بيىل «ۇزدىك الەۋمەتتىك جوبا» كونكۋرسىنا 12 ءوتىنىم ءتۇسىپ، «جىگەر-م» قوعامدىق بىرلەستىگى جەڭىپ الدى. بۇل بىرلەستىك «مۇمكىندىگى ششەكتەۋلى جاستاردى قولجەتىمدى سپورت تۇرلەرىمەن شۇعىلدانۋعا باۋلۋ» جوباسىمەن گرانتقا يە بولدى. بۇل تۋرالى الماتى وبلىسىنىڭ وڭىرلىك كوممۋنيكاتسيالار قىزمەتى الاڭىندا بەلگىلى بولدى.

«كونكۋرسقا جوبالار مازمۇنى، تانىستىرۋى، ارى قاراي دامۋى جاعىنان ىرىكتەلىنىپ الىندى. الەۋمەتتىك جوبا بولعاندىقتان بارىنشا قوعامعا ەڭ قاجەتتىسى تاڭدالىنىپ الىندى، ياعني مۇگەدەكتەرگە مەيلىنشە كومەك بەرۋ. جالپى  2014 جىلدان باستاپ «قازاقستاندا ىسكە اسىرىلاتىن ۇزدىك الەۋمەتتىك جوبالار» كورمەسى قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ۇيىمداستىرۋىمەن رەسپۋبليكالىق جانە وڭىرلىك دەڭگەيدە وتكىزىلىپ كەلەدى. ءىس-شارالار قوعامدىق بىرلەستىكتەرگە كومەك كورسەتۋ جانە حالىقتىڭ الەۋمەتتىك وسال توپتارىنىڭ، ونىڭ ىشىندە ومىرلىك قيىن جاعدايعا تاپ بولعان مۇمكىندىكتەرى شەكتەۋلى ادامداردىڭ ءومىر ءسۇرۋ دەڭگەيىن كوتەرۋ ماقساتىندا جانە شىعارماشىلىق دەڭگەيىن دامىتۋعا باعىتتالعان»، - دەدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ناۋرىزباەۆا ءسانيا.

ايتا كەتەيىك، الەۋمەتتىك جوبا وبلىستىق بايقاۋدان وتكەن سوڭ، رەسپۋبليكالىق دەڭگەيدە ساراپتالىناتىن بولادى.

Abai.kz