق ورمان جانە اڭشىلىق شارۋاشىلىعى اۋماقتىق ينسپەكتسياسىنىڭ باستىعى بولات بۇلامباەۆ 2010 جىلدىڭ ءى جارتىجىلدىعىندا اتقارىلعان جۇمىستاردى قورىتىندىلاپ، ءباسپاسوز ءماسليحاتىن وتكىزدى.

قازاقستان رەسپۋبليكاسى اۋىل شارۋاشىلىعى مينيسترلىگى ورمان جانە اڭشىلىق شارۋاشىلىعى كوميتەتىنىڭ پاۆلودار وبلىستىق ورمان جانە اڭشىلىق شارۋاشىلىعى اۋماقتىق ينسپەكتسياسىنىڭ باستىعى بولات بۇلامباەۆ 2010 جىلدىڭ ءى جارتىجىلدىعىندا اتقارىلعان جۇمىستاردى قورىتىندىلاپ، ءباسپاسوز ءماسليحاتىن وتكىزدى.

پاۆلودار وبلىسى قازاقستانداعى اسا ءىرى ورماندى القاپتاردىڭ ءبىرى سانالادى. اسىرەسە، ءوڭىرىمىزدىڭ شارباقتى، لەبياجى جانە باياناۋىل اۋداندارىندا ورمان شارۋاشىلىعى جاقسى دامىعان. پاۆلودار وبلىستىق ورمان جانە اڭشىلىق شارۋاشىلىعى اۋماقتىق ينسپەكتسياسىنىڭ باستىعى ب.بۇلامباەۆ بۇقارالىق اقپارات قۇرالدارى وكىلدەرىنىڭ الدىندا سويلەگەن سوزىندە: «پاۆلودار وبلىسىندا 2010 جىلدىڭ سوڭعى بەس ايىنىڭ قورىتىندىسى بويىنشا 1647 گەكتار جەرگە اعاش وتىرعىزىلدى. سونىڭ ىشىندە باياناۋىل تابيعي پاركىنىڭ 80 گەكتار جەرىنە جانە «ەرتىس ورمانى» رەزەرۆاتىندا 554 گەكتار جەرگە اعاش ەگىلدى»،- دەدى. سونىمەن قاتار ينسپەكتسيا باستىعى باقشالارعا 14500-دەي جاس بۇرشىكتەر ەگىلگەنىن ايتتى. بۇرشىكتەردىڭ باسىم بولىگى «ەرتىس ورمانى» رەزەرۆاتىنا ەگىلگەن. باياناۋىل تابيعي پاركىنە ەگىلگەن بۇرشىكتەردىڭ اۋماعى - 14 گەكتار جەر. ءوڭىرىمىزدى جاسىل جەلەكپەن كومكەرۋ ماقساتىمەن ءۇش ۋاقىتشا باقشا وتىرعىزىلعان. «ازىرشە تۇقىم ساپاسى تومەن. مامانداردىڭ بارلىعى وسى سالادا قارقىندى جۇمىس جاساپ جاتىر. جىل سوڭىنا تامان جاقسى ناتيجە الامىز دەگەن سەنىمدەمىز» ، - دەدى ب.بۇلامباەۆ.
ورمان شارۋاشىلىعىن ەكپىندى دامۋىن تەجەيتىن نەگىزگى فاكتور ءورت بولىپ سانالادى. ءباسپاسوز ءماسليحاتى بارىسىندا ينسپەكتسيا باستىعى ورمان شارۋاشىلىعىندا ءجيى بولىپ تۇراتىن ءتىلسىز جاۋدىڭ دا سالدارىنا توقتالدى. «ءورتتىڭ باسىم بولىگى ادامدار كوپ قونىستانعان جەردەن شىعادى. سوڭعى بەس ايدا وبلىس بويىنشا ورتكە بايلانىستى 67 فاكتى تىركەلدى. سونىڭ ىشىندە «ەرتىس ورمانى» رەزەرۆاتىندا 17 جاعداي ەسەپكە الىندى. كوبىنەسە ءورت سوندىرۋشىلەر ءورتتى شالا-شارپى سوندىرە سالادى. ارتىنشا ءسال جەل تۇرسا ءورت لاۋلاپ قويا بەرەدى. بۇل جۇمىسشىلاردىڭ جۇمىسقا دەگەن سەلقوستىعىنىڭ سالدارىنان ورىن الادى» ،- دەدى ب.بۇلامباەۆ. ينسپەكتسيا باستىعى ءباسپاسوز ماسليحاتىندا سويلەگەن سوزىندە الداعى ۋاقىتتا وبلىس اكىمى باقىتجان ساعىنتاەۆ شارباقتى اۋدانىندا ورمان شارۋاشىلىعىنا بايلانىستى اۋقىمدى جينالىس وتكىزەتىنىن ايتتى. «وتىرىستا ورمان شارۋاشىلىعىنداعى ماڭىزدى ماسەلەلەر قارالادى»،- دەدى ينسپەكتسيا باستىعى.
بولات بۇلامباەۆ اڭشىلىق كاسىپ جايلى دا باياندادى. ونىڭ ايتۋىنا قاراعاندا وڭىرىمىزدەگى ورمان شارۋاشىلىعىندا ەلىكتەر مەن قوياندارعا جانە بورسىقتارعا ءجيى اڭشىلىق جاسالادى. كيەلى جانۋار سانالاتىن ەلىكتەردى اتۋعا بايلانىستى سوڭعى بەس ايدا 8 ەسكەرتۋ تىركەلگەن. «اڭشىلىقپەن زاڭسىز اينالىسقانداردىڭ بارلىعى زاڭ الدىندا جاۋاپ بەرەدى»،- دەدى ينسپەكتسيا باستىعى. بولات بۇلامباەۆ ءى جارتىجىلدىق بويىنشا باياناۋىل اۋدانىندا 358 ارقار ەسەپكە الىنعانىن ايتتى.

ەركەبۇلان امىرەنوۆ