قازاق ءتىلىنىڭ ماڭىزدىلىعىن جانە قولدانىس اياسىن كەڭەيتۋدى سوناۋ الاش زيالىلارىنان باستاپ ءبىر عاسىردان بەرى ايتىلىپ، جازىلىپ كەلەدى. بىراق اۋىز تولتىرارلىقتاي ناتيجە شىقپادى. سول ءۇشىن دە قازىرگى كۇنى ءتىل تۋرالى ماقالا حالىقتىڭ پسيحولوگياسىن شارشاتىپ تا جىبەردى. قۇر ءسوز ەكەنىن ءتۇسىندى. سوندىقتان بۇل تاقىرىپتا قۇر جىلامسىراپ جازعاندى ءجون كورمەي ءتىل ساياساتىن دامىتۋدىڭ تەتىكتەرى جونىندە ناقتى ۇسىنىستارىمدى بەرىپ وتىرمىن. ەندى ءتىل تاقىرىبىندا ءبارىمىز تەك ۇسىنىستار عانا جازىپ جانە ونى ورىنداۋدا ءوزىمىز ۇلگى كورسەتە بىلەيىك.

ۇسىنىستار:

قازاق ءتىلىنىڭ ماڭىزدىلىعىن جانە قولدانىس اياسىن كەڭەيتۋدى سوناۋ الاش زيالىلارىنان باستاپ ءبىر عاسىردان بەرى ايتىلىپ، جازىلىپ كەلەدى. بىراق اۋىز تولتىرارلىقتاي ناتيجە شىقپادى. سول ءۇشىن دە قازىرگى كۇنى ءتىل تۋرالى ماقالا حالىقتىڭ پسيحولوگياسىن شارشاتىپ تا جىبەردى. قۇر ءسوز ەكەنىن ءتۇسىندى. سوندىقتان بۇل تاقىرىپتا قۇر جىلامسىراپ جازعاندى ءجون كورمەي ءتىل ساياساتىن دامىتۋدىڭ تەتىكتەرى جونىندە ناقتى ۇسىنىستارىمدى بەرىپ وتىرمىن. ەندى ءتىل تاقىرىبىندا ءبارىمىز تەك ۇسىنىستار عانا جازىپ جانە ونى ورىنداۋدا ءوزىمىز ۇلگى كورسەتە بىلەيىك.

ۇسىنىستار:

1. ادامنىڭ تابيعاتى كەز-كەلگەن جاستا ءتىلدى ۇيرەنىپ كەتۋگە بەيىم ەكەندىگىن عىلىم دالەلدەگەن. بالكىم ءتىلدىڭ قادىرىن «ەگەر وسىدان ماعان ءتىل بىتسە، ءتىل اتاۋلىنىڭ ءبارىن ۇيرەنىپ الار ەدىم» دەيتىن مىلقاۋلاردان سۇراپ كورۋ كەرەك شىعار. 20 جىلدا قازاق ءتىلىن ۇيرەنە الماعان قازاقستاننىڭ ازاماتتارى مەملەكەتتىك ءتىلدى قۇرمەتتەمەيتىنىن جانە ۇيرەنگىسى كەلمەيتىنىن اشىق دالەلدەگەنىن ەندى بۇلتاقتاماي شىندىعىن ايتۋىمىز كەرەك. بۇنداي جاعدايدا قازاق ءتىلىن ۇيرەتۋ ءۇشىن 25-كادردى پايدالانۋىمىز ۋاقىت كۇتتىرمەيدى. اقىرى قازىر ءبارى كىتاپ وقىعاننان كورىنىستى (كينو، كليپ، مۋلتفيلم، بەينەروليكتەر، ت.ب.) تاماشالاۋعا قۇشتار عوي. وسى مۇمكىندىكتى ءتيىمدى پايدالانۋ كەرەك. بۇنداي ءتاسىل شەتەلدەردە قولدانىپ جاتىر. ول ءۇشىن 25-كادر ارقىلى ۇيرەتۋدىڭ ادىستەمەسىن جاساۋىمىز قاجەت. بۇل ءتاسىل ارقىلى ەكى اپتادا ءتىل ۇيرەنۋگە بولاتىندىعىن الەمدىك تاجىريبە كورسەتىپ وتىر. ياعني ءتىلدى ەڭ قىسقا ۋاقىتتا ۇيرەنۋدىڭ جولى وسى. مۇنىڭ كەرەمەتتىگى ءتىل ۇيرەنۋگە بارلىق جاعدايى بولا تۇرىپ ۇيرەنگىسى كەلمەيتىندەردى دە، قىسقاسى بۇل كورىنىستەردى كورگەن ادامنىڭ بارىنە ۇيرەتىپ جىبەرەدى ەكەن. بۇل ماسەلەدە ءبىر مەملەكەتتىڭ ءتىلىن ساقتاۋ ءۇشىن جەكە ادامنىڭ قۇقى دەگەندى ەسكەرىپ جاتقان ەشقانداي مەملەكەت جوق. ولاردىكى دۇرىس. سەبەبى جەكە ادامنىڭ قۇقىنان گورى ۇلتتىڭ قۇقى جوعارى تۇرعانى دۇرىس دەپ ويلايمىن.

2. قالتافونعا بايلانىستى ۇسىنىستار. قازاق ءتىلىن تەز ارادا ۇيرەتۋدىڭ توتە جولدارىنىڭ ءبىرى اقپاراتتىق-ەلەكتروندىق تەحنولوگيالاردىڭ باعدارلامالارىن قازاق تىلىنە اۋدارۋ. سولاردىڭ ءبىرى قالتافونعا ارنالعان Mobile Tutor ء(موبيلدى ۇيرەتۋشى) باعدارلاماسىن جاساۋ; Lingvo Tutor-دىڭ قازاقشا نۇسقاسىن، ءموبيلدى قازاقشا ءتىلاشار (Mobile phrasebook) جاساۋ; windows mobile-دىڭ قازاقشا نۇسقاسىن جاساۋ; قىسقاسى ءموبيلدى Java باعدارلامالاردى قازاقشالاۋ; باسقا دا باعدارلاماردى پايدالانا وتىرىپ (Skype, twitter, facebook, ت.ب. نەگىزىندە قازاقشا كۋرستار ۇيىمداستىرۋ) قازاقشا ۇيرەتۋ مۇمكىندىكتەرىن تۋعىزۋ; مىلقاۋلار ءۇشىن قالتافونعا ارنالعان قازاق ءتىلىن ۇيرەتەتىن ءۇش ولشەمدى انيماتسيالىق ىم ءتىلىن جاساۋ; تەرريتورياعا كىرگەلى تۇرعان قالتافوندارعا قازاق ءتىلىن ۇيرەنۋ باعدارلامالارىن (اۋديو-ۆيدەوفايلدار، ديسپلەيلەر، ەلەكتروندىق سوزدىكتەر) جۇكتەپ بارىپ وتكىزۋ جانە قالتافونداردى ساتاتىن فيرمالارعا وسى جۇمىستى مىندەتتەۋ، سوندا عانا بارىپ ساتىلىمعا رۇقسات بەرۋ;

قالتافون، عالامتور ارقىلى قىزىقتى ويىندار وتكىزىپ، جەڭىسكە جەتكەندەرىن بىرلىكتەر جولداۋ ارقىلى سىيلىق جاساۋ. مىسالىعا قازاق تىلىنەن قويىلعان قاراپايىم سۇراقتىڭ جاۋابىن تاپقانعا 50 بىرلىك جولداۋ. ال وسى بىرلىكتەردى جاۋابىن تاپقان 100 ادامعا جولداساق 5 000 تەڭگە بولادى ەكەن. بۇدان دا باسقا ءتۇرلى ايلا تاسىلدەر ارقىلى قازاق ءتىلىن ۇيرەنۋگە دەگەن تالپىنىستى وياتۋ;

قالتافون ارقىلى شەتەلدەن كەلگەندەرگە قازاقشا كومەكتەسەتىن بايلانىس جەلىسىن اشۋ. مىسالىعا ءبىر نومەرگە اۆتوماتتى سوزدىك ورنالاستىرىپ قويۋ كەرەك. ول نومەرگە اعىلشىن تىلىندە ءبىر ءسوز جولداعاندا اۆتوماتتى تۇردە ونىڭ قازاقشاسىن جولدايدى نەمەسە سول نومەرگە قوڭىراۋ سوعىپ قازاقشا ۇيرەنۋگە كومەك الا الاتىنداي بولسا;

قازاقشامەن بايلانىستى جاساعان بارلىق ەلەكتروندىق سوزدىكتەردى عالامتورعا ورنالاستىرۋ. عالامتوردا بولسا قالتافونعا دا جۇكتەپ الۋ مۇمكىندىگى تۋادى. ياعني كەز-كەلگەن ادام قالتافونىنا سوزدىك جۇكتەي الادى.

قالتافون قىتايدىڭ يەروگليفتەرىن تانىعاندا قازاق ارىپتەرىن تانىمايدى دەگەن سىلتاۋ عانا.

3. عالامتوردىڭ دامۋى ونى قولدا­نۋشىلاردىڭ كوپتىگىمەن ولشەنەدى. عالام­توردىڭ بارلىق مۇمكىندىكتەرىن پايدالانا وتىرىپ، قازاق ءتىلىن ۇيرەتەتىن سايتتاردى كوپتەپ اشۋ. ءتىل كوميتەتى ءتۇرلى وقۋلىقتار شىعاردىق دەيدى، بىراق عالامتوردا جوق. سول وقۋلىق قۇرالدارىنىڭ دايىن تۇرعان ەلەكتروندىق نۇسقاسىن عالامتورعا ەنگىزسە بولدى. عالامتوردا قازاق ءتىلىن ۇيرەتۋگە قىزىقتىراتىن سايتتار كوبەيسە، الەمنىڭ تۇكپىر-تۇكپىرىندەگى قازاق ءتىلىن ۇيرەنگىسى كەلگەن ادامدار وزدىگىنەن ۇيرەنە بەرەدى. قانداستارىمىز سەنبەۋى مۇمكىن، قازاقستان دەگەن كەڭ بايتاق ەلدىڭ ءتىلىن ۇيرەنگىسى كەلىپ جۇرگەن شەتەلدىكتەر عالامتوردا قاپتاپ ءجۇر. وسى مۇمكىندىك ارقىلى الەمدەگى 6,5 ملرد. (عالامتور قولدانۋشىلاردى عانا ەسەپتەۋگە بولمايدى. سەبەبى قازاق ءتىلىن ۇيرەنگىسى كەلگەن شەتەل ازاماتى قازاقستانعا كەلمەي-اق عالامتوردىڭ كومەگىنە جۇگىنگەن الدەقايدا ءتيىمدى بولادى) ادامنىڭ كەمىندە ءجۇز مىڭداعانى عالامتورعا شىعىپ، ءتىلىمىزدى ۇيرەنەرى ءسوزسىز. بۇعان ەشكىمنىڭ داۋى بولماسىن. مىسالىعا، قازاقستاندا بيزنەس جاساعىسى كەلىپ جۇرگەن قانشاما شەتەلدىكتەر ءجۇر قازاقشا ۇيرەنگىسى كەلىپ. ارينە ولار قازاقستاننىڭ بيزنەس ءتىلى ورىس ءتىلى ەكەنىن بىلمەيدى. تەك قازبا بايلىقتارعا باي ەل ەكەنىمىزدى بىلەدى.

4. قالتافون بايلانىس جەلىلەرىندە قازاق ءتىلىن جانە ورىس ءتىلىن پايدالاناتىنداردىڭ ءتىزىمى بار (مىسالىعا مەن قازاق تىلىندەگى قىزمەتتى تاڭدادىم. سول ءۇشىن ماعان اكتيۆ جەلىسى حابارلامالارىن قازاق تىلىندە اۆتوماتتى تۇردە جولدايدى). ورىس تىلىندەگى قىزمەتتى پايدالانۋشىلارعا كۇنىنە ءبىر رەت كۇندەلىكتى قولداناتىن قىزىقتى قازاقشا سوزدەردى ورىسشا تۇسىنىكتەمەسىمەن جولداپ وتىرۋ، ت.ب.;

5. قازاقستانداعى بارلىق تولەمدەردى جۇرگىزەتىن تەرمينالدار مەن بانكوماتتاردىڭ (اقشامات دەسەك تە بولادى) العاشقى بەتىنە (ينتەرفەيس) وسى سالادا قولداناتىن قازاقشا سوزدەردى ورىسشا تۇسىنىكتەمەسىمەن جازىپ قويۋ. بۇل اپپاراتتى قولدانعىسى كەلگەن ادام قالاسىن، قالاماسىن وعان كوزى تۇسەدى. ودان شىققاننان كەيىن بارىپ تولەم وپەراتسيالارىنا كوشەدى.

6. قازاق ءتىلىن ۇيرەتۋ ماسەلەلەرىنەن كەيىن قازاقستانعا بايلانىستى بارلىق تاقىرىپتاردىڭ: قازاق ەنتسيكلوپەديالارىن، قازاق تاريحى، قازاق ادەبيەتى، ت.ب. عالامتورعا جانە ءموبيلدى ءتۇرىن شىعارۋ. مىسالىعا قالتافونعا ارنالعان قازاقشا Wapedia ەنتسيكلوپەدياسىن جاساۋ. Wapتىڭ بارلىق سەرۆيستەرىن قازاقشالاۋ; قىسقاسى قازاق ءتىلىنىڭ كورپۋسىن جاساۋ. ياعني قازاق تىلىنە قاتىستى بارلىق دۇنيەلەردىڭ ەلەكتروندىق كوشىرمەسىن جاساپ، دەرەكقورلارىن جاساقتاۋ.

7. قالتافون ارقىلى قازاقشا حابارلامانى (سمس) وسى كۇنگە دەيىن لاتىن ارىپتەرىمەن نەمەسە كيريلليتسا ارپىمەن «كالىن كالاي» دەگەن سياقتى قاتە كۇيىندە جازۋعا ۇيرەنىپ كەتتىك. قالتافوندى بىلدىرلاعان بالاعا دەيىن قولداناتىنىن ەسكەرسەك «شالا قازاق ءتىلىن» دامىتۋعا ۇلەسىمىزدى اياماي قوسىپ جاتقانىمىزدى اڭعارۋعا بولادى (جاستار اراسىندا سمس-ءتى شالا قازاق ءتىلى دەپ تە اتايدى). قازاقتىلدىلەردىڭ قۇقىعىن بۇزباۋ ءۇشىن سمس-ءتى جازۋعا ارنالعان قازاق لاتىن ءالىپبيىن قۇراستىرۋىمىز كەرەك. وسىلايشا لاتىن الىپبيىنە كوشۋ پروتسەستەرىن تەزدەتۋگە بولادى.

8. بارلىق جوعارى وقۋ ورىندارىندا ءىت تەحنولوگيا ماماندارىن دايارلايتىن ماماندىقتار اشۋ (الماتىداعى جالعىز وقۋ ورنىنا ءبارىنىڭ قولى جەتە بەرمەيدى). بۇل ماسەلە جوعارىداعى ماسەلەلەرىمىزدى شەشۋ ءۇشىن قاجەت. سوندا جوعارىدا اتالعان باعدارلامالاردى قازاقشاعا اۋدارىپ جاتپاي، بىردەن سول باعدارلامالاردىڭ قازاقشا نۇسقاسىن ءبىر-اق جاساي سالۋعا بولادى. جوعارىدا اتالعان ماسەلەلەرگە دە كوپ قارجى كەرەك ەتپەيدى. تىلگە ءبولىنىپ جاتقان ميللياردتاعان قارجىلاردى ەشكىم وقىمايتىن كىتاپتار شىعارا بەرگەنشە، وسى اتالعان سالاعا قارجى قۇيۋ كەرەك. وسىلاردىڭ ءبارىن ىسكە اسىرعاندا قازاقتىلدىلەرگە جانە قازاقشا ۇيرەنەم دەگەندەرگە قاعاز، قالام، سوزدىكتەر، ەنتسيكلوپەديالار، ت.ب. ارقالاپ جۇرۋلەرىنىڭ قاجەتى بولماي قالادى. قالتافوندارى ارقىلى 24 ساعات بارلىعى جانىنان تابىلادى.

9. ارانداتۋشى ساۋالنامالاردىڭ جولىن كەسۋ ءۇشىن سمس-ساۋالناما ۇيىمداستىرۋ كەرەك. بۇل كەز-كەلگەن ماسەلەگە قاتىستى حالىقتىڭ پىكىرىن انىقتاۋدىڭ ەڭ وبەكتيۆتى ءتاسىلى. باسقا ساۋالنامالار كەزىندەگىدەي قولدان پاراقشالاردى تولتىرىپ، جاساندىلىقتار جاساۋعا جول بەرمەيدى. سەبەبى داۋىسقا قاتىسقان قالتافون نومەرى ايقىندالعان (فيكسيروۆات) سوڭ ول نومىردەن قايتا داۋىس قابىلدانبايدى. سونداي-اق عالامتوردان جولدانعان حابارلامالار دا قابىلدانباۋى، ەسەپتەلمەۋى ءتيىس.

10. عالامتور قارپى لاتىن. سوندىقتان قازاق عالامتورىن دامىتار بولساق، بىردەن لاتىن ارپىندە دامىتقانىمىز ءجون. ەرتەڭ كيريليتسادان قايتا لاتىنعا كوشىرىپ ەكى جۇمىس ەتپەس ءۇشىن.

11. كىتاپحانالاردىڭ ءبارىن عالامتورعا قوسۋ. مۇمكىندىگى بار قازاقشا كىتاپتىڭ ءبارىن عالامتورعا قويۋ. قازىر قورعالىپ جاتقان ديسسەرتاتسيالاردىڭ ءبارى كومپيۋتەردە تەرىلەدى. ەلەكتروندىق نۇسقاسىن عالامتورعا شىعارۋ. اۆتورى دا كىتابىن وقىرماندارعا ۇسىنعانىنا مۇددەلى. عالامتورداعى قازاقشا ماتەريالداردى كوبەيتە بەرۋ ول دا ۇلكەن جەڭىس. تۇتىنۋشىلارى كوبەيگەن ءتىل ولمەسى انىق.

12. كومپيۋتەرلىك باعدارلامالار جابدىق­تاۋ جۇيەسىن تۇگەلدەي قازاقشالاپ جاڭا پروتسەسسورلاردى ءوزىمىزدىڭ وتاندىق ءونىم رەتىندە شىعارۋ. مۇمكىن وسى ماسەلەدە Microsoft قازاقستان كومپانياسىمەن كەلىسىم جاساۋ كەرەك شىعار. نەمەسە كومپيۋتەرلىك تەحنيكانى باستان اياق قازاق جەرىندە جينايتىن زاۆود اشىپ الۋ كەرەك.

13. «قازاقستان رەسپۋبليكاسىنىڭ مەم­لەكەتتىك رامىزدەرى تۋرالى» قازاقستان رەسپۋبليكاسىنىڭ 2007 جىلعى 4 ماۋ­سىمداعى № 258 كونستيتۋتسيالىق زاڭىنا سايكەس قازاقستان رەسپۋبليكاسىنىڭ مەم­لەكەتتىك گيمنى مەملەكەتتىك تىلدە ورىندالىپ، مەملەكەتتىك تىلدە كورنەكى ورىنعا ءىلىنۋى ءتيىس. الايدا وسى جوعارىدا اتالعان كونستيتۋتسيالىق زاڭ ءالى كۇنگە دەيىن ورىندالار ەمەس. سەبەبى بارلىق جەردە مەملەكەتتىك تىلمەن قوسارلاسىپ ورىس تىلىندەگى نۇسقاسى ءىلىنىپ تۇر. ورىس تىلىندەگى نۇسقاسىنىڭ بولۋى بۇل ازاماتتارىمىزدىڭ گيمندى ەكى تىلدە ايتۋىنا جول اشادى. حالىقتى شاتاستىرماي وسىنداي كەلەڭسىزدىكتەردىڭ الدىن الۋىمىز ءۇشىن زاڭدا كورسەتىلگەندەي كورنەكى ورىندارعا ءىلىنۋى ءتيىس.

14. سپورتتان قازاقستاننىڭ كەز-كەلگەن قۇراما كومانداسى مەملەكەتتىك ءانۇراندى بىلمەيدى. چەمپيوندىق تۇ­عىردا تۇرعان جەرلەستەرىمىزدەن باستاپ، فۋتبولشىلارىمىزعا دەيىن انۇرانعا قوسىلىپ ايتا المايتىنىنا كوزىمىز ۇيرەنىپ كەتتى دە. وسى جىلدىڭ 17 قازانىندا قازاقستاننىڭ شاڭعىشىلار قۇراما كومانداسىمەن كەزدەسكەندە «قازاقستاننىڭ مەملەكەتتىك ءانۇرانىن بىلەتىندەرىڭىز بار ما؟» دەگەن سۇراققا ءبارى ءبىراۋىزدان «جوق» دەپ جاۋاپ قايىردى جانە مۇنىسىنا ۇيالىپ، قىسىلمايتىندارىن دا بايقايتتى. مۇنى تۇسىنە بىلگەنگە سۇمدىق ماسقارا. ەگەر دە سپورتشى ءانۇراندى بىلمەسە، قانداي پاتريوتتىق سەزىمى بولماق؟ سپورتشى تۇگىل ءاربىر ازامات ءبىلۋى كەرەك قوي. ۇلت رۋحىنىڭ ءۇنى بولىپ جەتكەن ءانۇرانىمىزدى قۇرمەتتەۋ، ايتۋ بارىمىزگە مىندەت. ءانۇرانىمىزدىڭ ءوزى شەتەلدەردە كوپ ورىندالا بەرمەسى بەلگىلى. ەلدىڭ پرەزيدەنتى بارعاندا جانە سپورتشىلار جەڭىس تۇعىرىنا كوتەرىلگەندە عانا. ال وسىنداي الەم ەلدەرىنىڭ كوز الدىندا تۇرىپ ەلىمىزدىڭ ءانۇرانىنا قۇرمەتسىزدىك كورسەتىپ جاتساق، ەلدىگىمىزگە سىن. بۇل نامىسسىزدىق. نامىسى جوق سپورتشى قالاي ەلىمىزدىڭ بەتكە تۇتارى بولماق. قانشا جەردەن جەڭىمپاز بولىپ تۇعىردا تۇرعانىمىزبەن ءانۇرانىمىزدى ايتپاي، شەتەلدىكتەر الدىندا كۇلكى بولىپ كەلگەنىمىز جەتەر ەندى. دامىعان ەلدەردى ايتپاي-اق قويايىن، كورشى قىرعىز دەپۋتاتتارى انۇرانعا قوسىلماعان ازاماتتارعا ايىپپۇل سالۋ ماسەلەسىن قاراستىرىپ جاتىر. بالكىم وركوكىرەكتىگىمىزدى قويىپ، انۇرانعا قۇرمەت كورسەتۋدى قىرعىزداردان ۇيرەنگەنىمىز ءجون بولار. سپورتشى سپورتپەن شۇعىلدانباس بۇرىن الدىمەن ءانۇراندى جاتتاپ جاتتىعۋى كەرەك. سودان ول كۇش الۋى كەرەك. سول ءانۇراندى شەتەلدە تۇعىرعا شىعىپ ايتۋ ءۇشىن، شەتەلدىكتەردى ورنىنان تۇرعىزىپ قۇرمەت كورسەتكىزۋ ءۇشىن سپورتشى جانىن سالۋى ءتيىس. سول ءۇشىن كۇرەسۋى ءتيىس. سونداي-اق ءانۇراندى وزگەتىلدىلەرگە ۇيرەتۋ - ءتىلىن قازاقشاعا سىندىرۋ دەگەن ءسوز.

15. ءبىر قىزىعى قازاقستانداعى بارلىق بالالار ءۇيى ورىس تىلىندە تاربيە الادى ەكەن. ولاردىڭ ءبارىن قازاق تىلىنە كوشىرۋ كەرەك. سەبەبى ول بالالار مەملەكەتتىڭ قورعاۋىنداعى بالالار. مەملەكەت ولارعا ءوز تىلدەرىن عانا ۇيرەتۋى شارت. مەملەكەتتىك قىزمەتتە عانا تەڭ قولدانىلاتىن ورىس ءتىلى ءبىلىم سالالارىندا قولدانىلمايتىن شىعار. ونىڭ ۇستىنە بارلىق بالالار ءۇيى تەك ورىس تىلىندە ءبىلىم الۋى ادىلەتسىزدىك. سەبەبى ول جەردە قازاق بالالارى كوپتەپ كەزدەسەدى. بالالارىن شەتەلگە ساتىپ جاتقان قازاقتار ءۇشىن بالالار ۇيىنە وتكىزىپ جىبەرۋ ونشا ار بولماي قالدى عوي.

ۆيرتۋالدى كەڭىستىكتى قازاقشالاۋعا مەملەكەت تاراپىنان قولداۋ بولمايىنشا ول دامىمايدى. باسقا تىلدەردىڭ ۆيرتۋالدى كەڭىستىكتە جىلدام دامىپ جاتقان سەبەبى، ول تىلدەردى قولدانۋشىلاردىڭ سانى وتە كوپ، ون ميلليونداپ، ءجۇز ميلليونداپ تابىلادى. ۆيرتۋالدى كەڭىستىكتىڭ دامۋى ونى قولدانۋشىلاردىڭ كوپتىگىمەن سانالادى جانە كوپ بولعاندىعى ءۇشىن دە ەنتۋازيستەرى بار، پاتريوتتارى بار، ەرىكتىلەرى بار ءبارى جان-جاقتان ءوز ۇلەستەرىن قوسىپ جاتىر. ول ءتىل مەملەكەتتىڭ قولداۋىن اسا قاجەتسىنبەيدى. ال بىزدە مۇنداي مۇمكىندىك ءتىپتى اتىمەن جوق. سوندىقتان بۇل سالادا قازاق ءتىلى تەك مەملەكەتتىڭ قولدانۋىنا سۇيەنەدى. بولاشاقتا ۆيرتۋالدى كەڭىستىكتە باسەكەلەسە العان ءتىل عانا ولمەيتىنىن ەسكەرسەك، قازاقستاننىڭ ازاماتىمىن دەگەندەر مەن ۇكىمەتىمىز تەز ارادا تىلىنە كومەك قولىن سوزۋى ءتيىس.

جوعارىدا اتالعان ۇسىنىستاردىڭ ءبارى جاڭالىقتار ەمەس الەمدىك تاجىريبەدە قولدانىستا بار.

فازىلبەك ءابساتتارۇلى، استانا قالاسى

«جاس قازاق ءۇنى» گازەتى