قازاققا كىم دوس؟ قىتاي ما؟ رەسەي مە؟
قازاققا كىم دوس؟ قىتاي ما؟ رەسەي مە؟ جوق الدە، اقش پا؟ بىردە بىرەۋى دوس ەمەس. دەرجاۆالار ەشكىمگە ەشقاشان دوس بولمايدى، شىنايى قولدامايدى. ولاردا تەك قانا مۇددە بار. اقش ءوز مۇددەسى ءۇشىن مىڭداعان جاندى تاياۋ شىعىس پەن افريكادا، رەسەي ۋكراينا مەن كاۆكازدا، قىتاي ءوز ىشىندە جانە وڭتۇستىك ازيادا قىرىپ جاتىر. قىرا دا بەرەدى.
ولاردىڭ مۇددەسى ءبىزدىڭ ايماقتا ارتقاندا جانە وعان جەتۋ جولىندا كەدەرگى پايدا بولعاندا، ءبىزدى دە وپ-وڭاي قۇرباندىققا شالا سالادى. ادام قۇقىعى، حالىقارالىق زاڭدار، سانكتسيا، ۆەتو، ەكسپانسيا دەگەن سوزدەر ۇلى دەرجاۆالار جاقسى كورەتىن تەرميندەر، وكىنىشتىسى ول تەرميندەر وزدەرىنە جۇرمەيدى. وزگەنىڭ توبەسىنەن ۇرىپ قالۋ ءۇشىن قولدانىلاتىن قارۋلارىنىڭ ءبىر ءتۇرى عانا. بىرەۋ-مىرەۋ باسىپ كىرۋى ەكىتالاي. الايدا...
قازاقتىڭ جەرىن رەسەي وتارلاۋىنان اقش قورعاي ما؟ قىتاي باسىپ كىرسە، رەسەي قورعاي ما؟ الدە اقش الدا-جالدا اسكەري وپەراتسيا جۇرگىزسە، قىتاي قورعاي ما؟ جوق! اتاسىنىڭ باسى. ۇشەۋى ميىعىنان كۇلىپ، ۆەتنام مەن اۋعانستانداعى، كورەي تۇبەگى مەن سيرياداعى، يراك پەن يەمەندەگى، ليۆيا مەن سوماليدەگى ۇيرەنشىكتى ويىندارىن جۇرگىزە بەرەدى. بەتپەردە كيەدى دە، ءبىرى ۇكىمەت، ءبىرى كوتەرىلىسشى، ءبىرى لاڭكەس ءرولىن سومداي جونەلەدى. مىڭداعان شاڭىراقتى ورتاسىنا ءتۇسىرىپ، جۇزدەگەن مىڭ ولىكتى ارتىنا قالدىرادى دا، كەلەسى ايماققا ىعىسادى. ولاردىڭ ويىن ەرەجەسى سونداي.
ولار ميللياردتاردى قاناپ كۇن كەشەدى. جالپى تاريح زاڭى سول عوي. يمپەريالار قۇلداردىڭ اسەرىنەن تۋىنداعان، دەمەك دەرجاۆالار دا سول ىزبەن جۇرەدى. تەك فورماتىن وزگەرتەدى.
ەندەشە قازاقتى نە ساقتاپ قالماق؟ ۇلتتىق بىرلىك، تاتۋلىق، سانا مەن نامىس. قالعانى بوس ءسوز. ەرتەڭ ەلىمىزدىڭ ءبىر توڭىرەگىندە بوتەننىڭ تانكىسى كورىنسە، تۋىس كورەتىن وزگە تۇركى حالىقتارى دا كومەككە كەلە قويماس. سوندىقتان بەيقام جاتپاۋ كەرەك. ۇلتىمىزدى ۇيىستىراتىن شارالاردى، ساياساتتى ارتتىرعان ءجون! بولىنۋشىلىككە جاسالعان كەز كەلگەن قادامدى زاڭمەن شەكتەۋ مىندەت!
اسحات حاسەنعالي
Facebook-تەگى پاراقشاسىنان
