قۇرمەتتى مۇسىلمان باۋىرلار، وتانداستار!
اللانى ءبىر، مۇحاممەد (س.ع.س.) پايعامباردى حاق دەپ بىلەتىن مۇسىلمان بالاسى ءۇشىن جاراتۋشىمىز بەلگىلەپ بەرگەن ەكى مەيرامنىڭ ۇلىعى قۇربان ايت كۇندەرىنە دە جەتتىك. اللا تاعالانىڭ رازىلىعى ءۇشىن مال شالىنىپ، كەڭ داستارقان جايىلىپ، ەڭبەكتەگەن سابيدەن ەڭكەيگەن كارىگە دەيىن شات-شادىمان قۋانىشقا بولەنەتىن بۇل ۇلىق مەيرام قازاقستان جۇرتشىلىعىنا دا ىرىس پەن بەرەكە اكەلسىن!

قۇرمەتتى مۇسىلمان باۋىرلار، وتانداستار!
اللانى ءبىر، مۇحاممەد (س.ع.س.) پايعامباردى حاق دەپ بىلەتىن مۇسىلمان بالاسى ءۇشىن جاراتۋشىمىز بەلگىلەپ بەرگەن ەكى مەيرامنىڭ ۇلىعى قۇربان ايت كۇندەرىنە دە جەتتىك. اللا تاعالانىڭ رازىلىعى ءۇشىن مال شالىنىپ، كەڭ داستارقان جايىلىپ، ەڭبەكتەگەن سابيدەن ەڭكەيگەن كارىگە دەيىن شات-شادىمان قۋانىشقا بولەنەتىن بۇل ۇلىق مەيرام قازاقستان جۇرتشىلىعىنا دا ىرىس پەن بەرەكە اكەلسىن!

بۇل كۇندەردىڭ ۇلىقتىعى سول - مۇندا ادام بالاسى ءوز جاراتۋشىسىنا بارىنشا جاقىنداي تۇسۋگە تاماشا مۇمكىندىك الادى. اسىلى، «قۇربان» ءسوزى دە اراب تىلىنەن اۋدارعاندا «جاقىن بولۋ»، «جاقىنداۋ» ماعىناسىن بىلدىرەدى. ولاي بولسا، قۇرباندىق شالۋدى تەك مال سويىپ، قان شىعارۋ ەمەس، اللانىڭ راحىم-مەيىرىمىنە قول جەتكىزۋدىڭ ءبىر جولى دەپ تۇسىنگەن ابزال.
قۇربان شالۋ - سوناۋ يبراھيم (ع.س.) پايعامباردان جالعاسىپ كەلە جاتقان ءۇردىس. بۇل عيبادات ارقىلى اللانىڭ ىقىلاستى قۇلدارى ءوز سەنىمىنە بەرىكتىگى مەن بەرىلگەن نىعمەتتەرگە شۇكىرشىلىگىن تانىتادى. قاسيەتتى قۇران كارىمدە: «اللاعا قۇرباننىڭ ەتتەرى، قاندارى، استە، جەتپەيدى. بىراق سەندەردىڭ تاقۋالىقتارىڭ جەتەدى» («حاج» سۇرەسى، 37-ايات), - دەلىنگەن. اياتتا قۇلشىلىق رەتىندە سويىلعان قۇرباندىقتىڭ ماڭىزدى ءبىر شارتى شىنايىلىق پەن تاقۋالىق ەكەندىگى اشىق باياندالعان. ولاي بولسا، ماسەلە اللا جولىنا اتالعان مالدىڭ ەتى مەن قانىندا ەمەس، ونى شالۋشىنىڭ تاقۋالىعىندا. سوندىقتان دا قۇربان شالىنىپ جاتقاندا «اللاھۋمما مينكا ءۋا لاكە» (ۋا، اللا تاعالام، بۇل مال سەنەن كەلدى، ساعان بارادى) دەگەن دۇعانىڭ كوبىرەك ايتىلۋى تەگىن ەمەس.
قۇربان ايت كۇندەرى شاريعات بويىنشا نيساپ مولشەرىندەگى، ياعني 85 گ. التىنعا تەڭ اقشاسى بار، باسى ازات، اقىل-ەسى ءبۇتىن، جولساپاردا ەمەس، مۇسىلمانعا كەم-كەتىكسىز ءبىر جاستاعى قويدى نە ەشكىنى ياكي ءبىر ادامنان جەتى ادامعا دەيىن نيەت ەتە وتىرىپ ەكى جاستاعى سيىر نەمەسە بەس جاستاعى تۇيەنى قۇرباندىققا شالۋ ءۋاجىپ. قۇرباندىقتىڭ ۋاجىپتىگى قاسيەتتى قۇراندا: «راببىڭ ءۇشىن (ايت نامازىن) وقى، قۇرباندىق شال» («كاۋسار» سۇرەسى، 2-ايات), - دەپ بۇيىرىلعان. ال ءاز-پايعامبارىمىز (س.ع.س.): «كىمدە-كىم مۇمكىندىگى بولا تۇرا قۇرباندىق شالماسا، ءبىزدىڭ ناماز وقيتىن جەرىمىزگە جاقىنداماسىن!» - دەپ ەسكەرتكەن. بۇل حاديس قۇر­بان شالۋ مەرزىمىن بەيقامدىقپەن وتكىزىپ الماۋعا ۇندەيدى ءھام ساراڭدىق تانىتىپ، بۇيرىقتى ورىنداۋدان باس تارتۋدىڭ كۇنا ەكەنىن بىلدىرەدى. ارداقتى اللا ەلشىسىنىڭ (س.ع.س.) وسى سۇننەتىنە اسا بايىپپەن قاراپ، شىن ريزاشىلىقپەن دۇرىس شالىنعان مال اللا تاعالا رازىلىعىنا قول جەتكىزدىرۋى مۇمكىن.
2010 - وتانىمىز ءۇشىن ەرەكشە جىل. تاۋەلسىز مەملەكەتتەر دوستاستىعىنا مۇشە ەلدەر اراسىندا قازاقستان تۇڭعىش رەت 56 مەملەكەت قۇرامىنا ەنەتىن حالىقارالىق اسا بەدەلدى - ەۋروپا قاۋىپسىزدىگى مەن ىنتىماقتاستىعى ۇيىمىنا توراعالىق ەتۋدە. الەمدىك ۇلكەندى-كىشىلى مەملەكەتتەردىڭ باسشىلارى مەن ءىرى قايراتكەرلەردىڭ، سارابدال ساراپشىلاردىڭ بۇعان قاتىستى بەرگەن باعاسى مەن پىكىرى مەيلىنشە جوعارى. قۇربان ايتتان كەيىن استانادا وسى ۇيىمعا كىرەتىن مەملەكەت باسشىلارى مەن حالىقارالىق بەدەلدى ۇيىمدار وكىلدەرىنىڭ كەلەلى باس قوسۋى - ءسامميتى وتپەك. وندا الەمدىك كۇردەلى ماسەلەلەر قارالىپ، تالقىلانادى. وسىنىڭ ءبارى جاس تاۋەلسىز قازاقستاننىڭ، ونىڭ دانا باسشىسى نۇرسۇلتان ءابىشۇلى نازارباەۆتىڭ زور ابىرويى مەن بەدەلىنىڭ ارقاسى ەكەنىن الەم تانىپ، مويىنداپ وتىر. مۇنى ءاربىر وتان­داسىمىز زور ماقتانىش ەتىپ، ۇلكەن جەتىستىك دەپ بىلەدى. بۇل ءۇشىن اللا تاعالاعا سانسىز ماقتاۋلارىمىز بەن شۇكىرلىگىمىز بولسىن.
قۇرمەتتى مۇسىلمان باۋىرلار مەن وتان­داس­تار! ۇلىق مەرەكە قۇتتى بولسىن! ايت كۇنگى ىزگى نيەتتەرىڭىز بەن شالعان قۇرباندىقتارى­ڭىز­دى اللا تاعالا قابىل ەتسىن. ءاربىر وتباسىنا باقىت، بەرەكە قونعاي! كوپ ۇلت پەن ۇلىستى وتانىمىزعا بىرلىك پەن ىنتىماق بەرگەي!
جاراتۋشى يەمىز سۇيىكتى قازاقستانىمىز بەن ەل قامىندا جۇرگەن ەلباسىمىزدىڭ مەرەيىن ۇستەم ەتىپ، حالقىمىزدىڭ اۋىزبىرلىگىن ارتتىرا بەرگەي! ءامين!

«اباي-اقپارات»