ۆلاديمير پۋتين سوزىندە المازبەك اتامباەۆپەن بيىل جوعارى دەڭگەيدە ءۇشىنشى رەت كەزدەسىپ وتىرعانىن ايتتى.

"رەسەي قىرعىز ەكونوميكاسىنا كومەكتەسۋىن جالعاستىرا بەرەدى. بۇل قارجىلىق قولداۋ قايتارىمسىز نەگىزدە. قازىر رەسەي-قىرعىز دامۋ قورى جاقسى جۇمىس ىستەپ جاتىر. رەسەي جارعىلىق كاپيتالىنا 500 ملن دوللار قۇيدى", - دەپ اتاپ ءوتتى رەسەي پرەزيدەنتى. ول سونىمەن بىرگە قىرعىزستان مەملەكەتتىك بيۋدجەتىنە قولداۋ كورسەتۋ ءۇشىن جىل سايىن 30 ملن دوللار ءبولىپ وتىرعانىن اتاپ ءوتتى. 2012 جىلدان بەرى بەرىلگەن گرانتتىڭ كولەمى 255 ملن دوللارعا جەتكەن. اتامباەۆتىڭ وسى جولعى ساپارى بارىسىندا رەسەي قىرعىزستاننىڭ 240 ملن قارىزىن ەسەپتەن الىپ تاستاعان.

ۆلاديمير پۋتين سوزدەرىن قورىتىندىلاي كەلە، رەسەيلىك كوممەرتسيالىق قۇرىلىمداردان دا قىرعىزستانعا جۇيەلى تۇردە ينۆەستيتسيا ءتۇسىپ جاتقانىن ايتتى. ونىڭ سوزدەرىنشە، قىرعىز ازاماتتارىنا رەسەيدە جۇمىسقا تۇرىپ، مەديتسينالىق جانە الەۋمەتتىك كومەك الۋعا جەڭىلدىكتەر قاراستىرىلعان.

المازبەك اتامباەۆ ءوز كەزەگىندە ەكى جاقتى قارىم-قاتىناستى ستراتەگيالىق ارىپتەستىك دەڭگەيىنە كوتەردىك دەپ اتاپ ءوتتى.

اباي-اقپارات