دۇيسەنبى, 18 قازان 2021
46 - ءسوز 4210 6 پىكىر 25 مامىر, 2017 ساعات 13:32

جاكەڭ ءبىر بارعاندا-اق امەريكانى اشىپ تاستاپتى

جاقىندا جارىلقاپ قالىبايدىڭ  الەۋمەتتىك جەلىدەن "كاكوۆو ەتو – ۋچيت انگليسكي ۆ 57" دەگەن جازباسىن وقىدىم.

نەگە ەكەنىن بىلمەيمىن، ماعان وسى پوست ونشا ۇنامادى. مۇمكىن قازاققا قارسى پوست جازىپ جۇرگەن گۋلنارا باجكەنوۆا دەگەن جازعاندىقتان با؟ قايتا قارادىم. جوق. پوست جارىلقاپتىڭ جەكە پاراقشاسىندا تۇر. ياعني، سۇحباتتاسقان باجكەنوۆا بولعانمەن دە، نەگىزگى ويى وزىنىكى سياقتى. سوندا نە ۇنامادى، ونى ءوزىم دە تۇسىنە الار ەمەسپىن ازىرگە.

بىلاي قاراعاندا ءبارى دۇرىس سياقتى... اۋىلدا وسكەن. ۇلكەن الەمدىك كەڭىستىككە شىعۋ ءۇشىن ءبىلىم كەرەكتىگىن ەرتە تۇسىنگەن. سوعان ۇمتىلعان.
كازگۋ، بيزنەس، رەداكتسيادا تۇنەۋ، جورنال تيراجىن 100 مىڭعا جەتكىزۋ، قىسىمشىلىق، جورنالىن باسپاۋ. ول قازاق قوعامىنداعى ۇمىتسىزدىك، تۇيىققا تىرەلۋ، شەتى جوق الەۋمەتتىك-ەكونوميكالىق پروبلەمالارمەن قاباتتاسقان. قازاقستانداعى ساياسي تۇراقسىزدىق تا ءوز ءوز اسەرىن تيگىزىپ باققان.
كىشكەنتاي اۋىلدا ءوستىم، ءومىر بويى قازاقشا سويلەپ، قازاقشا جازدىم، ونى شەكسىز سۇيەمىن دەيدى، بىراق... بۇل باگاجبەن، بۇل بەكگراۋندپەن (؟) ءارى قاراي جول جوق ەكەندىگىن ءتۇسىندىم دەيدى.

ءبىزدىڭ دە ءجۇرىپ وتكەن جولىمىز وسى جەرىنە دەيىن ۇقساس، ياعني، ءبىز دە اۋىلدان شىقتىق، ءبىر اۋىز ورىسشا بىلمەستەن وقۋعا ۇمتىلدىق، ۇيرەندىك، قورلىق كورە ءجۇرىپ ينستيتۋت بىتىردىك. جارىلعاپ كۇرەسكەن جاعدايلارمەن ءبىز دە ءومىر بويى ارپالىسىپ كەلەمىز - تۇراقسىزدىق، شەتى جوق ەلەۋمەتتىك-ەكونوميكالىق پروبلەمالار، بولاشاققا سەنىمسىزدىك... ايىرمامىز - جورنال نەمەسە باسقا بيزنەس تۇرىمەن اينالىسقان جوقپىز، وعان ۋاقىتىمىز جەتپەي قالدى.ەكىنشى جاعىنان ارسىز بولۋ، وتىرىك ايتۋ، الداپ كەتۋ، جاعىمپاز بولۋ... قولدان كەلمەدى، مۇنداي قاسيەتتەردى بويىمىزعا ءسىڭىرىپ ۇلگەرمەدىك. جارىلعاپ سياقتى ادال بيزنەسپەن اينالىسقاندار نەكەن-ساياق، مەن جالپى بيزنەستىڭ زاڭدىلىعىن ايتىپ وتىرمىن.

اڭگىمەمىزدىڭ باستاپقى جەلىسىنە قايتا ورالايىق. جانىم وزگەرىستى قالادى، سويتسەم... تاعى دا تۇيىققا تىرەلدىم دەيدى. بۇل جولعى تۇيىق - ءتىل ەكەن. بۇكىل الەم اعىلشىن ءتىلىن وقىپ جاتىر دەيدى. ەۋروپالىقتار دا، قىتايلار، تۇرىكتەر، ورىستار، ارابتار، ءازىربايجاندار... ءبارى-ءبارى اعىلشىن ءتىلىن وقىپ جاتقان كورىنەدى. جالپى، الەمدە ەندىگى جەردە ەكى ءتىل عانا قالاتىن سياقتى - اعىلشىن جانە قىتاي ءتىلى.

دامىعان ەلدەردە ءتىپتى ۇلتقا دا، ناسىلگە دە بولىنبەيدى ەكەن دەيدى. جاكەڭ ءبىر بارعاندا-اق امەريكانى اشىپ تاستاپتى. راس شىعار، بارىپ كورگەن جوقپىز عوي، سوندىقتان سەنبەسكە شارامىز جوق.

سونىمەن... بيزنەستەن تاپقان اقشاسى بار جاكەڭ اقش-قا جول تارتتى. قايدا جۇرسە دە جولى بولسىن، شىن تىلەگىمىز سول! پارامەن اقشا جيناپ العان مەم. قىزمەتكەرلەر دە كەتەر، ءبىرى اقش-قا، ءبىرى ەۋروپاعا. بيزنەسى بارلار، ءسىرا، بايلاپ ۇستاساڭ دا تۇرماس بۇل جەردە.

ەندى...اقشاسى جوق، اۋىلدا قالعان قازاقتار نە ىستەيمىز؟ 8 ملن. قازاق. ۇلتىمىز دا، رۋىمىز دا، ءجۇزىمىز دە، ءتىلىمىز دە وزىمىزدەن باسقا ەشكىمگە قاجەت بولماي قالىپتى عوي، راس بولسا؟ كوشتىڭ سوڭىندا قالىپپىز. بالالاردى قالاي تاربيەلەيمىز؟ ولارعا نە ايتامىز؟ شەتەلگە كەتىپ جاتقاندار ءوز جوندەرىمەن كەتپەي، ءارى-ءسارى كۇيگە ءتۇسىرىپ كەتكەندەرىن كورمەيسىڭ بە؟..

قۋانىش ەدىلحانتەگى

FB پاراقشاسىنان الىندى

6 پىكىر